KAPITULO 8
Mga Ministro sa Maayong Balita
SI Jehova naghatag natog hingpit nga sulondan—ang iyang Anak, si Jesu-Kristo. (1 Ped. 2:21) Dihang ang usa mahimong sumusunod ni Jesus, siya magsangyaw sa maayong balita ingong usa sa mga ministro sa Diyos. Aron ipakita nga kini makapalagsik sa espirituwal, si Jesus miingon: “Ari kamo kanako, kamong tanang gikapoy ug nabug-atan, ug ako magpalagsik kaninyo. Isangon ang akong yugo ug pagkat-on gikan kanako kay ako malumo ug mapainubsanon, ug kamo mobatig kahayahay.” (Mat. 11:28, 29) Gituman gyod niya ang iyang saad alang niadtong midawat niana nga imbitasyon!
2 Ingong Pangulong Ministro sa Diyos, gidapit ni Jesus ang pipila aron mahimong iyang mga sumusunod. (Mat. 9:9; Juan 1:43) Siya nagbansay kanila sa ministeryo ug nagpadala kanila aron buhaton ang samang buluhaton nga iyang gihimo. (Mat. 10:1–11:1; 20:28; Luc. 4:43) Sa ulahi, siya nagpadalag dugang 70 ka tinun-an aron magmantala sa maayong balita sa Gingharian sa Diyos. (Luc. 10:1, 8-11) Dihang gipalakaw na sila ni Jesus, siya miingon kanila: “Siya nga namati kaninyo namati usab kanako. Ug siya nga nagsalikway kaninyo nagsalikway usab kanako. Dugang pa, siya nga nagsalikway kanako, nagsalikway usab Kaniya nga nagpadala kanako.” (Luc. 10:16) Gipasiugda dinhi ni Jesus ang kaseryoso sa responsibilidad nga gihatag ngadto sa mga tinun-an. Sila magrepresentar kang Jesus ug sa Labing Hataas nga Diyos! Kana sab ang responsibilidad karon sa tanan nga modawat sa imbitasyon ni Jesus: “Kuyog nako ug mahimong akong sumusunod.” (Luc. 18:22; 2 Cor. 2:17) Sila gisugo sa Diyos sa pagwali sa maayong balita sa Gingharian ug sa paghimog mga tinun-an.—Mat. 24:14; 28:19, 20.
3 Kay atong gidawat ang imbitasyon ni Jesus nga mahimong iyang sumusunod, gipanalanginan ta nga ‘mailhan’ si Jehova ug si Jesu-Kristo. (Juan 17:3) Natudloan ta sa mga dalan ni Jehova. Sa tabang niya, nabag-o nato ang atong hunahuna, nasul-ob ang bag-ong personalidad, ug napahiuyon nato ang atong panggawi sa matarong nga mga sukdanan ni Jehova. (Roma 12:1, 2; Efe. 4:22-24; Col. 3:9, 10) Tungod sa atong kinasingkasing nga pagpasalamat, atong gidedikar ang atong kinabuhi kang Jehova ug gisimbolohan kini pinaagig bawtismo sa tubig. Dihang kita nabawtismohan, kita nahimong ordinadong mga ministro.
4 Hinumdomi kanunay nga sa atong pag-alagad sa Diyos, kinahanglang hinlo ang atong panggawi ug putli ang atong kasingkasing. (Sal. 24:3, 4; Isa. 52:11; 2 Cor. 6:14–7:1) Pinaagi sa pagtuo kang Jesu-Kristo, kita nakabaton ug hinlong konsensiya. (Heb. 10:19-23, 35, 36; Pin. 7:9, 10, 14) Gitambagan ni apostol Pablo ang mga Kristohanon nga buhaton ang tanan alang sa kahimayaan sa Diyos aron dili makapandol sa uban. Gihisgotan ni apostol Pedro ang kahinungdanon sa maayong panggawi aron ang mga dili magtutuo makabig sa kamatuoran. (1 Cor. 10:31, 33; 1 Ped. 3:1) Unsaon nimo pagtabang ang usa aron mokuwalipikar ingong ministro sa maayong balita?
