“Bug-os Magpamatuod sa Maayong Balita”
1. Unsa ang maayong balita nga atong ipaambit sa uban?
1 Sa kalibotan nga tagsa ra ang maayong balita, pribilehiyo nato “nga bug-os magpamatuod sa maayong balita bahin sa dili-takos nga kalulot sa Diyos.” (Buh. 20:24) Kini naglakip sa pagpahibalo sa mga tawo nga ang “kataposang mga adlaw” pagapulihan sa matarong nga bag-ong kalibotan ni Jehova, diin “ang unang mga butang nangagi na.” (2 Tim. 3: 1-5; Pin. 21:4) Nianang panahona wala na unyay sakit. (Isa. 33: 24) Ang nangamatayng mga minahal manggula sa lubnganan ug mahiusa na usab sa ilang pamilya ug mga higala. (Juan 5: 28, 29) Ang tibuok yuta mahimong usa ka nindot nga paraiso. (Isa. 65:21- 23) Kini maoy pipila lamang sa maayong balita nga mahimo natong ipaambit sa uban!
2. Nganong ang panahon sa Memoryal maoy usa ka linaing kahigayonan aron kita bug-os makapamatuod sa maayong balita?
2 Ang mga bulan sa Marso, Abril ug Mayo maghatag kanatog talagsaong kahigayonan aron sa pagpahayag sa maayong balita. Maayo ang klima ug dugay mosalop ang adlaw sa daghang bahin sa kalibotan niining mga bulana, busa haom nga mogugol kitag taas nga panahon diha sa ministeryo. Dugang pa, ang labing hinungdanong okasyon sa tuig, ang Memoryal, pagahimoon sa tibuok kalibotan human sa pagsalop sa adlaw sa Sabado, Marso 22. Karon na ang panahon nga kita mangandam aron makapakigbahin nga mas bug-os pa sa buluhaton.
3. Unsay makatabang kanato aron mapauswag ang atong buluhaton ingong pamilya?
3 Pag-oksilyare Payunir: Mahikay ba nimo ang imong eskedyul aron makaoksilyare payunir ka sa usa, duha o sa tulo ka bulan? Mas maayo tingali kon inyo kining hisgotan sa inyong sunod nga pagtuon sa pamilya. Pinaagi sa pagtambayayongay, makaoksilyare payunir ang usa o daghan pang membro sa pamilya. (Prov. 15:22) Iampo kini, ug masinati nimo ang mga panalangin ni Jehova sa imong mga paningkamot. (Prov. 16:3) Bisan pag walay makaoksilyare payunir sa inyong pamilya, angayng himoong tumong sa tanang membro nga dugangan ang ilang panahon sa pagpakig-ambit sa ministeryo uban niadtong makapayunir.
4. Unsaon nato pag-eskedyul ang atong mga kalihokan aron makaoksilyare payunir bisag kita nagtrabaho nga bug-os panahon?
4 Kon ikaw nagtrabaho nga bug-os panahon, makatabang kanimo ang maayong eskedyul aron ka makaoksilyare payunir. Tingali magamit nimo ang pipila ka minuto sa tingpaniudto aron makasangyaw. Makapangayo ka usab ug personal nga teritoryo duol sa inyong balay o sa imong gitrabahoan aron makasangyaw kag usa ka oras o kapin pa, una o human sa trabaho. Madugangan nimo ang imong panahon sa pagsangyaw kon himoon nimo sa ubang mga bulan ang mga butang nga dili ra kaayo importante ug igugol nimo ang tibuok adlaw sa hinapos sa semana diha sa ministeryo. Ang pipila migamit ug usa o duha ka adlawng bakasyon sa ilang trabaho aron igugol diha sa pagsangyaw.
