Planoha na Karon nga Mapauswag ang Imong Ministeryo
1. Nganong bililhon ang panahon sa Memoryal, ug sa unsang paagi makapangandam kita niini?
1 Ang panahon sa Memoryal mohatag kanatog bag-ong kahigayonan sa ‘pagdayeg pag-ayo kang Jehova.’ (Sal. 109:30) Mapauswag ba nimo ang imong ministeryo sa Marso, ingong usa ka paagi sa pagpakitag apresasyon sa Magtatagana sa lukat? Panahon na karon nga sugdan ang pagplano.—Prov. 21:5.
2. Unsay reaksiyon nimo ug sa ubang igsoon bahin sa gipaubsan nga kinahanglanong oras sa oksilyare payunir sa miaging Abril?
2 Pag-oksilyare Payunir: Sa miaging tuig, pwerteng lipaya sa mga igsoon pagkahibalo nila nga gipaubsan ang kinahanglanong oras sa oksilyare payunir sa bulan sa Abril. Usa ka brader misulat: “Nagtungha pa ko sa hayskul, ug dili pa ko makaregular payunir. Apan moaplay ko alang sa 30 ka oras ug maningkamot nga kab-oton ang 50 ka oras sa bulan sa Abril.” Usa ka sister nga may bug-os panahong trabaho misulat: “Sayon kaayong kab-oton ang 30 ka oras!” Sa dihang gipahibalo kini nga kahikayan, usa ka kanhi payunir nga kapig 80 anyos na karon miingon: “Kini ang dugay na nakong gipaabot! Nahibalo si Jehova nga ang pagpayunir mao ang kinamaayohang yugto sa akong kinabuhi!” Ang mga dili makaoksilyare payunir nagtakdag mga tumong sa paggugol ug mas daghang oras sa ministeryo.
3. Unsay mga rason nga angayng palandongon ang pag-oksilyare payunir sa Marso, Abril, ug Mayo?
3 Ang umaabot nga Marso maoy maayo kaayong bulan sa pag-oksilyare payunir kay makapili na usab kita kon 30 o 50 ka oras ba ang atong kab-oton. Dugang pa, sugod sa Sabado, Marso 17, kita adunay espesyal nga kampanya sa pagdapit sa mga tawo nga moduyog kanato sa Memoryal sa Abril 5. Daghan ang malipay kaayo sa ilang pagpauswag sa ilang ministeryo nga buot nilang mag-oksilyare payunir usab sa Abril ug Mayo, nga 50 ka oras na ang kinahanglanon.
4. Unsay atong himoon aron mapauswag nato ang atong ministeryo, ug unsay moresulta niana?
4 Sa sunod ninyong Pamilyahanong Pagsimba, nganong dili hisgotan kon sa unsang paagi ang matag usa sa pamilya makapauswag sa iyang ministeryo panahon sa Memoryal? (Prov. 15:22) Iampo nga panalanginan ni Jehova ang imong paningkamot. (1 Juan 3:22) Kon imong pauswagon ang imong ministeryo, mas makadayeg ka kang Jehova ug madugangan usab ang imong kalipay.—2 Cor. 9:6.