Ang Abril ba Mahimong Espesyal nga Bulan Alang Kanimo?
1 Sagad natong hisgotan ang mga bulan sa Marso ug Abril ingong ang panahon sa Memoryal. Sanglit kay ang pagsaulog sa Memoryal kanunay mang mahitabo niining panahona sa tuig, ang katawhan ni Jehova mapalihok sa pagpauswag sa ilang pakig-ambit diha sa ministeryo sa kanataran ingong mga oksilyare payunir. Ug daghang nakig-ambit sa Marso ug Abril ang sagad nakahimo sa paglugway sa ilang oksilyare payunir nga pag-alagad ngadto sa Mayo, ilabina nga kini maoy tingbakasyon pa nga bulan sa eskuwelahan.
2 Nganong dili motambong sa miting sa Pebrero 14 uban sa malaomang mga oksilyare payunir sa inyong kongregasyon? Kini magadasig kanimo sa seryosong pagpamalandong niana, ilabina sa dihang makita mo ang daghang uban pa nga nagaplano sa pag-oksilyare payunir. Kon nagaplano kang makig-ambit sa Marso, nan kinahanglang motunol ka dayon sa imong aplikasyon inigkahuman niining tigoma.
3 Bisan pa kadtong dili makapayunir makahimo sa Marso ug Abril nga espesyal nga mga bulan pinaagig pagpauswag sa ilang ministeryo sa kanataran. Dayag nga adunay daghang pagabuhaton pa. Tingali ang mga magmamantala sa kongregasyon ug mga payunir makadapit sa bag-ong di-bawtismadong mga magmamantala nga mosangyaw uban kanila diha sa kanataran. Ang dugang paningkamot kinahanglang himoon sa pagdapit sa tanang interesadong tawo ngadto sa Memoryal sa Abril 6.
4 Sa miaging tuig kita adunay 7,554 ka oksilyare payunir sa Marso, 17,009 sa Abril, ug 10,950 sa Mayo. Daghang bag-ong pagtuon sa Bibliya ang nasugdan ingong resulta niining gipauswag nga kalihokan. Uban sa panalangin ni Jehova sa imong mauswagong panikaysikay niining tuiga, hayan ikaw usab makasugod ug usa ka bag-ong pagtuon sa Bibliya ug busa ang Abril mapamatud-ang usa ka espesyal nga bulan alang kanimo.—Sal. 34:8; Prov. 10:22.