Padayong Isaysay ang Katingalahang mga Buhat ni Jehova

1. Unsa ang pipila sa katingalahang mga buhat ni Jehova nga ilabinang gipabilhan nimo?

¹ Walay ikatandi sa atong dakong Diyos, si Jehova! Si David misulat: “Daghang butang ang imong nabuhat, Oh Jehova nga Diyos ko, bisan ang imong katingalahang mga buhat ug ang imong mga hunahuna nganhi kanamo; walay mausa nga ikatandi kanimo.” (Sal. 40:5) Ang katingalahang mga buhat ni Jehova naglakip sa paglalang sa uniberso, sa Mesiyanikong Gingharian, mga buhat sa mahigugmaong-kalulot ngadto sa iyang katawhan, ug sa tibuok-kalibotang kalihokan sa pagwali. (Sal. 17:​7, 8; 139:14; Dan. 2:44; Mat. 24:14) Ang gugma kang Jehova ug ang pagpabili sa tanan niyang nahimo motukmod kanato sa pagsaysay sa uban bahin kaniya. (Sal. 145:5-7) Sa Marso, Abril, ug Mayo, kita adunay kahigayonan sa paghimo niini nga mas bug-os pa.

2. Sa unsang paagi kita personal nga makabenepisyo pinaagi sa pag-oksilyare payunir?

² Ingong Oksilyare Payunir: Mahikay ba nimo ang imong eskedyul aron makagahin ug 50 ka oras diha sa ministeryo sulod sa usa o duha niining mga bulan sa espesyal nga kalihokan? Takos gayod kini sa bisan unsang mga pagpasibo nga imong himoon sa imong rutina. (Efe. 5:16) Nakaplagan sa daghan nga ang pag-oksilyare payunir makatabang kanila sa pagpauswag sa kalidad sa ilang ministeryo. Sila nahimong mas komportable diha sa pultahan ug mas daghag kahigayonan sa paggamit sa Bibliya. Ang paggahin ug dugang panahon diha sa ministeryo mas makapasayon sa pagpalo-ap sa bisan unsang interes nga ilang makaplagan, ug ang uban nga wala pa makadumala ug pagtuon sa Bibliya kanhi nakasugod nag usa sa dihang nag-oksilyare payunir. Tungod kay ang pag-oksilyare payunir naglangkit man nga gamiton nato ang atong kaugalingon sa pagtabang sa uban, kini maoy usa ka makapalipay nga kalihokan.​—Buh. 20:35.

3. Sa unsang paagi nakaoksilyare payunir ang uban bisan pa sa malisod nga mga kahimtang?

³ Ayaw dayon paghinapos nga ang imong mga kahimtang dili magtugot kanimo sa pag-oksilyare payunir. Ang usa ka ansiyano nga nag-oksilyare payunir sa miaging tuig dunay duha ka anak ug may bug-os-panahong trabaho. Giunsa man kadto paghimo sa maong puliki nga igsoon? Sanglit nagtrabaho man siya sulod sa semana, giplano niyang mosangyaw ug mas dugay sa mga hinapos sa semana, nga mosugod sa pagsangyaw diha sa kadalanan sa alas 7:00 s.b. sa mga Sabado. Ubay-ubay diha sa kongregasyon nga may susamang kahimtang nagpayunir usab, ug sila nagpaluyo ug nagdasig sa usag usa. Sa laing kongregasyon, usa ka 99-anyos nga igsoong babaye ang nakahukom sa pagpayunir sa Mayo human dapita sa iyang anak nga babaye sa pag-uban kaniya. Ang uban diha sa kongregasyon miabag ning maong tigulang nga igsoong babaye sa pagpamalaybalay ug sa mga pagtuon sa Bibliya pinaagi sa pagtulod sa iyang wheelchair. Nakig-ambit usab siya sa pagsangyaw pinaagig telepono, pagsangyaw sa kadalanan, ug pinaagig sulat. Kombinsido siya nga kini nahimo, dili tungod sa iyang kaugalingong kusog, kondili sa tabang lamang ni Jehova.​—Isa. 40:29-31.

4. Unsang mga butang ang mahimo natong tagdon sa dihang mohimog eskedyul sa pag-oksilyare payunir?

⁴ Sulayi ang paghimog eskedyul nga mohaom pag-ayo sa imong mga kahimtang. Ang sampol nga mga eskedyul ning maong gula hayan makatabang. Bug-os-panahon ka bang nagtrabaho o nagtungha? Ang eskedyul nga pangunang magamit ang mga hinapos sa semana mahimong mao ang labing praktikal alang kanimo. Kon ikaw may suliran sa panglawas ug ang imong kusog dili motugot kanimo sa pagsangyaw ug mas dugay, ang eskedyul nga nagkinahanglan ug diyutayng panahon matag adlaw mahimong mao ang labing maayo. Pakigsulti sa uban bahin sa imong tinguha sa pag-oksilyare payunir. Basin himoon usab nila kini nga ilang tumong.

