Abril—Panahon sa ‘Paghago ug Pagpanlimbasog sa Atong Kaugalingon’
1 Ang mga semana sa dili pa o human sa Memoryal maoy panahon sa pagpamalandong sa katawhan ni Jehova. Mao kini ang panahon sa pagpamalandong kon unsay nalampos sa kamatayon ni Kristo ug paghinuktok sa atong hinatag-sa-Diyos nga paglaom nga nahimong posible pinaagi sa giulang dugo ni Jesus. Samtang hunahunaon nimog balik ang ika-19 sa Abril sa miaging tuig, unsay imong mahinumdoman? Makahinumdom ka ba sa mga nawong nga imong nakita niadtong gabhiona? sa dagaya, espirituwal nga atmospera sa Memoryal? sa tim-os nga Biblikanhong panaghisgot ug kinasingkasing nga mga pag-ampo? Lagmit gihukom nimo nga ipasundayag nga mas bug-os ang giladmon sa imong pagpasalamat tungod sa gugma nga gipakita kanimo ni Jehova ug ni Jesus. Sa unsang paagi ang maong pagpamalandong mag-apektar kanimo karon?
2 Tataw nga ang katawhan ni Jehova nagpahayag ug pagkamapasalamaton nga ikapakita sa daghang paagi kay sa mga pulong. (Col. 3:15, 17) Ilabina sa miaging Abril, kita nagapangab-ot aron atong ipakita ang atong pagpabili sa mga tagana ni Jehova alang sa kaluwasan pinaagi sa paggugol sa atong kaugalingon diha sa Kristohanong ministeryo. Ang mga oksilyare payunir mikabat ug 19,704. Ang ilang paningkamot, duyog nianang iya sa tanang ubang mga magmamantala sa Gingharian, miresulta sa bag-ong kinatas-ang ihap sa mga magmamantala. Ang atong kalipay misamot sa pagkakita sa kapin sa 100,000 ka pagtuon sa Bibliya nga gidumala nianang bulana ug sa bag-ong kinatas-ang ihap sa mitambong sa Memoryal!
3 Sa pagkatinuod, ang pagkatino sa atong paglaom nagtukmod kanato sa paglihok. Kini sumala gayod sa gisulat ni apostol Pablo: “Tungod niini nga kita naghago ug nanlimbasog, tungod kay gipahimutang nato ang atong paglaom sa usa ka buhing Diyos, nga Manluluwas sa tanang matang sa mga tawo, ilabina sa mga matinumanon.”—1 Tim. 4:10.
4 Niining panahon sa Memoryal, sa unsang paagi imong ipasundayag ang imong pagtuo sa mga tagana ni Jehova alang sa kinabuhi? Sa miaging Abril kita adunay bag-ong kinatas-ang ihap sa mga magmamantala sa Pilipinas, ug kini gisundan sa laing kinatas-ang ihap sa Mayo nga 136,396. Mahimo ba natong malabwan kanang gidaghanona niining Abril? Posible nga makab-ot nato kining tumonga. Apan ang matag magmamantala, bawtismado ug di-bawtismado, kinahanglang makig-ambit. Daghang bag-ohan mahimong takos usab nga makigbahin. Busa, samtang maghimo ka ug mga plano sa paghago ug pagpanlimbasog karong Abril, paghunahunag mga paagi nga ikaw makapalihok sa uban, lakip sa mga bag-ohan ug menos ug kasinatian, sa pagduyog kanimo.
5 Pagtabang sa Uban nga Mobalik sa Ilang Kalihokan: Kon may nahibaloan kang pipila kinsa wala na makagawas sa pag-alagad sa kanataran sulod sa usa ka bulan o duha, hayan mahimo nimong dasigon sila ug dapiton sila sa pagkuyog kanimo sa pag-alagad sa kanataran. Kon ang pipila diha sa kongregasyon nahimong di-aktibo, ang mga ansiyano mohimog linaing paningkamot sa pagduaw kanila ug pagdasig kanila sa pagsugod pag-usab sa Abril.