BAG-ONG MGA MAGMAMANTALA
5 Sa pagsugod pa lang nimog dumala ug pagtuon sa Bibliya sa usa ka interesado, dasiga na siya nga isulti sa uban ang iyang nakat-onan. Puwede niya kining isulti sa iyang mga paryente, higala, kauban sa trabaho, ug sa uban sa impormal nga paagi. Hinungdanon kini nga lakang sa pagtudlo sa mga bag-ohan nga mahimong sumusunod ni Jesu-Kristo ingong ministro sa maayong balita. (Mat. 9:9; Luc. 6:40) Samtang ang bag-ohan mouswag sa espirituwal ug mabansay sa impormal nga pagsangyaw, seguradong sa ulahi gusto na niyang makigbahin sa ministeryo.
PAGKAB-OT SA MGA KINAHANGLANON
6 Sa dili pa nimo dasigon ang usa nga mokuyog sa pagpamalaybalay sa unang higayon, kinahanglang seguroon nimo nga nakab-ot niya ang mga kuwalipikasyon. Ang usa nga mokuyog nato sa ministeryo nagpaila sa publiko nga siya kauban na sa mga Saksi ni Jehova. Kini nagpakita nga nagkinabuhi na siya uyon sa matarong nga mga sukdanan ni Jehova ug puwede nang mahimong dili bawtismadong magmamantala.
7 Samtang imo siyang ginatun-an sa Bibliya ug ginahisgotan ninyo ang mga prinsipyo niini, lagmit nahibalo na ka sa iyang mga kahimtang. Tingali imong nakita nga iya nang gipadapat ang iyang nakat-onan. Pero dunay pipila ka butang bahin sa kinabuhi sa estudyante nga gustong ipakighisgot sa mga ansiyano uban ninyong duha.
8 Hikayon sa koordinetor sa mga ansiyano nga may duha ka ansiyano (ang usa membro sa komite sa pag-alagad) nga makighisgot niining mga butanga uban nimo ug sa imong estudyante sa Bibliya. Sa mga kongregasyon nga diyutay ra kaayog ansiyano, puwede kining himoon sa usa ka ansiyano ug sa takos nga ministeryal nga alagad. Ang mga brader nga giasayn angayng maningkamot nga mahimo dayon kini. Gani, kon panahon sa tigom mahibaloan nila nga gusto nang mouban sa pagsangyaw ang estudyante, mahimo tingali ka nilang estoryahon uban sa imong estudyante human sa tigom. Kinahanglang relaks lang ang panaghisgot. Sa dili pa siya aprobahan ingong dili bawtismadong magmamantala, kinahanglang makab-ot kini:
(1) Siya nagtuo nga ang Bibliya mao gayod ang Pulong sa Diyos.—2 Tim. 3:16.
(2) Siya nahibalo ug nagtuo sa pangunang mga pagtulon-an sa Kasulatan aron nga dihang siya pangutan-on, siya motubag sumala sa Bibliya ug dili sumala sa bakak nga relihiyosong mga pagtulon-an o sa iyang kaugalingong mga ideya.—Mat. 7:21-23; 2 Tim. 2:15.
(3) Gisunod niya ang sugo sa Bibliya nga makig-uban sa katawhan ni Jehova diha sa mga tigom sa kongregasyon kon siya makahimo niini.—Sal. 122:1; Heb. 10:24, 25.
(4) Nahibalo siya kon unsay gitudlo sa Bibliya bahin sa seksuwal nga imoralidad, lakip sa pagpanapaw, poligamiya, ug homoseksuwalidad, ug nagkinabuhi siya sumala sa maong mga pagtulon-an. Kon siya lalaki nga nakigpuyo sa usa ka babaye o babaye nga nakigpuyo sa usa ka lalaki nga dili niya paryente, sila kinahanglang legal nga nakasal.—Mat. 19:9; 1 Cor. 6:9, 10; 1 Tim. 3:2, 12; Heb. 13:4.