5. Unsaon nimo pagtabang ang mga edaran o mga masakiton aron sila makaoksilyare payunir?
5 Kon ikaw edaran, maluyahon o masakiton, makaoksilyare ka gihapon pinaagig paggahin ug gamayng panahon diha sa ministeryo matag adlaw. Hangyoa si Jehova aron makabaton kag “gahom nga labaw sa kasarangan.” (2 Cor. 4:7) Ang usa ka sister nakaoksilyare sa edad nga 106! Sa tabang sa iyang Kristohanong mga paryente ug sa uban diha sa kongregasyon, siya nakasangyaw sa balay ug balay, nakabalikduaw, nakadumalag mga pagtuon sa Bibliya, ug nakig-ambit sa uban pang bahin sa ministeryo. Siya nakatabang nga masugdan ug pagtuon sa Bibliya ang napulo ka tawo. Siya miingon, “Samtang akong gihunahuna kining talagsaong pribilehiyo nga ako nakaalagad ingong oksilyare payunir, ang akong kasingkasing natugob sa gugma ug pagpabili kang Jehova, sa iyang Anak, ug sa Iyang mahigugmaong organisasyon. Buot gayod kong moingon ‘Salamat Jehova!’”
6. Sa unsang paagi makaoksilyare payunir ang bawtismadong mga batan-on nga estudyante?
6 Kon ikaw usa ka bawtismadong batan-on nga nag-eskuyla pa, makaoksilyare payunir ka usab. Sama niadtong mga nagtrabaho sa bug-os panahon, magamit nimo ang mga hinapos sa semana diha sa ministeryo. Tingali makasangyaw kag usa ka oras o kapin pa human sa klase sulod sa pipila ka adlaw. Aduna bay adlaw nga walay klase nga imong magamit sa pagpakig-ambit diha sa ministeryo? Kon buot nimong mag-oksilyare payunir, ipakighisgot kana sa imong mga ginikanan.
7. Unsay mahimo sa mga ansiyano aron mapauswag ang kadasig sa ministeryo panahon sa Memoryal?
7 Pauswaga ang Kadasig: Dakog mahimo ang maayong panig-ingnan sa mga ansiyano aron mapauswag ang kadasig sa kongregasyon. (1 Ped. 5:2, 3) Makahimo silag dugang eskedyul sa pagsangyaw alang niadtong buot mosangyaw sa sayo sa buntag, human sa klase, o human sa trabaho. Ang magtatan-aw sa kanataran angayng magseguro nga adunay kuwalipikadong magmamantala nga itudlo nga modumala sa pagsangyaw ug adunay igong teritoryo, mga magasin ug literatura nga magamit sa mga bulan sa espesyal nga buluhaton.
8. Unsay atong makat-onan sa kasinatian sa usa ka kongregasyon?
8 Sa usa ka kongregasyon, ang mga ansiyano nagsugod pagdasig sa pag-oksilyare payunir nga abante ug pila ka bulan. Matag semana ilang gipahibalo sa kongregasyon kon pila ka magmamantala ang nag-oksilyare payunir. Kini nagdasig niadtong nagtinguha nga dugangan ang ilang panahon sa pagministeryo tungod kay daghan usab ang misuportar niana. Aduna usay dugang eskedyul nga gihikay alang sa pagsangyaw sa sayo sa buntag ug sa magabii. Ingong resulta, 53 ka magmamantala ang nag-oksilyare payunir sa Abril, halos katunga kini sa kongregasyon!