6 Kitang tanan kinahanglan nga padayong mohangyo alang sa espiritu ni Jehova sa pagpalig-on kanato diha sa pag-alagad kaniya. (Luc. 11:13) Unsay kinahanglan natong buhaton aron makadawat nianang espirituha? Basaha ang dinasig nga Pulong sa Diyos. (2 Tim. 3:16, 17) Kita angay usab nga “magpatalinghog sa ginaingon sa espiritu ngadto sa mga kongregasyon” pinaagi sa pagtambong sa tanang lima ka senemanang mga tigom. (Pin. 3:6) Karon mao ang nahiangayng panahon nga tabangan ang mga di-makanunayon ug di-aktibo nga mouswag sa ilang mga batasan sa pagtuon ug magmakanunayon sa ilang pagtambong sa mga tigom. (Sal. 50:23) Atong buhaton kini samtang padayon natong bantayan pag-ayo ang atong espirituwal nga kaayohan. Bisan pa niana, duna pay laing gikinahanglan.
7 Si apostol Pedro nagsaysay nga ang Diyos naghatag sa iyang balaang espiritu “niadtong nagasugot kaniya ingon nga magmamando.” (Buh. 5:32) Ang maong pagkamasinugtanon naglakip sa pagpatalinghog sa sugo nga “magwali ngadto sa katawhan ug maghatag ug bug-os nga pamatuod.” (Buh. 1:8; 10:42) Busa, bisan kon tinuod nga kita nagkinahanglan sa espiritu sa Diyos sa paglig-on kanato sa pagsangyaw, tinuod usab nga sa dihang kita mosugod sa pagpasundayag sa atong tinguha nga pasidunggan si Jehova, siya dugang nga motabang kanato. Hinaot nga dili gayod nato pakamenoson ang kahinungdanon sa paghimo nianang unang mga tikang sa kinabubut-ong pagkamasinugtanon!
8 Pagtabang sa mga Batan-on: Mga ginikanan, nakakita ba kamog pamatuod nga ang inyong mga anak buot makigsulti sa uban bahin sa kamatuoran? Nakig-uban ba sila kaninyo sa pag-alagad sa kanataran? Sila ba maoy panig-ingnan sa ilang panggawi? Kon mao, nganong magpanuko? Duola ang usa sa mga membro sa Komite sa Pag-alagad sa Kongregasyon, ug tan-awa kon ang inyong anak takos ba nga mahimong usa ka magmamantala niining Abril. (Tan-awa ang librong Atong Ministeryo, mga panid 99-100.) Ilha nga ang inyong mga anak makaamot sa gamhanang paagi sa singgit sa pagdayeg ngadto kang Jehova niining panahon sa Memoryal.—Mat. 21:15, 16.
9 Usa ka Kristohanong inahan sa Georgia, T.B.A., kanunayng nagdasig sa iyang batang anak nga babaye sa pagpakigsulti sa uban bahin kang Jehova. Sa miaging tuig, samtang ang batang babaye nakig-ambit sa ministeryo kauban sa iyang inahan, nakapahimutang siya ug brosyur nga Gikinahanglan ngadto sa usa ka lalaki ug sa mubo gisaysay ang mga kaundan. Ang lalaki nangutana kaniya: “Pila nay imong pangedaron?” Siya mitubag: “Pito.” Ang lalaki nahibulong sa pagkakita kaniya nga nagahatag ug usa ka makahuloganong presentasyon. Ang lalaki diay nakig-uban na sa mga Saksi niadtong batabata pa siya apan wala gayod seryosoha kana ingong usa ka dalan sa kinabuhi. Wala madugay, usa ka pagtuon sa Bibliya ang gidumala uban sa lalaki, sa iyang asawa, ug sa iyang anak nga babaye.