(5) Siya nagsunod sa sugo sa Bibliya nga dili maghuboghubog ug naglikay sa paggamit ug makaadik o makadaot sa hunahuna nga mga substansiya, natural man o artipisyal, sa dili medikal nga katuyoan.—2 Cor. 7:1; Efe. 5:18; 1 Ped. 4:3, 4.
(6) Nasabtan niya nga hinungdanon ang paglikay sa dili maayong mga kauban.—1 Cor. 15:33.
(7) Siya bug-os nang mibulag ingong membro sa bisan unsang organisasyon sa bakak nga relihiyon. Siya wala na motambong sa ilang mga serbisyo ug wala na mosuportar sa ilang mga kalihokan.—2 Cor. 6:14-18; Pin. 18:4.
(8) Siya wala na mag-apil-apil sa bisan unsang kalihokan sa politika.—Juan 6:15; 15:19; Sant. 1:27.
(9) Siya wala na malangkit sa kalihokan sa militar ug nagpabiling neyutral sa panag-away sa mga nasod.—Isa. 2:4.
(10) Gusto gyod niyang mahimong Saksi ni Jehova.—Sal. 110:3.
9 Kon ang mga ansiyano dili segurado sa hunahuna sa estudyante sa bisan asa niining mga butanga, pangutan-on nila siya, tingali pinaagi sa paggamit sa mga tekstong gisitar ingong basehanan sa panaghisgot. Importanteng masabtan niya nga kadtong mouban sa mga Saksi ni Jehova sa pagsangyaw kinahanglang magkinabuhi uyon niana nga mga sukdanan sa Bibliya. Pinaagi sa iyang mga tubag, matino sa mga ansiyano kon siya ba nahibalo kon unsay gidahom kaniya ug kon siya ba kuwalipikado nang mouban sa pagsangyaw.
10 Kinahanglang pahibaloon dayon sa mga ansiyano ang estudyante kon siya ba mikuwalipikar. Sagad, pahibaloon nila ang estudyante sa hapit nang matapos ang panaghisgot. Kon siya kuwalipikado, ang mga ansiyano kinasingkasing nga magdawat kaniya ingong usa ka magmamantala. (Roma 15:7) Kinahanglang dasigon siya nga mouban na dayon sa ministeryo ug mohatag sa iyang report sa pag-alagad sa kanataran sa kataposan sa bulan. Ipatin-aw sa mga ansiyano nga dihang ang estudyante sa Bibliya kuwalipikado na ingong dili bawtismadong magmamantala ug moreport sa unang higayon, himoan siyag Congregation’s Publisher Record ug ilakip kana sa payl sa kongregasyon. Ang mga ansiyano mangayog personal nga impormasyon sa magmamantala aron maatiman sa organisasyon ang relihiyosong mga kalihokan sa mga Saksi ni Jehova sa tibuok kalibotan ug aron ang magmamantala makapakigbahin sa espirituwal nga mga buluhaton ug makadawat ug espirituwal nga tabang. Dugang pa, pahinumdoman sa mga ansiyano ang bag-ong magmamantala nga ang bisan unsang personal nga impormasyon gamiton sumala sa Tibuok Kalibotang Polisa sa mga Saksi ni Jehova Bahin sa Pagprotektar ug Impormasyon nga naa sa jw.org.
11 Dihang makigsuod ta sa bag-ong magmamantala ug pabilhan nato ang iyang mga nalampos, kini dunay maayong epekto kaniya. Madasig siya nga regular nga moreport ug mas maningkamot sa pag-alagad kang Jehova.—Filip. 2:4; Heb. 13:2.
