Pagtabang sa Bag-ong mga Magmamantala

¹ Si Jehova padayong nagapanalangin sa iyang katawhan pinaagig pagpasulod sa “bililhong mga butang sa mga nasod.” (Hag. 2:7) Sa miaging tuig dihay pag-uswag sa hapit 6,000 ka bag-ong magmamantala sa Pilipinas. Maoy atong tinguha karon sa pagtabang niini kanila sa pagkahimong mas epektibong “mga mangingisda sa mga tawo.”​—Mar. 1:17.

² Kanus-a man ang gitun-an sa Bibliya madapit sa pagduyog kanato diha sa pag-alagad sa kanataran? Sa dili pa siya magpaila sa iyang kaugalingon sa publiko ingong usa ka Saksi, kinahanglang makab-ot una niya ang Kasulatanhon ug organisasyonal nga mga kinahanglanon nga gihikyad sa mga panid 97-99 (pp. 98, 99 sa Ingles) sa librong Atong Ministeryo. Ang mga pangutana dinha moabag kanimo sa pagtino kon ang gitun-an sa Bibliya nakakab-ot ba niining mga kinahanglanona. Kon siya takos na, siya mahimong dapiton sa pag-ambit sa buluhatong pagsangyaw ug magreport sa iyang binuhatan ngadto sa kongregasyon. Kon adunay takos na sa imong mga ginatun-an, ang Abril mao ang labing maayong higayon sa pagpasugod kanila sa pag-alagad.

³ Ang bag-ong mga magmamantala basin may kasibot ug kadasig apan kulang ug kasinatian. Tingali imong mabuligan sila nga makaambit sa pagtanyag ug tract o mga magasin, o mahimong hangyoon mo silang mobasag usa ka teksto. Dayega sila sa ilang kaikag sa pakig-ambit. Abagi silang “mouswag ngadto sa pagkahamtong.”​—Heb. 6:1.

PAG-USWAG

⁴ Maingon nga ang mga bata nagatuon sa paglakaw pinaagig usa ka tikang una, ang bag-ong mga magmamantala matabangan usab tikang-por-tikang. Kon ikaw nagabansay ug bag-ong magmamantala, sa mauswagon imo bang maabagan siya sa pagbungat ug introduksiyon sa pultahan, sa paggamit sa Ulohan nga Mahisgotan, ug sa pagtanyag sa tanyag sa basahon? Andam ba siyang mokat-on nga ipahimutang ang basihanan alang sa balikduaw ug sa ulahi sa pagtuon sa Bibliya? Tungod kay adunay mga praktis sesyon ug pagkuyog kaniya sa pagsangyaw makabulig kaniya sa paghimo niining mauswagong mga tikang.

⁵ Kon ikaw usa ka ginikanan, imo bang ginabuligan ang imong mga anak sa pagkab-ot sa Kasulatanhong mga kinahanglanon aron mouswag sa ministeryo? Ayawg pakamenosa ang katakos sa mga bata sa pag-uswag. Daghang batan-on nagpakitag dalayegong abilidad sa pagpahimutag mga basahon ug sa pagsugod ug pagdumalag mga pagtuon. Pagsangyaw nga duyog gayod ang imong mga anak. Pasugda sila sa edad nga bata pa. Abagi sila sa pagtubo sumala sa ilang mga katakos. Dayega sila sa ilang panlimbasog ug kauswagan.​—Tan-awang Atong Ministeryo, mga panid 99, 100.

⁶ Ang tanang dedikadong alagad ni Jehova kinahanglang manlimbasog sa paghimog kauswagan diha sa epektibong pagtanyag sa maayong balita. Tabangi silang mga bag-ohan dili lang sa pagsugod diha sa ministeryo sa kanataran kondili sa pag-uswag sa ilang katakos samtang manlabay ang panahon.​—1 Tim. 4:15, 16.