Inadlaw Espirituwal nga Pagkaon—Hinungdanon sa Kristohanong Pamilya
1 “Ang tawo kinahanglang mabuhi, dili sa tinapay lamang, apan sa matag pulong nga nagagula pinaagi sa baba ni Jehova.” (Mat. 4:4) Pagkatinuod nianang mga pulonga! Aron pag-abag nato nga makanunayong magakaon sa Pulong sa Diyos, ang Sosyedad mipatik sa pulyeto nga Pagsusi sa Kasulatan sa Adlaw-adlaw. Ingon nga Kristohanong pamilya, naggahin ba mo ug panahon kada adlaw sa pagpamalandong sa inadlaw nga teksto?
2 Mga Ginikanan Kinahanglang Magahatag ug Panig-ingnan: Tungod sa puliki nga rotina, masayon lang nga ikahiklin ang pagtagad sa teksto, nga magahunahunang mahimo ra kini sa laing panahon. Apan kon ang mga ginikanan mabalak-on sa espirituwal nga panginahanglan sa ilang pamilya, mangita gayod silag panahon nga mobuhat niana sa dihang magkatingob ang pamilya. (Mat. 5:3) Dili lang kay basahon nila ang teksto ngadto sa ilang mga anak apan mopatugbaw usab ug mga puntos diha sa mga komento sa Bantayanang Torre ug hisgotan kon unsay mahimong pagpadapat sa impormasyon ug tambag. Matuod, mahimong nagkinahanglag paningkamot ang pagbatasan niana, apan ang mga kaayohan takos niana. (Itanding Buhat 17:11, 12.) Busa, mga ginikanan, panlimbasog nga makahatag ug maayong panig-ingnan!
3 Kaplaga ang Kombeniyenteng Panahon: Kanus-a man ang labing maayong panahon sa tibuok pamilya nga magtigom alang sa panaghisgot sa teksto? Adunay bentaha diha sa pagsugod sa adlaw pinaagig pagtagad sa usa ka teksto sa Bibliya. Sa Bethel ug misyonaryong mga puy-anan libot sa kalibotan, ang adlaw mosugod uban ang buntagong pagsimba, nga nagalakip sa panaghisgot sa inadlaw nga teksto. Kini nagabulig sa mga igsoon nga may maayong pagsugod ang ilang adlaw, nga nagapamalandong sa mga pahinumdom ni Jehova sa matag adlaw.—Sal. 1:1, 2; Filip. 4:8.
4 Ang Kristohanong mga pamilya sa susama makapulos sa mabuntag nga panaghisgot sa Bibliya. Ang mga anak matabangan sa pag-atubang sa mga hulga sa ilang espirituwalidad sa tunghaan. Kon sa usa ka higayon dili posible sa tibuok pamilya nga mohisgot sa teksto sa tingob, ang mga ginikanan makahimog kapiliang mga kahikayan aron dili masayloan ang maong espirituwal nga pagkaon. Pananglitan, kon ang amahan kinahanglang moadto na sa trabaho una pa makabangon ang mga anak sa buntag, tingali ang inahan makahisgot sa teksto uban sa mga bata. Ang pipila ka pamilya maghisgot sa teksto sa magabii tungod kay magkatingob man unya sila. Ang kada pamilya makahimog eskedyol nga labing haom sa mga kahimtang niini.
5 Ang inadlaw espirituwal nga pagkaon hinungdanon sa Kristohanong pamilya. Ibutang sa unang pagtagad ang inadlaw nga teksto. (Filip. 1:10) Ang paghisgot ug usa ka teksto sa Bibliya kada adlaw makatabang kanato nga malig-ong mangupot sa matarong nga mga prinsipyo ug balaod ni Jehova.