Unsang mga Tumong ang Imong Gipahimutang Alang sa Imong mga Anak?
1 Ang kalamposan sa kinabuhi nagaagad sa pagpahimutang ug pagkab-ot sa mapuslanong mga tumong. Kini nanginahanglan ug kaalam sa pag-ila kon haing mga tumong ang paninguhaon aron nga “makagunit nga hugot sa tinuod nga kinabuhi.” (1 Tim. 6:19) Pagkamapasalamaton nato nga si Jehova nagapakita gayod kanato sa dalan nga atong subayon!—Isa. 30:21.
2 Si Jehova nagapahimutang ug maayong ehemplo alang sa mga ginikanan. Inay tugotan ang ilang kulang-sa-kasinatiang kabataan sa pagpili kon haing dalan ang labing maayo, ang maalamong mga ginikanan nagabansay kanila sa paagi nga sila angay nga maglakaw, ug sa dihang sila matigulang na, sila “dili mobiya gikan niana.” (Prov. 22:6) Ang Kristohanong mga ginikanan nahibalo gikan sa kasinatian nga kinahanglan silang mosalig kang Jehova. (Prov. 3:5, 6) Kining panginahanglana mas labaw alang sa kabataan, kinsa limitado sa kahibalo ug kasinatian.
3 Ang mga ginikanan mahimong magapahimutang atubangan sa ilang kabataan ug mapuslanong mga tumong nga makatabang nila nga makapunting sa “mas hinungdanong mga butang.” (Filip. 1:10) Sila makasugod pinaagi sa panagtuon sa pamilya, nga nagadasig sa kabataan nga pabilhan kini. Maoy maayo alang sa kabataan nga makab-ot ang batasan sa pagtuon nga abante alang sa mga tigom sa kongregasyon ug pagpangandam sa paghatag ug mga komento diha sa ilang kaugalingong mga pulong. Ang regular nga pakig-ambit sa buluhatong pagsangyaw maoy hinungdanon. Ang mga bata pa gayod mahimong makatampo pinaagi sa pagtanyag ug mga tracts, o mga magasin, o pagbasa ug mga kasulatan. Sa dihang makaarang na sila sa pagbasa, ang pagpatala kanila sa Teokratikanhong Ministeryong Tunghaan mahimong makatabang sa ilang espirituwal nga pag-uswag. Ang pagkahimong takos ingong di-bawtismadong magmamantala o pagkahimong madawat alang sa bawtismo maoy dakong lakang sa pag-uswag.
4 Samtang nagatubo ang ilang kabataan, ang mga ginikanan kinahanglang sa tinud-anay makipaghisgot kanila bahin sa karerang mga tumong. Sayon lang makaimpluwensiya kanila ang mga mananambag sa eskuylahan ug mga eskulmet dapig sa materyalistikanhong mga pangagpas. Ang mga ginikanan kinahanglang mobulig sa ilang kabataan sa pagpili sa mga kurso sa tunghaan nga nagataganag praktikal nga pagbansay, magpasangkap nila sa pag-atiman sa ilang materyal nga mga panginahanglan nga dili masakripisyo ang intereses sa Gingharian. (1 Tim. 6:6-10) Sila mahimong madasig sa pagkab-ot sa “gasa” sa pagkatagsaanon ug unya sa ulahi, kon sila mohukom nga magminyo, sila makaarang na sa pagpas-an sa bug-at nga responsabilidad sa kaminyoon. (Mat. 19:10, 11; 1 Cor. 7:36-38) Ang pakigsulti diha sa positibong paagi bahin sa pagpayunir, mahimong makapatisok sa kabataan bisan sa sayo pang pangedaron sa tinguha sa paggamit sa ilang mga kinabuhi diha sa paagi nga makapahimuot kang Jehova, makabenepisyo sa uban, ug sa ilang kaugalingon.
5 Aduna kita ing daghan kaayong kabatan-onan sa organisasyon karong adlawa kinsa nagapangupot sa hataas Kristohanong pagkahamili ug nagapangab-ot ug teokratikanhong mga tumong. Ang kadaghanan sa ilang kalamposan maoy tungod sa mahigugmaong mga ginikanan. Kon ikaw usa ka ginikanan, asa man kaha ang paingnan sa imong mga anak? Sila ba nagamauswagon ngadto sa kinabuhing napunting sa intereses sa Gingharian? Hinumdomi, ang usa sa labing importanteng mga butang nga imong mahimo mao ang pagsilsil sa kamatuoran diha sa imong mga anak ug pakighisgot niini matag adlaw. Ikaw mahimong mapanalanginan uban sa usa ka panimalay nga matinumanon sa pag-alagad kang Jehova.—Deut. 6:6, 7; Jos. 24:15.