10 Daghang batan-on ang mga magmamantala na, ug gikalipay nato ang pagpakig-uban kanila samtang sila nagbuhat duyog kanato sa pag-alagad. Kining mga batan-ona makapalihok ug makapadasig sa uban nga pareho nilag edad. Apan ang Abril maoy haom usab nga panahon alang sa indibiduwal nga mga pamilya sa paglig-on sa ilang bugkos ug pagtukod sa espirituwalidad pinaagi sa hiniusang pagbuhat diha sa sagradong pag-alagad. Ang mga ulo sa pamilya kinahanglang maoy manguna niini.—Prov. 24:27.
11 Pagtabang sa mga Bag-ohan: Komosta ang mga bag-ohan nga imong ginatun-an sa Bibliya? Sila ba makatampo sa linaing paningkamot niining Abril? Lagmit sila nagpahayag ug tinguha sa pagsulti sa uban kon unsay ilang nakat-onan samtang inyong kobrehan ang kapitulo 2, parapo 22, o kapitulo 11, parapo 14, diha sa librong Kahibalo. Kon kamo talitapos na sa libro, pangandam sa pagpakighisgot niining butanga sa tin-aw samtang inyong kobrehan ang kapitulo 18, parapo 8, nga nag-ingon: “Tingali naghinamhinam kang ipaambit ang imong nakat-onan sa imong mga paryente, mga higala, ug sa uban pa. Sa pagkamatuod, mahimong dugay na nimo kining gihimo, maingon nga si Jesus nakig-ambit sa maayong balita sa uban sa impormal nga mga kahimtang. (Lucas 10:38, 39; Juan 4:6-15) Karon basin gusto nimong mohimo ug labaw pa.” Tinuod ba kini niadtong imong ginatun-an?
12 Ang imong estudyante nagtuo ba sa Pulong sa Diyos? Siya ba nagapadapat sa mga prinsipyo sa Bibliya? Gipahiuyon ba niya ang iyang kinabuhi ngadto sa diyosnong mga sukdanan? Nagatambongan ba siya sa mga tigom sa kongregasyon? Buot ba niyang moalagad kang Jehova nga Diyos? Nan nganong dili siya dasigon nga makigsulti sa mga ansiyano aron sila makatino kon kaha siya takos nga mahimong usa ka di-bawtismadong magmamantala ug mobuhat duyog kanimo sa Abril? (Tan-awa ang librong Atong Ministeryo, mga panid 97-9.) Niining paagiha siya mismo makasugod sa pagsinati kon sa unsang paagi ang organisasyon ni Jehova mopaluyo kaniya sa iyang mga paningkamot nga moalagad kang Jehova.
13 Tinuod, ang ubang mga estudyante mouswag nga mas kusog kay sa uban. Busa, uyon sa pagtultol diha sa Hunyo 2000 nga Atong Ministeryo sa Gingharian, panid 4, mga parapo 5-6, daghan ang nagatuon sa ikaduhang libro uban sa mga tawo nga nagpadayag ug interes sa sinugdan apan kinsa nanginahanglag tabang aron mahimong aktibong nakig-uban. Dili gayod kita magpakawalag paglaom nga kining mga matinud-anog-kasingkasing mahimong tinuod nga mga tinun-an ni Kristo, “sa mubong panahon o sa taas nga panahon.” (Buh. 26:29) Apan, kon ang gidaghanon sa mga bulan nga ikaw nagatuon sa maong mga indibiduwal mahubit gayod ingong “taas nga panahon,” kini kaha nga panahon sa Memoryal mahimong usa ka maayong kahigayonan sa imong estudyante nga mosugod sa pagpasundayag sa giladmon sa iyang pagpabili sa lukat ni Kristo?
