Tagamtama ang Kalipay Niining Panahon sa Memoryal!

1. Unsa ang usa ka paagi nga kita mas malipay niining panahon sa Memoryal?

¹ Gusto ba nimong mas malipay sa Marso, Abril, ug Mayo? Ang usa ka paagi mao ang paggugol ug mas daghang panahon sa ministeryo ug, kon mahimo, pag-oksilyare payunir. Sa unsang paagi kini makadugang sa imong kalipay?

2. Nganong ang paggugol ug daghang panahon sa ministeryo makadugang sa atong kalipay?

² Dugangi ang Imong Kalipay: Gilalang kita ni Jehova nga may katakos nga mobatig kalipay ug katagbawan tungod sa pagsimba kaniya ug sa pag-atiman sa atong espirituwal nga panginahanglan. (Mat. 5:3) Gidisenyo usab niya kita nga malipay dihang mohatag kita sa uban. (Buh. 20:35) Pinaagi sa ministeryo, kita makasimba sa Diyos ug makatabang usab sa mga tawo. Busa, kon mogugol tag daghang panahon sa ministeryo, kita mas malipay. Dugang pa, kon pirme tang magsangyaw, kita mas mahanas. Ug kon kita mahanas, modako ang atong kompiyansa ug dili na ta kaayo kulbaan. Daghan tag kahigayonan nga makasangyaw ug makasugod ug mga Bible study. Tungod niini, kita mas malipay sa atong ministeryo.

3. Nganong maayong mag-oksilyare payunir sa Marso ug Abril?

³ Ang Marso ug Abril maoy maayong mga bulan sa pag-oksilyare payunir tungod kay makapili kitag 30 o kaha 50 ka oras nga kab-otonon. Dugang pa, sugod sa Marso 22, Sabado, ug hangtod sa Lunes, Abril 14, adlaw sa Memoryal, kita makigbahin sa kampanya sa pagpangimbitar para sa Memoryal. Magmadasigon gayod unya ang mga kongregasyon kay daghan ang mag-alagad “abaga sa abaga” sa pagkobreg mas dakong teritoryo sulod sa gigahing panahon.—Sof. 3:9.

4. Kon gusto natong mag-oksilyare payunir, unsay angay natong himoon?

⁴ Pangandam Karon: Susihag usab ang imong eskedyul ug paghimog kausaban aron makagugol kag mas daghang oras sa pagsangyaw sa usa ka bulan o labaw pa. Iampo kana kang Jehova. (Sant. 1:5) Hisgoti kana sa imong pamilya ug sa uban sa kongregasyon. (Prov. 15:22) Imong masayran nga bisan pa sa problema sa panglawas o full-time nga trabaho, matagamtam usab nimo ang kalipay sa pag-oksilyare payunir.

5. Unsay resulta kon mogugol tag daghang panahon sa ministeryo niining panahon sa Memoryal?

⁵ Gusto ni Jehova nga magmalipayon ang iyang mga alagad. (Sal. 32:11) Kon mogugol tag daghang panahon sa pagsangyaw niining panahon sa Memoryal, dili lang makadugang kini sa atong kalipay kondili makapalipay usab kini sa atong langitnong Amahan.—Prov. 23:24; 27:11.