Hatagig Pagtagad ang Pulong ni Jehova sa Matag Adlaw!
1 Ang matag adlaw nagaatubang ug bag-ong mga hagit sa imong pagtuo. Hayan ang usa ka kalibotanong kaila kanunayng magpit-os kanimo sa pagpakigdeyt. Buot sa imong magtutudlo nga ikaw mokuhag sekular nga karera, o buot sa imong amo nga motrabaho ka ug mas daghang oras. Ang imong lawasnong kahimsog basin nagakaluya. Bisan kon ang maong mga pagsulay tingali modangat kanimo sa bisan unsang panahon, ikaw wala mag-inusara. Si Jehova andam nga mohatag kanimo sa kaalam nga gikinahanglan sa pagsagubang niana. Ang pagtagad sa teksto sa Bibliya ug mga komento sa Pagsusi sa Kasulatan maoy usa ka paagi nga ikaw makakaon sa Pulong ni Jehova sa regular nga paagi. Ikaw ba nagpahimulos niining taganaha?
2 Ang Tabang Mabatonan: Ang Isaias 30:20 naghubit kang Jehova ingong ang “Dakong Instruktor” kang kinsa ang katawhan sa Diyos makadangop alang sa tabang. Siya motagana kanimo sa imo gayong gikinahanglan sa pag-atubang sa mga hagit sa imong pagtuo. Sa unsang paagi? Ang sunod nga bersikulo nagsaysay: “Ang imong mga igdulungog makadungog ug pulong sa imong luyo nga mag-ingon: ‘Mao kini ang dalan. Lumakaw kamo niana.’” Karong adlawa, si Jehova nagpadala sa iyang “pulong” pinaagi sa Kasulatan ug sa mga publikasyon sa ‘kasaligan nga ulipon.’ (Mat. 24:45) Sa nangaging mga artikulo lamang sa Bantayanang Torre adunay bahandi sa kaalam, nga naglangkit sa halos tanang bahin sa Kristohanong pagkinabuhi. Ang pagsubli nianang mga gikutlo diha sa Pagsusi sa Kasulatan motabang kanimo sa pagtukod ug bodega sa kahibalo nga hinungdanon sa pagsagubang sa tanang matang sa mga pagsulay.—Isa. 48:17.
3 Gahinig Panahon Alang Niana: Bisan kon ang mga buntag maoy puliking panahon, usa ka inahan mitino niana sa pagbasa ug paghisgot sa teksto ug mga komento uban sa iyang anak nga lalaki samtang siya namahaw. Kining mga pulonga duyog sa pag-ampo mao ang kataposang mga pulong nga iyang napatalinghogan sa matag buntag sa dili pa moadto sa eskuylahan. Kini nagpalig-on kaniya sa pagsukol sa seksuwal nga mga aghat, sa paghupot ug walay-pagkompromisong baroganan batok sa nasyonalismo, ug sa paghatag ug maisogong pamatuod ngadto sa mga estudyante ug mga magtutudlo. Bisan tuod siya lamang ang Saksi sa eskuylahan, siya wala gayod mobating mag-inusara.
4 Salig kang Jehova ug sa iyang Pulong alang sa pagtultol ug paggiya. Kon ikaw mobuhat sa ingon, siya mahimong tinuod alang kanimo, sama sa usa ka kasaligan nga higala. Dangop kaniya sa matag adlaw! Kauban sa milyonmilyon sa tibuok kalibotan kinsa sa adlaw-adlaw nagakonsulta sa Pulong sa Diyos, hinaot nga imong makaplagan nga ang imong mga mata mahimong “mga mata nga makakita sa imong Dakong Instruktor.”