Makaoksilyare Payunir Ka Ba?
1. Nganong ang panahon sa Memoryal maayong higayon sa pagpalapad sa atong ministeryo?
1 Ang panahon sa Memoryal maoy maayong higayon sa pagpalapad sa atong ministeryo. Panahon kini sa pagpamalandong sa dakong gugma ni Jehova sa paghatag sa iyang Anak ingong lukat. (Juan 3:16) Pinaagi niini, ang atong kasingkasing matandog sa pagpasalamat kang Jehova ug sa ingon molalom ang atong tinguha sa pagsulti sa uban bahin kaniya ug sa iyang gihimo alang sa katawhan. (Isa. 12:4, 5; Luc. 6:45) Panahon usab kini sa espesyal nga kampanya sa pagdapit sa mga kaila ug sa mga tawo sa atong teritoryo sa pagtambong sa Memoryal. Dayon, paningkamotan natong maugmad ang interes sa mga mitambong. Mapalapad mo ba ang imong ministeryo pinaagi sa pag-oksilyare payunir sa Marso, Abril, o Mayo?
2. Nganong maayo kaayong mag-oksilyare payunir sa Marso?
2 Himoang Espesyal ang Bulan sa Marso: Ang Marso maayo kaayong bulan nga mag-oksilyare payunir. Kadtong gustong moaplay makapili sa 30 o 50 ka oras nga kab-oton. Kon matunong sa Marso ang duaw sa magtatan-aw sa sirkito, ang mga oksilyare payunir makatambong sa tibuok miting uban sa regular ug espesyal payunir. Lahi sa miaging mga tuig, gipatas-an karon ang kampanya sa pagpanagtag ug imbitasyon para sa Memoryal, nga saulogon sa Martes, Marso 26, 2013. Kini magsugod sa Marso 1. Dugang pa, ang Marso dunay lima ka Sabado ug Dominggo. Busa, nganong dili palandongon ang pag-oksilyare payunir ug himoong espesyal ang bulan sa Marso?
3. Unsang mga kahikayan ang atong himoon aron madugangan ang atong panahon sa ministeryo?
3 Pagplano Na Karon: Karon na ang panahon sa pagsusi kon unsang mga kausaban ang himoon sa imong eskedyul aron ikaw makapayunir. Hinungdanon ang kooperasyon sa pamilya, mao nga hisgoti diha sa inyong Pamilyahanong Pagsimba ang mga tumong sa inyong pamilya ug paghimog eskedyul. (Prov. 15:22) Ayawg kaguol kon dili ka makaoksilyare payunir. Makahimo ka ba sa paggugol ug dugang oras sa mga adlaw nga ikaw mosangyaw? Madugangan ba nimog usa ka adlaw kada semana ang imong pagsangyaw?
4. Unsay mga kaayohan dihang mogugol kitag dugang panahon sa ministeryo sa Marso, Abril, ug Mayo?
4 Dihang mogugol kitag dugang panahon sa ministeryo sa Marso, Abril, ug Mayo, kita mas malipayon ug mobatig katagbawan sa pag-alagad kang Jehova ug sa pagtabang sa uban. (Juan 4:34; Buh. 20:35) Labaw sa tanan, ang atong mga sakripisyo makahatag ug kalipay kang Jehova.—Prov. 27:11.