Dugang Kahigayonan sa Pagdayeg Kang Jehova
1. Unsay bag-ong kahikayan nga makatabang nato sa ‘pagdayeg kang Jehova’?
1 Niadtong Marso, may bag-ong kahikayan nga ang mga magmamantala makaoksilyare payunir matag Marso ug Abril ug sa bulan sa regular nga duaw sa magtatan-aw sa sirkito nga 30 oras lang ang kab-oton. Kon ang duaw sa magtatan-aw sa sirkito maatol sa mga adlaw sa kataposang semana sa bulan hangtod sa unang semana sa mosunod nga bulan, ang mga magmamantala makapili asa niining bulana siya makaoksilyare payunir. Ang tanang oksilyare payunir makatambong sa tibuok miting nga hikayon sa magtatan-aw sa sirkito uban sa mga regular ug espesyal payunir. Busa kon ang 50 oras nga kab-otonon dili nato maarangan, kita gihapon ‘makadayeg’ kang Jehova ingong mga oksilyare payunir upat ka beses matag tuig pinaagi sa 30 ka oras nga kab-otonon!—Sal. 109:30; 119:171.
2. Unsay mapahimuslan sa mga nag-oksilyare payunir panahon sa duaw sa magtatan-aw sa sirkito?
2 Panahon sa Duaw sa Magtatan-aw sa Sirkito: Karon daghan na ang makaoksilyare payunir sa duaw sa magtatan-aw sa sirkito ug makapahimulos sa pagdinasigay pinaagi sa pagpakig-uban kaniya sa ministeryo. (Roma 1:11, 12) Tingali daghang oksilyare payunir ang mobakasyon sa trabaho nianang semanaha aron sila makauban kaniya. Kadtong may trabaho sa Lunes hangtod sa Biyernes makahangyo kaniya sa pag-uban kanila sa Sabado o Dominggo. Dugang pa, makapadasig gayod sa mga oksilyare payunir ang pagtambong sa miting uban sa mga regular ug espesyal payunir!
3. Nganong maayo kaayong mag-oksilyare payunir panahon sa Memoryal?
3 Sa Marso ug Abril: Kadtong nakapahimulos sa kanhing kahikayan sa pag-oksilyare payunir sa bulan sa Memoryal nga 30 oras lang ang kab-otonon makahimo nag dobleng “halad sa pagdayeg”! (Heb. 13:15) Ang Marso ug Abril maoy maayo kaayong bulan sa pagpalapad sa atong ministeryo ingong oksilyare payunir. Kada tuig, sulod sa maong mga bulan, kita malipay sa pagpakigbahin sa kampanya sa pagdapit sa uban sa pagtambong sa Memoryal. Dugang pa, tungod kay daghan ang magpalapad sa ilang ministeryo panahon sa Memoryal, makauban nato ang lainlaing mga magmamantala. Human sa Memoryal, duawon nato ang mga interesadong mitambong ug dasigon sila sa pagpaminaw sa espesyal nga pakigpulong. Dili ka ba madasig sa pagpahimulos niining dugang kahigayonan sa pag-oksilyare payunir?—Luc. 6:45.