Unsa ang Imong mga Plano sa Abril?
1 Ang bulan sa Abril magsugod ug yugto sa mauswagong kalihokan sa kanataran alang sa daghan kanato. Sagad ang panahon maoy maayo ug kadtong nagaeskuwela anaa sa bakasyon, busa ang Abril napamatud-an nga maoy maayong bulan alang sa pagpahimutang ug personal nga mga tumong sa napauswag nga kalihokan diha sa ministeryo.
2 Unsang mga kahikayan sa pag-alagad sa kanataran ang gihimo sa inyong kongregasyon para sa Abril? Aduna bay dugang mga tigom sa dayon na nga pagsangyaw, apil na ang pagsangyaw sa magabii? Usbon mo ba ang imong eskedyol aron makapahimulos niining mga kahikayana ug moduyog sa uban diha sa pag-alagad sa kanataran? Sa temporaryo imo bang ikahiklin ang ubang kalihokan nga dili kaayo importante?
3 Dugang pa sa pagduaw niadtong nakatambong sa Memoryal, ang Abril maoy maayong panahon usab para sa dugang panlimbasog sa pagpangita sa mga interesado kinsa puliki kaayo sa pagpakighisgot sa miagi. Bisan tuod nahimo mo na ang pipila ka paninguha sa paghimog dugang pagpamatuod, nganong dili tan-awon ang imong mga talaan ug duawon sila pag-usab uban sa tinguha nga halingon ang ilang interes? Hayan ang mga pagduaw sa magabii magmabungahon.
4 Daghan ang naghikay sa pag-oksilyare payunir niining Abril. Kini nagalakip sa pipila nga may mga kaakohan sa pamilya ug bisan sa pipila nga adunay bug-os-panahong sekular nga mga trabaho. Ang 60-oras nga kinahanglanon nagakahulogan ug aberids nga 2 ka oras lang sa kada adlaw alang sa maong bulan. Ikaw ba makaduyog kanila sa Abril? Aduna pa ing panahon nga ikatunol mo ang imong aplikasyon.
5 Kon ang mga kahimtang dili magpatugot kanimo sa pag-oksilyare payunir sa Abril, basin posible alang kanimo sa pagpauswag sa imong kalihokan sa pag-alagad sa kanataran pinaagig paggugol ug panahon diha sa kanataran uban sa mga payunir o sa uban pa nga nagatinguha sa pagpauswag sa ilang ministeryo alang sa maong bulan. Imong mapaneguro nga si Jehova magapanalangin sa imong mga panikaysikay. Pinaagi sa iyang espiritu siya magahatag kanimog kusog sa pagkab-ot sa imong tumong.—Prov. 20:18; 21:5a.