Ang mga Kangaya sa Bug-os-Panahong Pag-alagad
1 Ingong usa ka batan-on, sa walay duhaduha ikaw naghunahuna bahin sa imong kaugmaon. Ang Proverbio 21:5 nagtug-an kanato nga “ang mga plano sa kugihan mosangpot gayod sa kaayohan.” Maoy alang sa imong kaayohan ang paghatag ug ugdang nga hunahuna sa imong mga tumong sa kinabuhi. Samtang himoon mo ang imong mga plano alang sa umaabot, tagda ang pagsulod sa bug-os-panahong pag-alagad. Ngano man?
2 Suknaa ang pipila ka hamtong nga nagpayunir sa katuigan sa ilang pagkabatan-on kon unsay ilang mga impresyon ug sa di-mabalhinon sila moingon sa samang butang: “Mao kadto ang labing maayong mga tuig sa akong kinabuhi!” Usa ka igsoong lalaki kinsa nakasinati sa mga kangaya sa bug-os-panahong pag-alagad sukad sa iyang pagkabatan-on miingon sa kaulahian: “Kana usa ka tinubdan sa dulot nga katagbawan nga handomon ang panahon sa pagkabatan-on ug makaarang sa pag-ingon nga ang usa nagpatalinghog sa maalamong tambag: ‘Hinumdomi, karon, ang imong Dakong Maglalalang sa mga adlaw sa imong pagkabatan-on.’” (Eccl. 12:1) Nagkinahanglan kinig maayong pagplano karon, pinaagi kanimo ug sa imong mga ginikanan, sa paghimog paagi aron masinati mo kining matanga sa kangaya sa imong pagkabatan-on.
3 Mga Ginikanan, Idasig ang Bug-os-Panahong Pag-alagad: Si Jehova, ingong mahigugmaong Amahan, nagpakita gayod kaninyo sa dalan nga subayon. (Isa. 30:21) Sa pagtagana sa maong mahigugmaong giya, siya naghatag ug maayong panig-ingnan kaninyo ingong Kristohanong mga ginikanan. Inay itugyan sa inyong mga anak ang pagpili kon unsang dalana ang labing maayo alang kanila, maalamong bansaya sila sa dalan nga angay nilang subayon aron ilang mabatonan ang panalangin ni Jehova. Unya, sa dihang modako na sila, ang inyong pagbansay motabang kanila sa “pag-ila sa maayo ug sa daotan.” (Heb. 5:14) Ang mga hamtong nahibalo gikan sa kasinatian nga sila dili makasalig sa ilang kaugalingong panghukom; sila kinahanglang mosalig kang Jehova sa pagtul-id sa ilang alagianan. (Prov. 3:5, 6) Kini nga panginahanglan mas dako pa gani alang sa mga batan-on, kinsa wala kaayoy kasinatian sa kinabuhi.
4 Mga ginikanan, samtang hapit nang matin-edyer ang inyong mga anak, o bisag sayosayo pa niana, pakigsultihi sila sa matinuorong paagi bahin sa ilang mga tumong nga karera. Ang mga magtatambag sa eskuylahan, mga magtutudlo, ug mga klasmet mosulay sa pag-impluwensiya kanila nga pilion ang kalibotanon, materyalistikanhon nga mga pangagpas. Tabangi ang inyong mga anak sa pagpilig mga kurso sa tunghaan nga makahatag ug praktikal nga pagbansay, nga magsangkap kanila sa pagtagana sa ilang materyal nga mga panginahanglan nga dili magsakripisyo sa intereses sa Gingharian. (1 Tim. 6:6-11) Sa daghang kaso, ang hayskul nga edukasyon nga dinuyogan sa bokasyonal nga pagbansay ug/o pagbansay diha sa trabahoan mahimong mao ray gikinahanglan aron igong matagan-an ang mga panginahanglan sa usa samtang mosugod sa regular payunir nga ministeryo.
5 Dasiga ang mga batan-on nga pangagpason ang gasa sa pagkatagsaanon. Kon sa ulahi makahukom sila sa pagminyo, sila mahimong anaa na sa mas maayong kahimtang sa pag-abaga sa mas bug-at nga mga kaakohan sa kaminyoon. (Tan-awa ang parapo 19 diha sa Hunyo 2001 nga Atong Ministeryo sa Gingharian sa pasukip nga “Makaboluntaryo Ka Ba?”) Pinaagi sa pagsulti nga positibo bahin sa pagpayunir, pag-alagad diin mas dako ang panginahanglan, pag-alagad sa Bethel, ug misyonaryong buluhaton, isilsil diha sa mga batan-on bisan sa sayong panuigon ang tinguha sa paggamit sa ilang mga kinabuhi sa paagi nga makapahimuot kang Jehova, makahatag kaayohan sa uban, ug magdalag kangaya sa ilang kaugalingon.
6 Mga Batan-on, Unaha ang Bug-os-Panahong Pag-alagad: Mga batan-on, dili kinahanglang matingala kamo kon unsang matanga sa buluhaton ang pagpayunir. Masulayan ninyo kini sa di-bug-os-panahong paagi pinaagig pag-oksilyare payunir kon posible sa tibuok tuig sa pagtungha ug sa panahong tingbakasyon. Unya inyong mahibaloan kon unsa ka makapatagbaw ang payunir nga pag-alagad! Makaplano ba kamo nga abante sa pag-oksilyare payunir tali karon ug sa kataposan sa ting-init?
7 Kon ikaw usa ka batan-ong igsoong lalaki sa organisasyon sa Diyos, hunahunaa usab pag-ayo ang bahin sa pagpangab-ot nga mahimong takos ingong ministeryal nga alagad. (1 Tim. 3:8-10, 12) Dugang pa, hukmi kon buot ba nimong moaplay alang sa pag-alagad sa Bethel o motungha sa Ministerial Training School sa dihang ikaw anaa na sa hustong pangedaron. Ang imong kasinatian diha sa payunir nga ministeryo magtudlo kanimog bililhong mga leksiyon, sama sa kon unsaon sa pagkinabuhi sumala sa eskedyul, kon unsaon sa pagpauswag sa imong personal nga organisasyon, kon unsaon nga ikasinabot ang uban, ug kon unsaon sa pag-ugmad sa pagbati sa responsabilidad. Kining tanan mag-andam kanimo alang sa mas dagkong mga pribilehiyo sa pag-alagad sa ulahi.
8 Ang hinungdanong butang aron magmalamposon diha sa bug-os-panahong pag-alagad mao ang pagpasundayag ug makugihong espiritu maylabot sa teokratikanhong mga butang. Si apostol Pablo nagdasig nga huptan ang maong tinamdan, ug gipunting niya ang mga panalangin nga mahimong moresulta: “Bisan unsay inyong ginabuhat, buhata kini nga tibuok-kalag ingon nga alang kang Jehova, . . . kay kamo nahibalo nga inyong dawaton gikan kang Jehova ang nahiangayng ganti.” (Col. 3:23, 24) Hinaot si Jehova magapanalangin kanimo uban sa daghang kangaya diha sa bug-os-panahong pag-alagad!