5. Unsa ang mga tumong nga mahimong kab-oton sa mga batan-on sa Marso, Abril, ug Mayo?

⁵ Mga Paagi Aron Makaambit ang mga Batan-on: Si Jehova malipay sa dihang ang mga batan-on mosaysay bahin sa iyang katingalahang mga buhat. (Sal. 71:17; Mat. 21:16) Kon ikaw usa ka batan-on ug bawtismado, hayan makaoksilyare payunir ka sulod sa usa o kapin pang mga bulan panahon sa imong bakasyon sa eskuylahan. Kon dili ka makaoksilyare payunir, makahimo ka bag espesipikong mga tumong sa pagdugang sa imong pakig-ambit ug pagpauswag sa kalidad sa imong ministeryo nianang mga bulana? Kon ikaw nakig-ambit na sa ministeryo kauban sa imong mga ginikanan apan dili pa bawtismadong magmamantala, karon mao na ang maayong panahon sa pagsulay nga mahimong kuwalipikado. Dili ka angayng mobati nga ikaw kinahanglang batid sa pagpanubag sa mga pangutana sa Bibliya o kinahanglan mong mahibaloan ang sama sa nahibaloan na sa bawtismadong mga hamtong. Nasabtan ba nimo ang paninugdang mga pagtulon-an sa Bibliya? Gituman ba nimo ang moral nga mga sukdanan sa Bibliya? Gusto ba nimong mailhan ingong usa sa mga Saksi ni Jehova? Nan sultihi ang imong mga ginikanan maylabot niini. Sila makahikay sa pagduol sa mga ansiyano uban kanimo aron sa pagsusi kon imo bang nakab-ot ang mga kinahanglanon.​—Tan-awa ang librong Atong Ministeryo, mga panid 98-9.

6. Sa unsang paagi atong matabangan ang mga ginatun-an sa Bibliya nga mahimong mga magmamantala sa maayong balita?

⁶ Pagtabang sa Uban sa Pagsangyaw: Ang mauswagong mga ginatun-an sa Bibliya mahimong kuwalipikado sa pagduyog kanato ingong mga magmamantala sa umaabot nga mga bulan sa espesyal nga kalihokan. Kon ikaw adunay ginatun-an sa Bibliya kinsa maayo ug pag-uswag, patabang sa imong magtatan-aw sa pagtuon sa libro o sa magtatan-aw sa pag-alagad. Ang usa kanila makauban kanimo sa pagtuon aron matimbangtimbang ang pag-uswag sa maong estudyante. Kon mahimong kuwalipikado ang maong estudyante ug magtinguha nga mahimong magmamantala, ang nagadumalang magtatan-aw maghikay ug duha ka ansiyano sa pagpakigkita kanimo ug sa estudyante. (Tan-awa Ang Bantayanang Torre, Nobyembre 15, 1988, panid 17.) Sa dihang aprobahan ang estudyante, sugdi dayon ang pagbansay kaniya diha sa ministeryo.

7. Sa unsang paagi matabangan ang di-regular ug di-aktibo nga mga magmamantala?

⁷ Ang mga magtatan-aw sa pagtuon sa libro buot mohatag ug linaing pagtagad kang bisan kinsa nga di-aktibo o di-regular diha sa ilang grupo. Personal silang dapita sa pag-uban kanimo diha sa ministeryo. Kon sila nahimong di-aktibo sulod na sa dugayng panahon, mas maayo nga duha ka ansiyano ang makigsulti una kanila aron sa pagsusi kon kuwalipikado ba sila. (Tan-awa ang “Pangutana” sa Nobyembre 2000 nga Atong Ministeryo sa Gingharian.) Ang kasibot sa kongregasyon sulod niining mga bulana sa espesyal nga kalihokan mahimong magdasig kanila nga regular nga makig-ambit pag-usab diha sa ministeryo.

8, 9. Unsay mahimo sa mga ansiyano sa pagpukaw sa kadasig alang sa espesyal nga kalihokan?