12 Dihang matino sa mga ansiyano nga ang estudyante sa Bibliya kuwalipikado nang mouban sa ministeryo, siya hatagag kopya sa librong Organisado Aron Buhaton ang Kabubut-on ni Jehova. Human siya makareport sa iyang pag-alagad sa kanataran sa unang higayon, ipahibalo diha sa kongregasyon nga siya usa na ka dili bawtismadong magmamantala.
PAGTABANG SA KABATAAN
13 Ang mga bata mahimong mokuwalipikar sab ingong mga magmamantala sa maayong balita. Si Jesus ganahag mga bata ug gipanalanginan niya sila. (Mat. 19:13-15; 21:15, 16) Bisan tuod ang mga ginikanan ang may pangunang responsibilidad sa ilang mga anak, ang uban sa kongregasyon makatabang sab sa mga bata nga gusto gyong makigbahin sa pagsangyaw. Kon ikaw usa ka ginikanan, ang imong maayong panig-ingnan sa ministeryo makadasig gyod sa imong mga anak nga magmakugihon sa ilang pag-alagad sa Diyos. Dihang ang usa ka bata nga sulondan sa iyang panggawi gusto nang mosangyaw sa uban bahin sa iyang gituohan, unsay dugang nga ikatabang kaniya?
14 Maayong duolon sa ginikanan ang usa sa mga ansiyano nga membro sa Komite sa Pag-alagad sa Kongregasyon aron hisgotan kon ang bata kuwalipikado na ba nga mahimong magmamantala. Ang koordinetor sa mga ansiyano mag-asayn ug duha ka ansiyano (ang usa membro sa komite sa pag-alagad) nga makig-estorya sa bata ug sa iyang magtutuong (mga) ginikanan o guardian. Kon ang bata naay pangunang kahibalo sa kamatuoran sa Bibliya ug makita diha kaniya nga gusto niyang makigbahin sa ministeryo, kini ilhanan sa maayong pag-uswag. Human kini mahisgoti ug ang uban pang kinahanglanon nga parehas nianang para sa mga adulto, desisyonan sa duha ka ansiyano kon ang bata kuwalipikado ba ingong dili bawtismadong magmamantala. (Luc. 6:45; Roma 10:10) Dihang makig-estorya sa bata, dili kinahanglang iapil ang mga butang nga dili maaplikar kaniya, sama nianang sagad hisgotan uban sa mga adulto.
15 Panahon sa pagpakig-estorya, komendahan sa mga ansiyano ang bata sa iyang pag-uswag ug dasigon siya nga himoong tumong ang pagpabawtismo. Kay ang mga ginikanan nagkugi nga masilsil ang kamatuoran diha sa ilang anak, angay sab silang komendahan. Aron magiyahan ang mga ginikanan nga dugang nga matabangan ang ilang anak, angayng dasigon sila sa mga ansiyano nga basahon ang “Mensahe Alang sa Kristohanong mga Ginikanan,” sa panid 179-181.
DEDIKASYON UG BAWTISMO
16 Kon imo nang nailhan ug gihigugma si Jehova pinaagi sa pagkab-ot sa iyang mga kinahanglanon ug sa pagpakigbahin sa ministeryo, kinahanglang palig-onon pa nimo ang imong relasyon kaniya. Sa unsang paagi? Pinaagi sa pagdedikar sa imong kinabuhi kaniya ug pagsimbolo niana pinaagi sa bawtismo sa tubig.—Mat. 28:19, 20.
17 Ang dedikasyon nagkahulogan ug paglain alang sa usa ka sagradong katuyoan. Ang paghimog dedikasyon ngadto sa Diyos nagpasabot nga moampo ka kaniya ug sinserong manaad nga gamiton nimo ang imong kinabuhi sa pag-alagad kaniya ug pagsubay sa iyang mga dalan. Nagkahulogan kini nga siya lang ang imong hatagan ug eksklusibong debosyon hangtod sa hangtod. (Deut. 5:9) Personal ug pribado kini nga butang. Walay laing makahimo niini alang kanimo.