14 Kon sa Unsang Paagi Sila Matabangan nga Makig-ambit: Daghan ang atong makat-onan bahin sa pagtabang sa takos nga mga tawo sa pagsugod sa ministeryo pinaagi sa pagsusi kon giunsa pagbansay ni Jesus ang uban. Wala lang siya mangitag usa ka panon ug unya sultihan ang iyang mga apostoles nga mosugod sa pagpakigsulti. Gipasiugda una niya ang panginahanglan sa buluhatong pagsangyaw, nagdasig sa mainampoong tinamdan, ug dayon naghatag kanilag tulo ka paninugdang mga tagana: usa ka kauban, usa ka asaynment nga teritoryo, ug usa ka mensahe. (Mat. 9:35-38; 10:5-7; Mar. 6:7; Luc. 9:2, 6) Mahimo usab nimo ang ingon. Kon kaha ikaw magatabang sa imong kaugalingong anak, sa usa ka bag-ong estudyante, o sa usa kinsa wala na magtaho ug bisan unsang kalihokan sulod sa mubong panahon, haom lamang nga mohimog linaing paningkamot sa pagkab-ot sa mosunod nga mga tumong.
15 Ipasiugda ang Panginahanglan: Isilsil diha sa tawo ang kahinungdanon sa buluhatong pagsangyaw. Magmapositibo bahin niana. Pag-asoy ug mga kasinatian nga magpakita kon unsay napalampos sa kongregasyon diha sa ministeryo. Ipakita ang espiritu nga gipahayag ni Jesus sa Mateo 9:36-38. Dasiga ang umaabot nga magmamantala o ang usa nga di-aktibo sa pag-ampo bahin sa iyang personal nga pagpakig-ambit diha sa ministeryo maingon man sa kalamposan sa tibuok-kalibotang buluhaton.
16 Dasiga ang Tawo sa Paghunahuna Bahin sa Daghang Kahigayonan nga Makapamatuod: Isulti ang posibilidad sa pagpakigkita sa grupo sa pagtuon sa libro alang sa pamalaybalay nga pagsangyaw. Isulti ang bahin sa pagpakighisgot sa mga paryente ug mga kaila o pagpakigsulti sa mga kaubang trabahante o mga kauban sa tunghaan panahon sa mga pahulay sa paniudto. Sa dihang nagabiyahe diha sa publikong transportasyon, ang usa makasugod sa panaghisgot pinaagi sa yanong pagpakitag personal nga interes sa kaubang mga pasahero. Kon kita ang mohimog unang lakang, sagad kini makamugnag kahigayonan sa paghatag ug maayong pamatuod. Sa pagkatinuod adunay daghang okasyon nga ikapaambit nato ang atong paglaom sa uban sa “matag adlaw.”—Sal. 96:2, 3.
17 Apan, lagmit mas labing maayo alang kanimo ug sa bag-ong magmamantala nga mag-uban sa pamalaybalay sa labing madali kon mahimo. Kon ikaw nagbutang ug tumong sa pagpauswag sa imong pag-alagad panahon sa Abril, pangutan-a ang alagad sa teritoryo kon ang kombenyenteng teritoryo mabatonan. Kon mao, maghatag kini kanimog mga kahigayonan sa pagbuhat niana nga bug-os. Pananglitan, samtang matapos nimo ang pag-alagad sa kanataran o nagbiyahe paingon sa mga tigom o ubang mga dapit, mamatikdan tingali nimo nga aduna nay tawo sa balay diin kaniadto walay tawong nakaplagan o diin ang interes gipakita. Kon haom, himoa ang mubong pagduaw kon kini ang labing epektibong buhaton. Kini, sa baylo, moamot sa pagbati sa kalamposan ug kalipay diha sa ministeryo.
18 Andama ang Usa ka Makapadaning Mensahe: Usa ka butang alang sa usa ka tawo ang tinguhang makig-ambit sa mensahe sa Gingharian, apan lahing butang nga siya mobating masaligon bahin sa iyang paagi sa pakigkomunikar niana, ilabina kon siya bag-ohan o wala na makagawas sa pag-alagad sulod sa dugayng panahon. Ang pagtabang sa mga bag-ohan ug di-aktibo sa pagpangandam maoy mapuslanon. Ang mga Tigom sa Pag-alagad ug mga tigom sa dayon nang pagsangyaw makataganag mapuslanong mga ideya, apan walay kahulip ang personal nga pagpangandam.
