Bansaya ang Inyong mga Anak nga Mahimong Ministro
1. Unsay giawhag sa Salmo 148:12, 13 nga himoon sa mga ginikanan?
1 Si Jehova nagdapit sa mga batan-on sa pagdayeg kaniya. (Sal. 148:12, 13) Busa gawas sa pagtudlo sa kamatuoran ug sa moral nga mga balaod sa Diyos, ang Kristohanong mga ginikanan magbansay kanila nga mahimong mga ministro. Sa unsang paagi kini himoon?
2. Sa unsang paagi ang maayong panig-ingnan sa ginikanan makaimpluwensiya sa mga anak?
2 Maayong Panig-ingnan: Gisultihan ni Maghuhukom Gideon ang iyang 300 ka sundalo: ‘Pagkat-on kamo pinaagi sa pagtan-aw kanako.’ (Maghu. 7:17) Sagad ang mga anak maniid ug mosundog sa ilang mga ginikanan. Usa ka amahan ang nagtrabaho sa gabii, apan inay matulog pag-uli niya sa Sabado sa buntag, iyang iuban ang iyang mga anak sa pagsangyaw bisan pag siya gikapoy. Bisan walay pulong, iyang gisilsil nga importante ang pagsangyaw. (Mat. 6:33) Nakita ba sa imong mga anak nga ikaw malipayong nakigbahin sa lainlaing natad sa pagsimba sama sa pag-ampo, pagbasag Bibliya, pagkomento, ug pagsangyaw? Siyempre wala gidahom nga ikaw makapakitag hingpit nga panig-ingnan. Apan mas mosanong ang imong mga anak sa imong pagbansay kon ikaw makugihon sa pagsimba kang Jehova.—Deut. 6:6, 7; Roma 2:21, 22.
3. Unsang espirituwal nga mga tumong ang paningkamotan sa mga ginikanan nga makab-ot sa ilang mga anak?
3 Nahiangayng mga Tumong: Hagoan sa mga ginikanan ang pagbansay sa ilang mga anak sa paglakaw, pagsulti, pagsinina, ug uban pa. Inigdako nila, bag-o na usab nga mga tumong ang ilang kab-oton. Kon Kristohanon ang mga ginikanan, matabangan usab nila ang ilang mga anak sa pagkab-ot ug espirituwal nga mga tumong segun sa ilang edad ug katakos. (1 Cor. 9:26) Imo bang gibansay ang imong mga anak sa pagkomento sa ilang kaugalingong pulong ug sa pag-andam sa ilang bahin sa Teokratikanhong Tunghaan sa Ministeryo? (Sal. 35:18) Imo ba silang gibansay nga makigbahin sa lainlaing natad sa ministeryo? Imo ba silang gidasig nga himoong tumong ang pagpabawtismo ug pag-alagad nga bug-os panahon? Imo ba silang gitabangan nga makig-uban sa malipayon ug dasig nga mga igsoon?—Prov. 13:20.
4. Sa unsang paagi makabenepisyo ang mga anak kon sila bansayon sa ministeryo samtang bata pa?
4 Ang salmista miingon: “Oh Diyos, gitudloan mo ako sukad pa sa akong pagkabatan-on, ug hangtod karon nagpadayon ako pagsaysay sa imong katingalahang mga buhat.” (Sal. 71:17) Bansaya ang imong mga anak nga mahimong mga ministro samtang bata pa. Ang espirituwal nga pundasyon nga imong gitukod makatabang hangtod sa ilang pagkahingkod!—Prov. 22:6.