⁸ Pangandam Karon Alang sa Dugang Kalihokan: Mga ansiyano, sugdi na karon ang pagpukaw sa kadasig diha sa kongregasyon alang sa pag-oksilyare payunir. Dako kamog mahimo pinaagi sa inyong positibong mga komento ug maayong panig-ingnan. (1 Ped. 5:3) Pila ang kinatas-ang ihap sa mga nag-oksilyare payunir sa kongregasyon sa miagi? Mapalabwan ba kana niining tuiga? Ang mga magtatan-aw sa pagtuon sa libro ug ang ilang mga katabang angayng mangitag mga paagi sa pagdasig sa tanan diha sa grupo sa pagpauswag sa ilang kalihokan. Ang mga magtatan-aw sa pag-alagad mahimong mag-eskedyul ug dugang mga tigom sa dayon nang pagsangyaw. Pahibaloa daan ang kongregasyon kon unsay nahimong kahikayan. Paneguroa nga ang takos nga mga magmamantala maoy maasayn sa pagpanguna ug nga ang mga tigom sa dayon nang pagsangyaw magsugod ug matapos nga untop sa panahon. (Tan-awa ang “Pangutana” diha sa Septiyembre 2001 nga Atong Ministeryo sa Gingharian.) Angayng hikayon usab sa magtatan-aw sa pag-alagad nga dunay igong teritoryo, mga magasin, ug literatura.

⁹ Sa miaging tuig ang mga ansiyano sa usa ka kongregasyon madasigong nagsugod ug sayo sa pagdasig nga mag-oksilyare payunir, diin ubay-ubay kanila ang mitunol ug mga aplikasyon. Sila naghikay ug dugang mga tigom sa dayon nang pagsangyaw​—ang una sa alas 5:30 s.b. alang sa pagsangyaw sa kadalanan, ang ikaduha sa alas 3:00 s.h. alang niadtong manggawas sa eskuylahan, ug ang ikatulo sa alas 6:00 s.g. alang niadtong manggawas sa trabaho. Dugang pa, tulo ka tigom sa dayon nang pagsangyaw ang gihikay sa mga adlawng Sabado. Ang kongregasyon misanong uban sa 66 nga nagpalista ingong mga oksilyare payunir sa Abril!

10. Sa unsang paagi makaandam ang mga pamilya sa pagpauswag sa ilang kalihokan?

¹⁰ Nganong dili mag-eskedyul ug panahon sa inyong sunod nga pagtuon sa pamilya aron makahikay ug realistikong mga tumong alang sa umaabot nga mga bulan? Uban sa maayong kooperasyon ug pagplano, ang pipila o ang tanan diha sa pamilya makahimo sa pag-oksilyare payunir. Kon dili man kana posible, paghimog tumong sa pagpauswag sa imong kalihokan pinaagi sa paglugway sa imong naandang mga yugto sa pag-alagad o pinaagi sa pagsangyaw sa dugang mga okasyon. Iampo kining butanga ingong usa ka pamilya. Makasalig ka nga panalanginan ni Jehova ang imong mga paningkamot.​—1 Juan 3:22.

11. (a) Unsang katingalahang mga butang ang nalampos sa halad ni Kristo? (b) Unsang orasa ug asang dapita saulogon ang Memoryal sa lokal nga dapit?

¹¹ Ang Labing Katingalahang Buhat sa Diyos: Ang labing dakong kapahayagan sa gugma ni Jehova mao ang paghatag sa iyang Anak ingong lukat alang kanato. (1 Juan 4:​9, 10) Ang halad lukat nagtaganag legal nga basehanan aron matubos ang katawhan gikan sa sala ug kamatayon. (Roma 3:​23, 24) Ang giula nga dugo ni Jesus nagpalig-on sa bag-ong pakigsaad, nga nagpaposible alang sa di-hingpit nga mga tawo nga mahimong sinagop nga mga anak sa Diyos nga may kalaomang magmando sa langitnong Gingharian. (Jer. 31:31-34; Mar. 14:24) Labing hinungdanon, ang hingpit nga pagkamasinugtanon ni Jesus nagbalaan sa ngalan ni Jehova. (Deut. 32:4; Prov. 27:11) Sa Dominggo, Abril 4, human sa pagsalop sa adlaw, ang Memoryal sa kamatayon ni Kristo saulogon sa tibuok kalibotan.

12. Sa unsang paagi ang pagtambong sa pagsaulog sa Panihapon sa Ginoo makabenepisyo sa mga interesado?

¹² Ang pagsaulog sa Panihapon sa Ginoo nagabayaw sa katingalahang mga buhat ni Jehova. Ang pakigpulong mopalig-on sa atong pagpabili sa nahimo ni Jehova sa pagtagana sa lukat. Ang mga interesado nga motambong makamatikod sa uban pang katingalahang mga buhat sa Diyos. Makita nila ang panaghiusa ug mainitong gugma nga gitudlo ni Jehova nga ipasundayag sa iyang katawhan. (Efe. 4:​16, 22-24; Sant. 3:​17, 18) Ang pagtambong niining hinungdanon nga okasyon makahimog dakong epekto sa panghunahuna sa usa ka tawo, busa gusto natong daghan ang makatambong kutob sa maarangan.​—2 Cor. 5:​14, 15.

13, 14. Kinsay angay natong imbitahon sa Memoryal, ug ngano?