19 Sa unsang paagi imong matabangan ang mga bag-ohan sa pagpangandam alang sa pag-alagad sa kanataran? Sugdi pinaagi sa usa ka presentasyon sa magasin, ug himoa kining yano ug mubo! Pahunahunaa sila ug mga panghitabo diha sa mga balita nga nakapabalaka sa mga tawo sa teritoryo, ug dayon pangitag usa ka punto diha sa usa sa bag-ong mga magasin nga nagsaysay niana. Ensayoha ninyo ang presentasyon, ug gamita kini diha sa ministeryo sa labing madali kon mahimo.
20 Ugmara ang Atong Potensiyal sa Pag-uswag sa Umaabot: Sa miaging tuig ang mitambong sa Memoryal sa tibuok kalibotan maoy kapin sa 14.8 ka milyon. Ang gidaghanon sa nagtaho ingong mga magmamantala kapin lamang sa unom ka milyon. Kini nagpasabot nga mga 8.8 ka milyong tawo ang interesado gayod sa pagtambong niining linaing programa diin ilang nadungog ang usa sa pangunang mga pagtulon-an sa Bibliya nga gisaysay. Nakaila nila sa personal ang pipila kanato, nga lagmit naghatag kanilag maayong impresyon. Daghan kanila mosulti nga nakadayeg kanato, moamot sa atong tibuok-kalibotang buluhaton, ug modepensa kanato atubangan sa uban. Kining dakong grupo nagpasabot ug potensiyal sa pag-uswag sa umaabot. Unsay atong mahimo sa pagtabang kanila sa paghimog dugang pag-uswag?
21 Ang kinabag-an sa mga bag-ohan nga mitambong sa Memoryal mihimo niana ingong resulta sa personal nga pagdapit gikan sa usa kanato. Kasagaran, kini nagkahulogan nga sila sa labing menos adunay personal nga kaila sa mamiminaw. Kon ang usa mitambong agig sanong sa atong pagdapit, aduna kitay responsabilidad nga mobati siyang giabiabi ug tabangan siya nga makapahimulos sa bug-os gikan sa programa. Sanglit ang tigomanan mahimong maghuot, tabangi siya sa pagpangitag kalingkoran. Pahulama siyag Bibliya, ug dapita siya nga mosalo sa imong alawiton. Tubaga ang bisan unsang mga pangutana nga tingali iyang isukna. Ang imong mainitong personal nga pagtagad mahimong usa ka pangunang hinungdan sa pag-ugmad sa iyang interes. Siyempre, kitang tanan makig-ambit niini nga responsabilidad—kon mahimamat nato ang usa ka tawong dili kaila, ipakita ang mainitong pag-abiabi ug pakighinabi sa mubo aron makaila.
22 Ang pagtambong sa Memoryal makahatag ug tinuod nga epekto sa panghunahuna sa tawo. Ang kamatuoran nga siya mitambong hayan nagsugyot nga wala pa niya makaplagi ang iyang gipangita sa laing grupo ug nga kita nagtanyag kaniyag usa ka butang nga siya mobati nga kinahanglang susihon nga mas suod. Ang pagpatin-aw sa kahibulongang tagana nga lukat mahimong usa ka dakong pagpadayag ngadto sa usa ka tawo nga walay ideya bahin sa walay kinutobang gugma ni Jehova. Tingali makita dayon niya nga kita lahi—tim-os, mahigalaon, mahigugmaon, ug matinahuron. Ang atong tigomanan walay pagkasusama sa iya tingaling nakita diha sa mga simbahan nga nagpasundayag ug mga imahen ug walay pulos nga mga rituwal. Ang mga bag-ohan seguradong makamatikod nga ang mga mamiminaw gilangkoban sa mga tawong gikan sa tanang hut-ong sa kinabuhi ug nga walay pagpangolektag salapi. Kini nga kasinatian mahimong usa ka gamhanang panukmod alang kanila nga mobalik.
