Idasig ang Pangagpas sa Espirituwal nga mga Tumong
1 Wala pa gayod sukad nga may daghan kaayong batan-on nga nakig-ambit sa pagwali sa maayong balita sa Gingharian! Tinagpulo ka libo ang misagop sa tambag sa Ecclesiastes 12:1: “Hinumdomi, karon, ang imong Dakong Maglalalang sa mga adlaw sa imong pagkabatan-on.” Unsa bay nakapatukmod niining mga batan-ona nga makig-ambit sa ministeryo, ug nganong daghan man kaayo kanila ang miapil sa payunir nga pag-alagad?
2 Walay duhaduha daghan ang misundog sa pamatasan sa batan-ong si Timoteo. Ang iyang inahan ug apohang babaye mihatag kaniyag espirituwal nga edukasyon sukad sa pagkamasuso ug midasig kaniya sa pagpangagpas sa espirituwal nga mga tumong. (2 Tim. 3:14, 15) Busa, sa dihang mitungha ang kahigayonan sa dugang mga pribilehiyo sa pag-alagad, siya takos ug andam.—Buh. 16:1-3.
3 Sa unsang paagi madasig ang daghan pang mga batan-on nga mangagpas sa espirituwal nga mga tumong? Unsaon sa mga ginikanan sa pagtukod diha sa ilang mga anak sa apresasyon sa kamatuoran ug pagbulig nila sa pagpahilunag mga tumong sa ilang kaugalingon?
4 Ipahimutang ang Kasulatanhong Pundasyon: Kinahanglang tinoon sa mga ginikanan nga ang ilang gitudlo sa ilang mga anak maoy gikan kang Jehova aron nga ang ilang mga anak mahimong “maalamon alang sa kaluwasan.” (2 Tim. 3:15) Kugihi pag-ayo ang pag-ugmad diha kanila sa lalom nga gugma sa Pulong sa Diyos. Kini nagkinahanglag makanunayon, makahuloganong pagtuon sa Bibliya, uban sa makanunayong pagtambong sa tigom. Ang mga batan-on kinahanglan usab nga adunay kaugalingong programa sa personal nga pagtuon ug mougmad sa ilang kaugalingong relasyon kang Jehova.—1 Tes. 5:21; Heb. 11:1.
5 Ang Kristohanong mga batan-on mas andam nga mangagpas sa espirituwal nga mga intereses kon ang ilang mga ginikanan ug ubang mga hamtong sa kongregasyon magpakitag maayong panig-ingnan ug nagapabanaag sa “kalipay ni Jehova.” (Neh. 8:10) Niining paagiha, kitang tanan makapasundayag ngadto sa mga batan-on nga ang mga kinahanglanon sa matuod nga Kristiyanidad dili mabug-at.—1 Juan 5:3.
6 Daghang mga batan-on ang naimpluwensiyahan pag-ayo sa mga payunir, mga misyonaryo, ug nagapanawng mga magtatan-aw kinsa nagabuhat uban kanila sa pag-alagad sa kanataran o nagadasig kanila. Ang mga ginikanan makaabag pinaagig pagdapit sa maayog panig-ingnang bug-os panahong mga magbubuhat sa ilang panimalay alang sa pagkaon o Kristohanong panag-ubanay. Si Jesu-Kristo mitaganag labing maayong sulondan sa paghatag ug timbang nga pagtagad sa mga batan-on.—Mar. 10:13-16.
7 Pagpahilunag mga Tumong: Uban sa tukmang ginikananhong paggiya, ang mga anak sagad magbutang ug espirituwal nga mga tumong sa ilang kaugalingon sayo sa kinabuhi. Sa dihang ang mga batan-on nakadesider kon unsang espirituwal nga tumong ang buot nilang mabatonan, kon kini ba payunir nga pag-alagad, Bethel o misyonaryong pag-alagad, ang mga ginikanan ug uban pang mga hamtong makadasig kanila nga padayong maningkamot sa ilang tumong, nga nagahatag ug praktikal nga mga sugyot nga makaaghat kanila nga mopadayon.
8 Ang matag kongregasyon maoy samag pamilya. Busa ang matag usa kanato kinahanglang interesado nga mobulig sa mga batan-on nga makapadayong magalakaw sa kamatuoran ug magahimog espirituwal nga kauswagan.