Himoa ang Sagradong Pag-alagad Adlaw ug Gabii
1 Ang usa ka talagsaong pribilehiyo gikapaabot kanato. Kita maoy bahin sa tibuok-kalibotang organisasyon sa mga magwawali nga gigamit ni Jehova sa pagpalampos sa labing dakong buluhaton sa pagwali sa Gingharian nga sukad ginahimo! (Marcos 13:10) Kita ba nakig-ambit niining buluhatona sa kinabug-osan nga maarangan?
2 Wala kita masayod kon unsa ka daghan ang mosanong sa kaulahian sa atong pagsangyaw. Si Jehova nagapasalig kanato nga kini maoy “usa ka dakong panon,” kinsa ang tanan “nagahatag kaniya ug sagradong pag-alagad adlaw ug gabii.” (Pin. 7:9, 15) Ang lima ka milyong mga Saksi dili mga tigpaminaw lamang, ni sila tigtambongan lamang sa tigom. Sila mga magbubuhat kinsa nagamantala sa maayong balita sa tibuok yuta!
3 Hunahunaa ang dakong pagpanaksing mahatag kon ang matag usa kanato nagapanikaysikay gayod sa pagpaambit sa kamatuoran ngadto sa bisan usa ra ka tawo matag adlaw. Sa dili madugay, ang matag usa diha sa atong teritoryo hayan makontak! Ang atong pagpabili alang kang Jehova kinahanglang magatukmod kanato sa pagsulti bahin kaniya uban ang kaikag.—Sal. 92:1, 2.
4 Tabangi ang Uban sa Paghatag ug Sagradong Pag-alagad: Sa miaging tuig sa pag-alagad sa Pilipinas, adunay aberids nga 95,800 ka pagtuon sa Bibliya ang gidumala matag bulan. Ang atong tumong mao ang pagtabang niining mga tawhana nga mahimong mga tinun-an ni Jesus. (Mat. 28:19, 20) Daghan kanila ang nakahimo na ug pag-uswag pinaagig pagtambong sa mga tigom nga regular. Sila nakasugod na sa pakigsulti sa ilang mga kaila “bahin sa halandong mga butang sa Dios.” (Buh. 2:11) Mahimo na ba silang dapiton karon sa pagpakig-ambit sa publikong ministeryo?
5 Sa Abril kinahanglang magahimo kita ug usa ka espesyal nga paningkamot sa pagdapit sa mga bag-ohan kinsa mahimong takos sa pagduyog kanato diha sa pag-alagad sa kanataran. Ang imo bang ginatun-an nagpadayag ug tinguha sa paghimo niana? Kon mao, nakakab-ot ba siya sa Kasulatanhong mga kinahanglanon? (Tan-awang Atong Ministeryo nga libro, mga panid 97-9.) Sa dihang gibati mong ang estudyante takos, hisgoti kini uban sa nagadumalang magtatan-aw, kinsa magahikay alang sa duha ka ansiyano sa pagsusi sa maong butang. Kon ang estudyante mahimong takos nga dawaton ingong usa ka di-bawtismadong magmamantala, dapita siya sa pagduyog kanimo diha sa kanataran.
6 Ang mga ginikanan tingali mag-isip kon ang ilang kabataan ba takos nga mahimong di-bawtismadong mga magmamantala. (Sal. 148:12, 13) Kon ang imong anak nagatinguha sa pagpadayag sa iyang kaugalingon diha sa pag-alagad sa Gingharian ug siya anaa sa maayong panggawi, ikaw mahimong moduol sa usa sa mga ansiyano sa komite sa pag-alagad. Human makatagbo uban kanimo ug sa bata, duha ka ansiyano magatino kon ang imong anak takos ba nga mahimong usa ka magmamantala. Adunay linaing hinungdan sa kalipay sa dihang ang kabataan moduyog kanato sa pagdayeg sa Dios!
7 Hinaot ang matag usa kanato bug-os nga magpahimulos sa atong kahibudngang pribilehiyo sa pagdayeg kang Jehova sa “dako gayod.” Dili nato tugotan ang usa ka adlaw nga molabay nga dili makahatag niining sagradong pag-alagad!—Sal. 109:30; 113:3.