23 Human sa Memoryal, ang usa kinahanglang magmaalisto sa pagtaganag tabang sa pagpaloap sa tanang bag-ohan nga mitambong. Kon imong gidapit ang mga bag-ohan, ikaw adunay linaing responsabilidad. Sa dili pa sila mobiya, paneguroa nga sila nahibalo bahin sa ubang mga tigom diha sa Kingdom Hall. Isulti ang ulohan sa sunod nga pakigpulong publiko. Pahibaloa sila sa dapit ug oras sa Pagtuon sa Libro sa Kongregasyon nga labing duol sa ilang balay. Sa ulahi, tagan-i sila ug kopya sa librong Kalipay sa Pamilya, ug ipahibalo kanila nga ang panaghisgot alang sa semana sa Abril 30 maoy “Panalipdi ang Inyong Pamilya Gikan sa Makadaot nga mga Impluwensiya.” Isaysay kon nganong ang tibuok kongregasyon nagaplano sa pagtambong sa sirkitong asembliya o adlaw sa espesyal nga asembliya, kon aduna nay naeskedyul sa haduol nga umaabot.
24 Hikaya ang mahigalaong pagduaw sa ilang balay. Paneguroa nga aduna silay mga kopya sa brosyur nga Gikinahanglan ug librong Kahibalo, nga magpasinati kanila sa pangunang mga pagtulon-an sa Bibliya. Kon wala pa sila magtuon, tanyagi sila ug pagtuon sa Bibliya. Isugyot nga ilang basahon ang bag-ong brosyur nga Jehovah’s Witnesses, nga nagpresentar ug usa ka tin-aw nga hulagway kon sa unsang paagi kita nagalihok ingong usa ka organisasyon. Dapita sila sa pagtan-aw sa atong mga video, sama sa Our Whole Association of Brothers. Hikaya nga mahimamat nila ang uban diha sa kongregasyon. Sa umaabot nga mga bulan, pakigkomunikar kanunay sa mga bag-ohan; dapita sila sa pagtambong sa mga tigom sa dihang ang magtatan-aw sa sirkito moduaw o kon kamo adunay sirkitong asembliya o adlaw sa espesyal nga asembliya. Ihatag kanila ang tanang kahigayonan nga ipakita nga sila “hustong nakiling alang sa kinabuhing walay kataposan”!—Buh. 13:48.
25 Kon Unsay Mahimo sa mga Ansiyano: Ang kalamposan sa gipakusgang paningkamot sa ministeryo niining Abril magdepende, sa dakong sukod, diha sa mga ansiyano. Kon ikaw usa ka tagdumala sa pagtuon sa libro sa kongregasyon, paghimog listahan sa mga butang nga mahimo nimong buhaton sa pagtabang sa tanan diha sa imong grupo sa pagtuon sa libro nga makaambit sa linaing mga kalihokan. Aduna bay naasayn sa imong grupo kinsa batan-on, bag-ohan, di-makanunayon, o di-aktibo? Susiha aron makita kon kaha ang mga ginikanan, mga payunir, o ubang mga magmamantala mihimog unang tikang sa pagtabang kanila. Itagana ang bisan unsang personal nga tabang nga imong ikatanyag. Usa ka igsoong babaye nga nahimong di-makanunayon sa pag-alagad sa kanataran sulod sa duha ka tuig migugol ug kapin sa 50 ka oras sa ministeryo sa miaging Abril. Unsay nakapausab kaniya? Siya miingon nga tungod kadto sa makapadasig nga mga pagduaw sa mga ansiyano isip magbalantay.