9. Nganong ang panahon sa Memoryal haom alang niadtong mokuwalipikar nga mahimong dili-bawtismadong magmamantala?
9 Tabangi ang Uban sa Pagsangyaw: Kon ang mga bag-ohan ug ang mga batan-on kuwalipikado na nga mahimong magmamantala, mahimo tingali silang mokuyog niadtong mga eksperyensiyado na diha sa kanataran. Haom kaayo ang panahon sa Memoryal alang niini diin daghan sa kongregasyon ang buot mopauswag sa ilang buluhaton. Aduna ka bay gidumalahag pagtuon sa Bibliya nga nagpakitag pag-uswag ug nagkinabuhi na uyon sa matarong nga mga sukdanan ni Jehova? Aduna ka bay mauswagon ug buotang mga anak nga dili pa magmamantala? Kon buot nilang mahimong dili-bawtismadong magmamantala ug nakita usab nimo nga sila kuwalipikado na, angay nga imo kining ipahibalo sa usa sa mga ansiyano. Ang nagadumalang magtatan-aw magtudlo ug duha ka ansiyano aron hisgotan ang maong butang uban kanimo ug sa imong anak o sa imong gidumalahag pagtuon.
10. Unsay mahimo sa mga ansiyano aron matabangan ang mga dili aktibo?
10 Ang umaabot nga mga bulan maoy haom usab alang niadtong mga dili aktibo nga makig-uban pag-usab sa kongregasyon. Angayng maningkamot gayod ang mga magtatan-aw sa CBS ug ang ubang mga ansiyano sa pagduaw ug mainitong magdapit kanila aron sa pagpakigbahin pag-usab sa ministeryo. Kon sila nahimong dili aktibo sa dugayng panahon, angayng makig-estorya kanila ang duha ka ansiyano aron masayran kon kuwalipikado pa ba sila nga mosangyaw.—km 11/00 p. 3.
11. Unsa ang kinadak-ang kapahayagan “sa dili-takos nga kalulot sa Diyos?”
11 Pangandam Alang sa Memoryal: Ang lukat mao ang kinadak-ang kapahayagan “sa dili-takos nga kalulot sa Diyos.” (Buh. 20:24) Minilyong tawo sa tibuok kalibotan ang nagpabili niana pinaagig pagsaulog sa Memoryal sa kamatayon ni Jesus human sa pagsalop sa adlaw sa Sabado, Marso 22. Kita gidasig nga dapiton ug tabangan ang tanang matinud-anog kasingkasing nga mga tawo sa pagtambong niining hinungdanong okasyon nga nagpamatuod sa dili takos nga kalulot ni Jehova ngadto sa katawhan.
12. Kinsa ang angay natong dapiton sa Memoryal?
12 Ilista kadtong buot nimong dapiton. Mahimo nimong ilakip niana ang imong mga paryente, silingan, mga kauban sa trabaho o sa tunghaan, mga gidumalahag pagtuon kaniadto ug karon, ug ang tanang ginaduaw nimo nga regular. Kon ang pipila sa imong gidapit mangutana bahin sa Memoryal, mahimo nimong gamiton ang apendise bahin sa Panihapon sa Ginoo sa panid 206-8 sa librong Gitudlo sa Bibliya. Lagmit pinaagi niini makasugod kag usa ka pagtuon sa Bibliya, sanglit imo mang ipresentar ang publikasyon nga gigamit sa pagdumalag pagtuon.
13. Sa unsang paagi gipanalanginan ni Jehova ang paningkamot sa duha ka magmamantala sa pagdapit sa uban aron makatambong sa Memoryal?
13 Ang usa ka sister naglista ug 48 ka pamilya nga iyang dapiton. Iyang gimarkahan ang ilang ngalan ug gibutangag petsa kon kanus-a niya sila imbitaha. Malipayon gayod siya tungod kay 26 sa iyang mga gidapit ang mitambong sa Memoryal! Gidapit sa usa ka brader nga tag-iyag tindahan ang iyang trabahante nga kanhi usa ka pari. Ang maong tawo mitambong ug human niana siya miingon, “Mas daghan kog nakat-onan sa Bibliya sulod lamang sa usa ka oras kon itandi sa 30 ka tuig nakong pagka-Katoliko.” Wala madugay human sa Memoryal, gidumalahan siyag pagtuon gamit ang librong Gitudlo sa Bibliya.