18 Pero labaw pa ang gikinahanglan kay sa pagsulti lang kang Jehova sa pribado nga gusto kang mahimong iyang alagad. Kinahanglan nimong ipakita sa uban nga imo nang gidedikar ang imong kaugalingon sa Diyos. Mapadayag nimo kini pinaagi sa pagpabawtismo sa tubig, sama sa gihimo ni Jesus. (1 Ped. 2:21; 3:21) Kon nakadesisyon na ka sa pag-alagad kang Jehova ug gustong magpabawtismo, unsay angay nimong himoon? Ipahibalo kana sa koordinetor sa mga ansiyano. Siya mag-asayn ug mga ansiyano nga makig-estorya kanimo aron matino kon nakab-ot ba nimo ang mga kuwalipikasyon sa Bibliya alang sa bawtismo. Alang sa dugang impormasyon, palihog repasoha ang “Mensahe Alang sa Dili Bawtismadong Magmamantala,” sa panid 182-184 niini nga publikasyon, ug ang “Mga Pangutana Alang sa Gustong Magpabawtismo,” panid 185-207.
REPORT BAHIN SA PAG-USWAG SA MINISTERYO
19 Latas sa katuigan, ang mga report bahin sa pag-uswag sa putling pagsimba sa tibuok kalibotan nakapadasig sa katawhan ni Jehova. Sukad nga gisulti ni Jesu-Kristo sa iyang mga tinun-an nga ang maayong balita iwali sa tibuok yuta, ang tinuod nga mga Kristohanon interesado kaayong mahibalo kon sa unsang paagi kini mapalampos.—Mat. 28:19, 20; Mar. 13:10; Buh. 1:8.
20 Ang unang mga sumusunod ni Jesus nalipay sa pagkadungog sa mga report bahin sa kalamposan sa buluhatong pagsangyaw. (Mar. 6:30) Ang basahon sa Mga Buhat nag-ingon nga dihay mga 120 ka tinun-an nga presente dihang gibubo ang balaang espiritu sa Pentekostes 33 C.E. Wala madugay, ang gidaghanon sa mga tinun-an miabot nag mga 3,000 ug sa ulahi mga 5,000. Dihay report nga “adlaw-adlawng gidugang ni Jehova kanila kadtong iyang mga ginaluwas” ug “daghang saserdote ang nahimong magtutuo.” (Buh. 1:15; 2:5-11, 41, 47; 4:4; 6:7) Seguradong nadasig gayod ang mga tinun-an sa pagkadungog sa maong pag-uswag! Sa walay duhaduha, kining makapalipayng mga report nakapalihok kanila nga padayong buhaton ang gisugo sa Diyos, bisan pa sa grabeng paglutos nga gipahinabo sa Hudiyong mga lider sa relihiyon!
21 Sa mga 60-61 C.E., gireport ni Pablo sa iyang sulat para sa mga taga-Colosas nga ang maayong balita “namunga ug nag-uswag sa tibuok kalibotan” ug “gisangyaw sa tibuok kalibotan.” (Col. 1:5, 6, 23) Ang mga Kristohanon sa unang siglo nagmasinugtanon sa Pulong sa Diyos, ug ang balaang espiritu mitabang kanila sa pagpalampos sa dako kaayo nga buluhatong pagsangyaw sa dili pa matapos ang Hudiyohanong sistema sa mga butang niadtong 70 C.E. Seguradong nadasig ang matinumanong mga Kristohanon dihang ilang nadunggan ang mga report sa kon unsay nalampos!
Ikaw ba interesado sa kalamposan sa ministeryo sa dili pa moabot ang kataposan?
