Mga Pangutana Gikan sa mga Magbabasa

◼Tungod sa bag-ong impormasyon mahitungod sa pagsugod sa pagsangyaw sa publiko sa mga dili pa bawtismado, ang usa ka estudyante sa Bibliya madapit ba sa pagkuyog makadiyut aron sa pagtan-aw sa unsang paagi ginabuhat ang buluhaton?

Sa panguna, ang mga dili-bawtismado nga nagakuyog sa mga Saksi ni Jehova sa pagsangyaw sa kanataran maoy mga tawo nga kuwalipikadong mga magmamantala sa maayong balita.

Daghan sa publiko ang nagatahod sa mga Saksi ni Jehova tungod sa ilang linain ug maayong buluhaton sa ‘paghimog mga tinun-an, nga magatudlo kanila’ gikan sa ganghaan ngadto sa ganghaan ug pinaagi sa mga pagtuon sa Bibliya sa balay. (Mateo 28:19, 20) Nan, unsay ihinapos sa publiko bahin sa usa ka tawo nga nagakuyog sa usa ka Saksi sa maong pag-alagad? Sila makataronganong moingon nga ang kauban maoy ministro o hapit na gayod nga mahimong ministro.

Itugot nato, ang pila ka eksepsiyon basin mahinumdoman.

Sa talagsang mga okasyon ang nahiangayng mga ansiano nagtugot sa usa ka reporter, propesor sa kolehiyo, o ang susama sa pagkuyog sa usa ka Saksi sa balay-balay nga ministeryo sa pagtan-aw kon giunsa kini paghimo. Siyempre, ang panagway ug linihokan sa tawo sa maong mga okasyon angay dili mahasupak sa atong mga sukdanan. Ug ang Saksi basin buot mohisgot ngadto sa mga tagbalay nga ang kauban maoy reporter o propesor nga interesado sa pagpaniid kon giunsa nato paghimo ang atong hinungdanong buluhaton sa Bibliya.

Gawas pa, ang Kristohanong mga ginikanan nagadala sa ilang mga anak sa ministeryo bisan pag sila bata pa kaayo o sa ubang paagi dili andam mahimong dili-bawtismadong mga magmamantala. Kining mga ginikanan sa ingon dili magpasagad nga ang ilang mga anak dili maatiman. Ang pagdala kanila sa pagsangyaw sa kanataran nagahatag higayon nga ang mga ginikanan makasulti ngadto sa ilang mga anak mahitungod sa Pulong ug mga dalan sa Diyos samtang sila “nagalakaw sa dalan.” (Deuteronomio 6:4-7) Apan kini maoy bahin sa Kristohanong pamilyahanong kinabuhi, dili kay Saksi nga nagadalag laing tawo ingong maniniid lamang. Siyempre, ang maong ginikananhong pagbansay nagaandam sa mga anak alang sa panahon nga sila magadayeg kang Jehova ingong mga magmamantala.​—Mateo 21:15, 16; itandi ang Organisado sa Pagtuman sa Atong Ministeryo, mga panid 99, 100.

Apan, komosta ang usa ka tawo nga gidumalahan sa usa ka Saksi ug pagtuon sa Bibliya, usa ka tawo nga nagapadulong sa pagkahimong tinun-an? Siya may maayong hinungdan sa pagsulti sa mga paryente, mga kauban sa trabaho, ug uban mahitungod sa “kahibulongang mga butang sa Diyos” nga iyang nakat-onan gikan sa Kasulatan. (Buhat 2:11) Gilaoman, moabot ang punto nga iyang hisabtan ang panginahanglan nga makig-ambit uban sa mga Saksi ni Jehova sa organisadong kahikayan sa “pagmantala sa pulong sa Diyos.”​—Buhat 13:5.

Ang Bantayanang Torre karong bag-o naghan-ay sa nahiangayng mga lakang sa dili pa ang usa ka estudyante mokuyog sa lokal nga mga Saksi sa ministeryo, nga mahimong usa ka dili-bawtismadong magmamantala. Makataronganon lamang nga siya magbatog pasukaranang kahibalo sa Bibliya, makasabot ug mahiuyon sa moral nga mga sukdanan sa Diyos, ug sa personal magtinguha nga moapil sa publikong pag-alagad uban sa mga Saksi ni Jehova. Busa ang duha ka ansiano sa kongregasyon mahimong magbatog makatabang ug makapadasig nga pakig-estorya uban niya nianang mga puntoha ug sa Saksing nagatuon sa Bibliya uban niya.a Kini angay himoon sa dili pa dapiton ang estudyante sa Bibliya sa pagkuyog sa magmamantala sa pagsangyaw sa kanataran aron magdawat ug mauswagong pagbansay.

Hisabtan, sa dihang ang usa ka estudyante mokuwalipikar nga mosangyaw sa kanataran ug dayon mohimo niana sa unang panahon, basin sa pila ka panahon siya buot mokuyog sa magmamantala aron mahibalo kon unsaon paghimo sa aktuwal ang buluhatong pagsangyaw. Ang ministrong kuyog niya basin mohatag ug inanayng pagbansay, sama sa paghangyo nga siya motabang sa makadiyut pinaagi sa pagbasag mga teksto, unya sa nahaigong panahon siya mismo ang manguna sa pagsangyaw ngadto sa tagbalay. Sa maong paagi, siya makahatag sa iyang unang taho sa pagsangyaw sa kanataran sa dihang siya aktuwal nga makig-ambit sa pagsangyaw sa kanataran. Ang iyang progresibong pagbaton ug dakodakong bahin sa buluhaton nahiuyon sa mga pulong ni Jesus: “Ang usa ka tumutuon dili labaw sa iyang magtutudlo, apan ang tanan nga sa hingpit natudloan mahisama sa iyang magtutudlo.”​—Lucas 6:40.

[Mga Footnote]