Eskedyul sa Pamilya—Ang Inadlawng Teksto
1 Ang mahigugmaong mga ginikanan manikaysikay gayod matag adlaw sa pagtagana ug makapahimsog nga pagkaon para sa ilang mga anak. Ang pagtagana kanila ug espirituwal nga pagkaon gikan sa Pulong sa Diyos mas pa gayong hinungdanon. (Mat. 4:4) Ang usa ka paagi nga inyong katabangan ang inyong mga anak nga maugmad ang maayong espirituwal nga gana ug “managtubo ngadto sa kaluwasan” mao ang paggahin ug panahon kada adlaw sa pagkonsiderar sa inadlawng teksto ug mga komento ingong pamilya. (1 Ped. 2:2) Kanus-a tingali ninyo kini ikalakip sa inyong eskedyul sa pamilya?
2 Inigpangaon: Ang pagsugod sa inyong adlaw pinaagig paghisgot sa teksto makatabang sa inyong pamilya sa paghunahuna kanunay kang Jehova sa tibuok adlaw. (Sal. 16:8) Usa ka inahan nakahukom sa pagbasa ug paghisgot sa teksto ug mga komento uban sa iyang anak nga lalaki samtang namahaw ang iyang anak ug nag-ampo uban kaniya sa dili pa siya moadto sa eskuylahan. Kini nakapalig-on sa bata nga dili mokompromiso sa pag-atubang sa isyu bahin sa nasyonalismo, sa pagsukol sa imoral nga mga tentasyon, ug sa paghatag ug maisogong pagpamatuod ngadto sa mga estudyante ug sa mga magtutudlo usab. Bisan tuod siya lang ang bugtong Saksi sa eskuylahan, siya wala mobating nag-inusara.
3 Kon dili praktikal ang paghisgot sa teksto sa buntag, mahimong hisgotan ninyo kini ingong pamilya sa ulahing bahin sa adlaw, tingali sa panihapon. Ang uban maghisgot usab ug mga kasinatian gikan sa ministeryo sa kanataran ug mga punto nga ilang nagustohan gikan sa ilang personal nga pagbasa sa Bibliya niining higayona. Daghan ang malipay sa paghandom sa maong mga okasyon nga nag-alirong sa lamesa ingong usa sa labing malipayong mga panahon nga gigugol nga magkauban ingong pamilya.
4 Inigkagabii: Alang sa pipila ka pamilya, ang labing maayong panahon sa paghisgot sa inadlawng teksto maoy sa dili pa matulog. Kini mahimong usa usab ka maayong higayon sa pag-ampo nga magkauban. Samtang ang inyong mga anak adlaw-adlaw nga makabati kaninyo nga nagsulti bahin kang Jehova ug mag-ampo kaniya, siya mahimong tinuod nga persona alang kanila.
5 Hinaot panalanginan ni Jehova ang inyong mga panikaysikay sa pagsilsil sa kamatuoran nganha sa inyong mga anak samtang inyong gamiton pag-ayo ang Pagsusi sa Kasulatan sa Adlaw-Adlaw.