14. Unsang tibuok-kalibotang kampanya ang pagasugdan sa Marso 1?
14 Kampanya: Sugod sa Sabado, Marso 1, hangtod sa Marso 22, ipanagtag ang espesyal nga imbitasyon alang sa Memoryal sa tibuok kalibotan. Buot natong makig-ambit nga bug-os niining maong hinungdanong kampanya. Labing maayo kon atong ihatag ang imbitasyon nga personal kay sa ibilin lamang kana diha sa pultahan. Apan kon dako ang inyong teritoryo, ang mga ansiyano na ang magtino kon angay bang binlan ug imbitasyon ang mga balay nga walay tawo. Sa mga hinapos sa semana itanyag usab nato ang bag-ong mga magasin.
15. Unsaon nato pagpresentar ang imbitasyon sa Memoryal?
15 Sanglit limitado ang panahon sa atong pagpanagtag sa mga imbitasyon, labing maayo kon himoon natong mubo ang atong presentasyon. Magmahigalaon ug magmainiton. Mahimo kang moingon: “Buot unta ka namong dapiton, uban ang imong pamilya, ug mga higala sa pagtambong sa usa ka hinungdanong okasyon nga himoon sa Marso 22. Ania ang imong imbitasyon, ug ang mga detalye alang sa maong okasyon anaa na diha.” Ang tagbalay lagmit daghag pangutana, o modawat sa maong imbitasyon ug moingon nga siya motambong. Ilista ang mga nagpakitag interes ug hikaya ang pagbalikduaw.
16. Unsang kasinatian ang nagpakita sa kahinungdanon sa kampanya sa pagdapit sa mga tawo nga motambong sa Memoryal?
16 Sa miaging tuig nakaplagan sa usa ka sundalo ang imbitasyon diha sa iyang pultahan. Midesidir siya sa pagtambong, apan gikinahanglan pa nga mananghid siya sa iyang sarhento. Sa dihang iyang gipakita ang imbitasyon sa sarhento, wala makatingog ang sarhento ug miingon nga Saksi usab ang iyang mga ginikanan ug tigtambongan diay siya sa mga tigom uban nila. Ingong resulta, gitugtan siya ug giubanan pa gyod siya sa sarhento sa pagtambong sa Memoryal!
17. Sa unsang paagi nato ikapasundayag nga wala nato sipyata ang katuyoan sa dili-takos nga kalulot sa Diyos?
17 Pagpakitag Apresasyon: Samtang taliabot na ang pagsaulog sa Memoryal sa 2008, hinaot nga palandongon sa matag usa kanato ang dili-takos nga kalulot ni Jehova. Si apostol Pablo misulat: “Kami nangaliyupo usab kaninyo nga dili dawaton ang dili-takos nga kalulot sa Diyos ug sipyaton ang katuyoan niini.” (2 Cor. 6:1) Sa unsang paagi nato ikapasundayag nga wala nato sipyata ang katuyoan sa dili-takos nga kalulot sa Diyos? Si Pablo misulat: “Apan sa tanang paagi among ginarekomendar ang among kaugalingon nga mga ministro sa Diyos.” (2 Cor. 6:4) Busa, ipasundayag nato ang atong pagpabili sa gasa ni Jehova pinaagi sa atong maayong buhat ug pagkamasiboton sa pagsangyaw sa maayong balita. Panahon sa Memoryal, aduna kitay linaing kahigayonan sa pagpauswag sa atong buluhaton, nga bug-os magpamatuod sa maayong balita.
[Kahon sa panid 3]
Kinsa ang Makaoksilyare Payunir?
◼ Mga pamilya
◼ Mga may trabaho nga bug-os panahon
◼ Mga tigulang ug maluyahon
◼ Mga estudyante
[Kahon sa panid 4]
Sa Dihang Managtag ug Imbitasyon sa Memoryal:
◼ Himoang mubo; sulti nga madasigon
◼ Ilista ang mga nagpakitag interes ug balikduawa
◼ Itanyag ang mga magasin sa hinapos sa semana