22 Sa susama, ang organisasyon ni Jehova karon naningkamot sa paghupot ug mga rekord sa pagsangyaw ingong katumanan sa Mateo 24:14, nga nag-ingon: “Kining maayong balita sa Gingharian isangyaw sa tibuok yuta sa pagpamatuod ngadto sa tanang kanasoran, ug unya moabot ang kataposan.” Ingong dedikadong mga alagad sa Diyos, kita dunay dinaliang buluhaton. Kinahanglang kita mismo interesado sa bug-os nga kalamposan sa ministeryo sa dili pa moabot ang kataposan. Seguroon ni Jehova nga matapos kini nga buluhaton, ug kon makigbahin ta niini, atong mabatonan ang iyang pag-uyon.—Ezeq. 3:18-21.
IMONG REPORT SA PAG-ALAGAD SA KANATARAN
23 Unsa man gyoy atong iapil sa report? Makita diha sa Field Service Report slip nga gitagana sa organisasyon kon unsay atong ireport. Pero makatabang ang mosunod nga mga impormasyon.
24 Ubos sa “Placements (Printed and Electronic),” ireport ang total sa publikasyon—inimprenta o electronic—nga imong natanyag o napasa sa mga dili bawtismadong Saksi. Ubos sa “Video Showings,” ireport kon kapila nimo gipatan-aw ang usa sa atong mga video.
25 Sa pagreport ug “Return Visits,” ihapa ang total nga balikduaw nga imong gihimo aron mahaling ang interes nga gipakita sa usa nga dili dedikado, bawtismadong Saksi. Ang pagbalikduaw puwedeng himoon nga personal, pinaagig pagsulat, pagtawag sa telepono, pag-text o pag-email, o paghatod ug publikasyon. Sa matag higayon nga himoon ang pagdumalag pagtuon sa Bibliya, kini puwedeng ireport nga usa ka balikduaw. Ang ginikanan makareport ug usa ka balikduaw matag semana dihang magdumalag pamilyahanong pagsimba uban sa dili bawtismadong anak.
26 Bisan tuod ang pagtuon sa Bibliya kasagarang dumalahon kada semana, kana ireport ingong usa lang ka Bible study kada bulan. Kinahanglang isulat sa mga magmamantala kon pila ka lainlaing Bible study ang ilang gidumala sulod sa usa ka bulan. Lakip sa ireport nga Bible study ang pagdumalag pagtuon ngadto sa mga dili dedikado, bawtismadong Saksi. Ikareport sab ingong Bible study ang gidumalahan nimog pagtuon nga usa ka dili aktibong igsoon nga giasayn kanimo sa membro sa komite sa pag-alagad o bag-ong bawtismo nga wala pa mahuman ug tuon sa librong Mabuhi Ka Hangtod sa Hangtod!
27 Hinungdanon nga tukma ang imong ireport diha sa “Hours.” Kini ang oras nga imong igugol sa pagpamalaybalay, pagbalikduaw, pagdumalag pagtuon sa Bibliya, o pagsangyaw sa pormal o impormal nga paagi ngadto sa mga tawo nga dili dedikado, bawtismadong Saksi. Kon duha ka magmamantala ang mag-uban sa ministeryo, pareho silang makareport sa oras, pero usa ra nila ang makareport ug balikduaw o Bible study. Dihang magdumalag pamilyahanong pagsimba, ang amahan ug inahan parehong makareport ug usa ka oras kada semana. Mahimong ireport sa mga brader ang oras nga ilang gigugol sa paghatag ug pakigpulong publiko. Ang nag-interpret sa pakigpulong makareport sab ug oras. Dunay importanteng mga kalihokan diin ang oras dili ilakip sa pagreport, sama sa pagpangandam para sa pagsangyaw, pagtambong sa tigom alang sa pagsangyaw, pagpamalit, ug uban pa.
