Pahimusli ang Panahon sa Memoryal Alang sa Dugang Buluhaton!
1. Unsay mga rason nganong dugangan nato ang atong buluhaton sa Marso, Abril, ug Mayo?
1 Madugangan ba nimo ang imong pagpakig-ambit sa ministeryo panahon sa Memoryal? Sa daghang dapit, maayo ang panahon niining mga bulana. Gamiton sa ubang magmamantala ang ilang bakasyon sa trabaho o eskuylahan alang sa ministeryo. Sugod sa Abril 2, duna kitay linaing kampanya sa pag-imbitar sa mga interesado sa pagtambong sa Memoryal sa Abril 17. Human niana, paningkamotan nato nga maugmad ang interes niadtong mitambong ug dapiton sila sa espesyal nga pakigpulong nga himoon sa semana sa Abril 25. Sa pagkatinuod, dunay daghang rason nga dugangan nato ang atong buluhaton sa Marso, Abril, ug Mayo.
2. Unsa ang usa sa labing maayong paagi sa pagpauswag sa atong ministeryo?
2 Pag-oksilyare Payunir: Usa sa labing maayong paagi mao ang pag-oksilyare payunir. Kay puliki man kitang tanan, kini nagkinahanglan ug abanteng pagplano ug paghimog kausaban sa atong eskedyul. (Prov. 21:5) Tingali himoon nimo sa laing higayon ang dili kaayo hinungdanong mga kalihokan. (Filip. 1:9-11) Nganong dili nimo isulti sa ubang igsoon ang imong plano nga mag-oksilyare aron sila makaduyog kanimo?
3. Sa unsang paagi madugangan sa mga pamilya ang ilang panahon sa ministeryo?
3 Sa inyong sunod nga Pamilyahanong Pagsimba, maayo kon inyong hisgotan ang inyong tumong ingong pamilya. (Prov. 15:22) Kon mokooperar ang tanan, tingali maka-oksilyare ang pipila ka membro sulod sa usa o kapin pang mga bulan. Komosta kon dili kini posible? Mahimong hikayon sa pamilya ang pagsangyaw sa pipila ka gabii o dugangan ang ilang panahon sa ministeryo sa hinapos sa semana.
4. Unsang mga panalangin ang mabatonan kon imong dugangan ang imong buluhaton panahon sa Memoryal?
4 Nakita ni Jehova ang tanan natong gihimo sa pag-alagad kaniya ug gipabilhan ang atong pagsakripisyo. (Heb. 6:10) Ang pag-alagad kang Jehova ug sa uban mohatag ug kalipay. (1 Cron. 29:9; Buh. 20:35) Madugangan ba nimo ang imong buluhaton panahon sa Memoryal aron makabaton kag dugang kalipay ug mga panalangin?