26 Ang mga ansiyano ug ministeryal nga mga alagad kinahanglang magtambayayongay sa pagseguro nga adunay igong teritoryo, mga magasin, ug literatura sa umaabot nga bulan. Mahimo bang hikayon ang dugang mga tigom sa dayon nang pagsangyaw? Kon mao, ipahibalo ang linaing mga kahikayan. Labaw sa tanan, sa inyong publiko ug pribadong mga pag-ampo, pangayoa ang panalangin ni Jehova sa atong bulan sa gipadakong kalihokan sa Gingharian.—Roma 15:30, 31; 2 Tes. 3:1.
27 Sa miaging Abril sa usa ka kongregasyon sa North Carolina, ang mga ansiyano nagdasig gayod sa gipadakong kalihokan sa ministeryo. Sa mga tigom sa matag semana, ilang giawhag ang mga magmamantala sa pagkonsiderar nga mainampoon kon sila ba makapatala ingong oksilyare nga mga payunir. Sa tanang higayon, ang tanang ansiyano ug mga ministeryal nga alagad madasigong naghisgot bahin sa paghimo gayod sa Abril nga labing maayong bulan. Ingong resulta, 58 porsiyento sa mga magmamantala, lakip ang tanang ansiyano ug mga ministeryal nga alagad, nagpayunir nianang bulana!
28 Ang Kalipay sa Bug-os nga Pagpakig-ambit: Unsa ang mga panalangin sa ‘paghago ug pagpanlimbasog sa atong kaugalingon’ diha sa ministeryo? (1 Tim. 4:10) Mahitungod sa ilang masibotong kalihokan sa kongregasyon sa miaging Abril, ang gihisgotan sa ibabaw nga mga ansiyano misulat: “Ang mga igsoong lalaki ug babaye sagad nagsultihanay bahin sa kon unsa ka dakong gugma ug kasuod ang ilang gibati tali sa usag usa sukad nga sila misugod sa paghago ug dugang diha sa pag-alagad sa ministeryo.”
29 Usa ka batan-ong igsoong lalaki nga may kakulian sa paglakaw nangandoy nga makig-ambit sa linaing kalihokan sa miaging Abril. Pinaagi sa mainampingong pagplano ug sa tabang sa iyang inahan ug espirituwal nga mga igsoong lalaki ug babaye, siya nakatagamtam ug usa ka mabungahong bulan ingong usa ka oksilyare payunir. Unsay iyang gibati sa maong kasinatian? Siya miingon: “Sa unang higayon sa akong kinabuhi, ako mibati nga samag may-ikasarang sa lawas nga tawo.”
30 Walay duhaduha nga si Jehova dagayang nagapanalangin niadtong kinsa nagtamod pag-ayo sa ilang pribilehiyo sa pagpakigsulti bahin sa iyang pagkahari. (Sal. 145:11, 12) Samtang atong handomon ang kamatayon sa Ginoo, atong masabtan nga ang mga panalangin tungod sa diyosnong debosyon mas modagaya pa gani sa umaabot. Si apostol Pablo nangandoy pag-ayo alang sa ganti sa kinabuhing walay kataposan. Apan, siya nahibalo nga kini dili usa ka butang nga niana maghulathulat na lang nga walay buhaton ug molaom. Siya misulat: “Tungod niini ako sa pagkatinuod naghago, nga nanlimbasog sumala sa iyang pagpalihok ug kini naglihok dinhi kanako nga may gahom.” (Col. 1:29) Si Jehova, pinaagi ni Jesus, naghimo kang Pablo nga gamhanan sa pagpalampos sa nagaluwas-kinabuhi nga ministeryo, ug Siya makahimo sa ingon alang kanato karon. Mao ba kana ang imong personal nga kasinatian niining Abril?
[Kahon sa panid 3]
Kinsay Imong Madasig sa Pagmantala sa Abril?
Imong anak?
Usa ka estudyante sa Bibliya?
Usa nga nahimong di-aktibo?