28 Angayng sundon sa matag magmamantala ang iyang konsensiya nga nabansay sa Bibliya dihang magreport sa oras nga gigugol sa pagsangyaw. Ang ubang magmamantala mosangyaw sa lugar nga daghag tawo, samtang ang uban mosangyaw sa teritoryong diyutay rag tawo ug mobiyahe pag layo. Managlahi ang mga teritoryo; managlahi pod ang panglantaw sa mga magmamantala sa ilang ministeryo. Wala but-i sa Nagamandong Lawas ang tanang magmamantala kon sa unsang paagi nila kuwentahon ang oras nga gigugol sa ministeryo, ug wala sab sila mag-awtorisar kang bisan kinsa sa paghukom bahin niini.—Mat. 6:1; 7:1; 1 Tim. 1:5.
29 Kinahanglang tibuok nga oras ang ireport sa pagsangyaw. Pero kon ang magmamantala nalimitahan na pag-ayo tungod sa pagkatigulang, naa na lang sa balay tungod sa sakit, nagpuyo na sa nursing home, o kaha nabaldado, siya makareport ug labing menos tag 15 minutos. Bisan pag 15 minutos lang siya nakasangyaw sa usa ka bulan, iya kining ireport. Siya isipon gihapong regular nga magmamantala. Kini nga kahikayan maaplikar sab sa magmamantala nga temporaryong nalimitahan sulod sa usa ka bulan o kapin pa tungod sa seryosong sakit o aksidente. Kini nga probisyon para lang niadtong nalimitahan pag-ayo sa ilang kalihokan. Ang komite sa pag-alagad maoy magdesisyon kon ang magmamantala kuwalipikado ba niini nga kahikayan.
CONGREGATION’S PUBLISHER RECORD
30 Ang imong report matag bulan ginarekord sa Congregation’s Publisher Record. Kini nga mga rekord iya sa lokal nga kongregasyon. Kon nagplano kang mobalhin sa laing kongregasyon, seguroa nga mapahibalo nimo ang mga ansiyano. Seguroon sa sekretaryo nga ang rekord mapadala ngadto sa imong bag-ong kongregasyon. Niining paagiha, ang mga ansiyano mas makahimo na sa pag-abiabi nimo ug makataganag espirituwal nga tabang. Kon dili maabtag tulo ka bulan nga wala ka sa imong kongregasyon, palihog padayong ipadala ang imong report ngadto sa imong gipasakopan nga kongregasyon.
KON NGANONG IREPORT ANG ATONG PAG-ALAGAD SA KANATARAN
31 Makalimot ba ka usahay sa paghatag sa imong report? Kitang tanan kinahanglang pahinumdoman usahay. Pero kon ugmaron nato ang hustong tinamdan bahin sa pagreport ug masabtan ang kahinungdanon sa paghimo niana, mas dali natong mahinumdoman ang pagreport.
32 Ang pipila nangutana: “Nganong kinahanglan pa man kong mohatag ug report sa kongregasyon nga nahibalo na man si Jehova sa akong pag-alagad?” Tinuod, nahibalo si Jehova kon unsay atong ginahimo, ug siya nasayod kon ang atong pag-alagad bug-os kalag ba o dili. Pero hinumdomi nga girekord ni Jehova kon pila ka adlaw si Noe sa arka ug kon pila ka tuig ang pagpanaw sa mga Israelinhon sa kamingawan. Girekord sa Diyos kon pila ang nagmatinumanon ug ang wala magmasinugtanon. Iyang girekord ang anam-anam nga pagsakop sa yuta sa Canaan ug ang mga kadaogan sa matinumanong mga maghuhukom sa Israel. Oo, iyang girekord ang daghang detalye bahin sa mga kalihokan sa iyang mga alagad. Iyang gigiyahan ang mga magsusulat sa Bibliya sa pagrekord sa maong mga panghitabo, nga nagpakita nga hinungdanon kaniya ang paghupot ug tukmang mga rekord.
