Tudloi ang Inyong mga Anak sa Pagdayeg Kang Jehova
1. Makadayeg ba kang Jehova ang mga bata?
1 Ang Salmo 148:12, 13 nagdasig sa mga batang lalaki ug babaye sa ‘pagdayeg sa ngalan ni Jehova.’ Ang Kasulatan naundan ug daghang panig-ingnan sa mga bata nga nagbuhat niana. Pananglitan, “si Samuel nag-alagad sa atubangan ni Jehova, samtang bata pa.” (1 Sam. 2:18) “Usa ka batang babaye” ang misulti sa asawa ni Naaman nga ang manalagna ni Jehova sa Israel makaayo sa sanla ni Naaman. (2 Hari 5:1-3) Sa dihang misulod si Jesus sa templo ug mihimog gamhanang mga buhat, “mga batang lalaki” ang naninggit: “Luwasa, kami nagaampo, ang Anak ni David!” (Mat. 21:15) Sa unsang paagi matudloan sa mga ginikanan ang ilang mga anak sa pagdayeg kang Jehova?
2. Nganong hinungdanon nga ang mga ginikanan maghatag ug maayong panig-ingnan sa ilang mga anak?
2 Panig-ingnan: Sa dili pa isilsil sa Israelinhong mga amahan ang kamatuoran nganha sa kasingkasing sa ilang mga anak, sila gitudloan una sa paghigugma kang Jehova ug sa pagbutang sa iyang mga sugo diha sa kaugalingon nilang mga kasingkasing. (Deut. 6:5-9) Kon positibo kang maghisgot bahin sa ministeryo ug himoon mo kining bahin sa imong senemanang eskedyul, ang imong mga anak hayan makiling sa pag-isip sa ministeryo nga hinungdanon ug makapatagbaw.
3. Sa unsang paagi nakabenepisyo ang usa ka sister sa panig-ingnan sa iyang mga ginikanan?
3 May kahimuot nga nahinumdom ang usa ka sister: “Sa bata pa ako, naandan sa among pamilya nga makigbahin sa ministeryo sa kanataran kada hinapos sa semana. Nakita nako nga nalipay gayod ang akong mga ginikanan sa pagsangyaw. Nagdako kami nga nag-isip sa ministeryo ingong usa butang nga makapalipay.” Kini nga sister nahimong di-bawtismadong magmamantala sa edad nga siyete anyos ug ika-33 ka tuig na niya sa bug-os-panahong pag-alagad.
4. Unsay nalangkit sa pagbansay sa mga anak sa anam-anam nga paagi?
4 Anam-anam nga Pagbansay: Iuban ang inyong mga anak samtang makigbahin kamo sa ministeryo. Tingali sila maoy mopislit sa doorbell, mohatag ug tract sa tagbalay, o mobasag usa ka teksto. Kini makapalipay kanila ug makatabang kanila nga mouswag ang ilang katakos sa pagpaambit sa mensahe sa Gingharian. Samtang managko sila, madugangan ang ilang pagpabili sa ministeryo. Busa, tabangi sila sa pag-uswag ug sa paghunahunag mga tumong nga ilang kab-oton aron mouswag ang ilang pag-alagad.
5. Unsay gikinahanglan aron mokuwalipikar ang usa ka bata nga mahimong di-bawtismadong magmamantala?
5 Pakigsultihi dayon ang mga ansiyano kon nagtuo kamo nga ang inyong mga anak kuwalipikado nang mahimong di-bawtismadong magmamantala ug kon moingon sila nga gusto na nilang mahimong di-bawtismadong magmamantala. Ang pagkahimong usa ka magmamantala magsilsil diha kanila sa ilang personal nga kaakohan sa pagdayeg kang Jehova. Hinumdomi nga ang usa ka bata dili kinahanglang mahibalo ug daghang butang sama sa nahibaloan sa mga hamtong aron siya mokuwalipikar. Nakasabot ba ang inyong anak sa pangunang mga pagtulon-an sa Bibliya? Gisunod ba niya ang moral nga mga sukdanan sa Bibliya? Gusto ba niyang makigbahin sa ministeryo ug mailhang usa sa mga Saksi ni Jehova? Kon mao, mahimong tinoon sa mga ansiyano kon kuwalipikado na ba siya nga mahimong di-bawtismadong magmamantala.—Tan-awa ang Organisado Aron Buhaton ang Kabubut-on ni Jehova, p. 79-82.
6. Nganong mapuslanon alang sa mga ginikanan ang pagbansay sa ilang mga anak?
6 Ang pagtudlo sa mga bata sa pagdayeg kang Jehova gikan sa kasingkasing nagkinahanglag paningkamot. Apan, ang pagkakita sa ilang mga anak nga mouswag sa espirituwal mas makapalipay gayod sa mga ginikanan kay sa uban pang mga butang. Labawng hinungdanon, malipay si Jehova kon ang mga bata mosulti bahin sa iyang kahibulongang mga buhat.