¹³ Pagdapit sa Uban nga Motambong: Pangandam na dayon karon pinaagi sa paghimog listahan niadtong dapiton. Ang imong listahan kinahanglang maglakip sa di-magtutuong mga membro sa pamilya, silingan, kaila sa trabaho o eskuylahan, estudyante sa Bibliya kaniadto ug karon, ug ang tanan mong mga balikduaw. Angayng ilakip sa mga magtatan-aw sa pagtuon sa libro diha sa ilang listahan si bisan kinsang di-aktibo nga mga magmamantala.

¹⁴ Gamita ang pinatik nga mga imbitasyon sa Memoryal, ug imakenilya o tin-awng isulat niini ang oras ug dapit sa Memoryal. O kon gusto nimong gamiton ang imbitasyon nga makita diha sa likod nga hapin sa Marso 15, 2004, Bantayanang Torre o sa Marso 22, 2004, nga Pagmata! Samtang nagkaduol na ang Abril 4, pahinumdomi kadtong anaa sa imong listahan, sa personal man o pinaagig telepono.

15. Sa unsang paagi atong ikapakita ang pagkamaabiabihon sa gabii sa Memoryal?

¹⁵ Diha sa Memoryal: Paningkamoting sayo nga moabot sa gabii sa Memoryal. Ipakita ang pagkamaabiabihon pinaagi sa mainitong pagtimbaya sa mga bag-ohan. (Roma 12:13) Ikaw may espesyal nga kaakohan sa mga bisita nga imong gidapit. Pabatia silang giabiabi, ug ipailaila sila sa uban diha sa kongregasyon. Tingali makatabang ka sa pagpangitag kalingkoran nila diha sa imong duol. Ug kon may si bisan kinsa nga walay Bibliya o songbok, patan-awa sila sa imong songbok o sa lain. Human sa kasaulogan, magmaandam sa pagtubag sa bisan unsang pangutana nga ilang isukna. Kon may pipila nga mitambong sa unang higayon, pangutan-a kon gusto ba nilang mokat-on ug dugang bahin sa Pulong sa Diyos ug sa iyang katuyoan. Tanyagi nga dumalahon mo ang pagtuon sa Bibliya sa balay uban kanila.

16. Unsay mahimo aron matabangan kadtong mitambong sa paghimog espirituwal nga pag-uswag?

¹⁶ Padayong Tabangi Kadtong Mitambong: Sa mga semana pagkahuman sa Memoryal, kadtong nakatambong mahimong nanginahanglag dugang tabang. Naglakip kini niadtong kanhi regular nga tigtambongan sa mga tigom apan karon wala na kaayo makig-uban sa kongregasyon. Angayng magmaalisto ang mga ansiyano nga dili masayloan ang maong mga tawo, nga paningkamotang matino kon nganong mihunong na sila sa paghimog espirituwal nga pag-uswag. Ipasiugda kanila ang pagkadinalian sa mga panahon. (1 Ped. 4:7) Tabangi ang tanan nga makasabot sa kaayohan sa pagsunod sa awhag sa Kasulatan nga regular nga makigtigom uban sa katawhan sa Diyos.​—Heb. 10:​24, 25.

17. Nganong angay kitang magpadayon sa pagsaysay bahin sa katingalahang mga buhat ni Jehova?

¹⁷ Dili gayod nato bug-os matukib ang katingalahang mga buhat ni Jehova bisan pag mabuhi kita sa walay kataposan. (Job 42:​2, 3; Eccl. 3:11) Busa, dili gayod kita mahutdan ug mga butang nga niana kita magadayeg kaniya. Niining panahon sa Memoryal atong ikapasundayag ang atong pagpabili sa katingalahang mga buhat ni Jehova pinaagi sa paghimog linaing mga paningkamot sa pagpalapad sa atong ministeryo.

[Chart sa panid 4]

Makaoksilyare Payunir Ka ba Ginamit ang Usa Niining mga Eskedyula?

Marso Do L* Ma* M* Hu B Sa Total sa Usa ka Bulan

Kada Adlaw 2 1 1 1 1 1 5 51

Duha ka Adlaw 0 5 0 5 0 0 0 50

Hinapos sa 5 0 0 0 0 0 8 52

Abril Do L Ma M Hu* B* Sa Total sa Usa ka Bulan

Kada Adlaw 2 1 1 1 1 1 5 50

Duha ka Adlaw 0 0 0 0 5 5 0 50

Hinapos sa 5 0 0 0 0 0 8 52

Mayo Do* L* Ma M Hu B Sa* Total sa Usa ka Bulan

Kada Adlaw 2 1 1 1 1 1 4 51

Duha ka Adlaw 0 5 0 0 0 0 5 50

Hinapos sa 3 0 0 0 0 0 7 50

* Lima sa usa ka bulan