33 Ang mga hitabo sa kasaysayan nga narekord sa Bibliya nagpakita nga tukma gayod ang mga report ug rekord nga gihuptan sa katawhan ni Jehova. Kasagaran, dili bug-os masabtan ang kahulogan sa asoy sa Bibliya kon dili irekord ang espesipikong mga numero. Tagda ang mosunod nga mga pananglitan: Genesis 46:27; Exodo 12:37; Maghuhukom 7:7; 2 Hari 19:35; 2 Cronicas 14:9-13; Juan 6:10; 21:11; Buhat 2:41; 19:19.
34 Bisag dili lakip sa atong mga report ang tanan natong gihimo sa atong pagsimba kang Jehova, ang atong mga report dunay kapuslanan sa iyang organisasyon. Sa unang siglo, dihang namalik ang mga apostoles gikan sa pagsangyaw, ilang gireport kang Jesus ang “tanang butang nga ilang gibuhat ug gitudlo.” (Mar. 6:30) Usahay, ang mga report magpaila nga dunay mga bahin sa atong ministeryo nga nagkinahanglag pagtagad. Makita usahay sa mga report nga bisag may pag-uswag sa ubang kalihokan, basig mikunhod ang pag-uswag sa ubang bahin, sama sa gidaghanon sa magmamantala. Tingali gikinahanglan ang pagdasig o dunay mga problema nga kinahanglang sulbaron. Ang responsableng mga tigdumala magsusi sa mga report ug maningkamot nga masulbad ang problema nga tingali maoy nakababag sa pag-uswag sa mga magmamantala o sa tibuok kongregasyon.
35 Ang mga report mapuslanon sab aron makita sa organisasyon kon asang dapita ang mas dakog panginahanglan sa mga magsasangyaw. Unsang mga lugara ang mas mabungahon? Unsang lugara ang gamay rag pag-uswag? Unsang mga publikasyon ang gikinahanglan aron tabangan ang mga tawo nga makakat-on sa kamatuoran? Ang mga report makatabang sa organisasyon sa pagplano kon unsang literatura ang gamiton alang sa pagsangyaw sa lainlaing dapit sa kalibotan ug dayon itagana kana.
36 Kadaghanan kanato madasig dihang makadungog ug mga report. Di ba makapalipay nga madungog ang mga nahimo sa atong mga igsoon sa pagsangyaw sa maayong balita sa tibuok kalibotan? Ang mga report sa pag-uswag makatabang nato nga makita ang katibuk-ang pag-uswag sa organisasyon ni Jehova. Ang mga eksperyensiya makatandog sa atong kasingkasing ug makapadasig nato, nga magpalihok nato nga bug-os nga makigbahin sa pagsangyaw. (Buh. 15:3) Ang atong kooperasyon sa paghatag sa atong report importante ug magpakita nga mahunahunaon ta sa atong mga igsoon sa tanang dapit. Niining gamay nga paagi, atong gipakita nga nagpasakop ta sa kahikayan sa organisasyon ni Jehova.—Luc. 16:10; Heb. 13:17.
PAGHIMOG PERSONAL NGA MGA TUMONG
37 Walay rason nga atong itandi sa uban ang atong pag-alagad sa kanataran. (Gal. 5:26; 6:4) Managlahi ang atong mga sirkumstansiya. Sa laing bahin, makabenepisyo tag dako sa paghimog realistikong mga tumong ingong basehanan sa atong pag-uswag sa ministeryo. Ang pagkab-ot niini nga mga tumong makapalipay nato kay duna tay nalampos.
38 Dayag nga gipadali gyod ni Jehova ang iyang pagtigom sa mga tawong iyang panalipdan latas sa “dakong kasakitan.” Kita nagkinabuhi sa panahon nga natuman ang tagna ni Isaias: “Ang diyutay mahimong usa ka libo ug ang gamay mahimong gamhanang nasod. Ako, si Jehova, magpadali niini sa kaugalingong panahon niini.” (Pin. 7:9, 14; Isa. 60:22) Dako gayong pribilehiyo nga nahimo tang mga ministro sa maayong balita niining kataposang mga adlaw!—Mat. 24:14.