Mga Ginikanan—Bansaya ang Inyong mga Anak Sukad sa Pagkamasuso
1 “Bansaya ang bata subay sa dalan nga alang kaniya; bisan kon siya matigulang na dili siya motipas gikan niana.” (Prov. 22:6) Mga ginikanan, kon dili ninyo buot nga ang inyong mga anak “motipas gikan” sa dalan sa kamatuoran, kanus-a man angayng sugdan ang maong pagbansay? Sukad sa pagkamasuso!
2 Sa dihang miingon si Pablo nga ang espirituwal nga edukasyon ni Timoteo maoy “gikan sa pagkamasuso,” dayag nga gipasabot niya ang pagkagamayng bata. (2 Tim. 3:14, 15) Ingong resulta, si Timoteo nahimong ekselenteng espirituwal nga tawo. (Filip. 2:19-22) Mga ginikanan, kamo usab angayng mosugod “gikan sa pagkamasuso” aron ikahatag sa inyong mga anak ang pagbansay nga ilang gikinahanglan sa “pagdako sa atubangan ni Jehova.”—1 Sam. 2:21.
3 Itagana ang Tubig nga Ilang Gikinahanglan Aron Motubo: Maingon nga ang bag-ong mga turok nagkinahanglag makanunayong abiyo sa tubig aron motubo ingong habog nga mga kahoy, ang mga bata sa tanang panuigon kinahanglang matuhop sa tubig sa kamatuoran sa Bibliya aron motubo ingong hamtong nga mga alagad sa Diyos. Ang pangunang paagi sa pagtudlo sa mga bata sa kamatuoran ug sa pagtabang kanila nga masuod si Jehova maoy pinaagi sa regular, pamilyahanon nga pagtuon sa Bibliya. Apan mga ginikanan, tagda ang lugway sa pagtagad sa matag bata. Alang sa gagmayng mga bata, lagmit ang subsob nga mugbong mga sesyon sa pagtudlo mas epektibo kay sa panagsa nga dugayng mga yugto.—Deut. 11:18, 19.
4 Ayaw gayod pakamenosa ang katakos sa inyong mga anak nga makakat-on. Suginli silag mga estorya bahin sa mga tawo sa Bibliya. Ipadibuho kanila ang mga hulagway sa talan-awon sa Bibliya o ipaaksiyon ang mga hitabo sa Bibliya. Gamitag maayo ang atong mga video ug mga audiocassette, lakip ang mga drama sa Bibliya. Ipahiuyon ang pagtuon sa pamilya ngadto sa mga edad ug mga katakos sa pagkat-on sa inyong mga anak. Ang unang pagbansay mahimong paninugdan, nga tinagidyot; apan sa nagkadako na ang bata, ang iyang pagbansay angay nga mahimong mas malukpanon ug progresibo. Himoang buhi ug dili puol ang instruksiyon sa Bibliya. Buot ninyong ang inyong mga anak ‘mangandoy’ sa Pulong, busa himoang makalingaw ang pagtuon kutob sa inyong maarangan.—1 Ped. 2:2.
5 Ilangkit Sila sa Kongregasyon: Paghimog progresibong mga tumong alang sa inyong mga anak aron bug-os silang malangkit sa kongregasyon. Unsa kaha ang una nilang tumong? Ang mga ginikanan sa duha ka gagmayng mga anak miingon: “Gisugdan nilang duha pagdawat ang pagbansay sa paglingkod nga hilom diha sa Kingdom Hall.” Sa ulahi, tabangi ang mga bata nga mokomento sa mga tigom sa ilang kaugalingong mga pulong ug himoon nilang tumong nga magpalista sa Teokratikanhong Tunghaan sa Ministeryo. Diha sa pag-alagad sa kanataran, ang maayong mga tumong nga kab-oton mao ang pagtanyag ug tract diha sa pultahan, pagbasag usa ka teksto, pagtanyag ug magasin, ug paglangkit sa mga tagbalay diha sa makahuloganong mga panaghisgot.
6 Paghatag ug Madasigong Panig-ingnan: Ang inyo bang mga anak makabati ninyo adlaw-adlaw nga mosulti bahin kang Jehova ug moampo kaniya? Nakita ba nila kamo nga nagtuon sa iyang Pulong, motambong sa mga tigom, makig-ambit sa ministeryo sa kanataran, ug malipayon sa pagbuhat sa kabubut-on sa Diyos? (Sal. 40:8) Mahinungdanon nga ilang makita kana ug magkahiusa kamo sa pagbuhat niining mga butanga. Usa ka hingkod na nga anak nga babaye miingon bahin sa iyang inahan, kinsa nakamatuto ug unom ka anak nga nahimong matinumanong mga Saksi: “Ang nakapadayeg namo mao ang panig-ingnan mismo ni Mama—kadto kusog pang misulti kay sa mga pulong.” Usa ka ginikanan nga may upat ka anak nag-ingon: “‘Si Jehova maoy una sa among kinabuhi’ dili lamang kasagarang panultihon kondili mao ang paagi sa among pagkinabuhi.”
7 Mga ginikanan, sugdig sayo ang pagbansay sa inyong mga anak, nga magtudlo kanila sa kamatuoran gikan sa Pulong sa Diyos, nga maghimog progresibong mga tumong, ug maghatag sa labing maayong panig-ingnan kutob sa mahimo. Magmalipayon kamo nga gibuhat ninyo kanang mga butanga!