Ato Bang Mahimo ang Abril 2000 nga Atong Labing Maayong Bulan Sukad?
1 Gabii sa Miyerkoles, Abril 19, mao ang labing maayong bahin sa atong tuig sa pag-alagad. Nianang adlawa, samtang ang adlaw padayong mosalop sa tibuok yuta, ang kada kongregasyon ug grupo sa mga Saksi ni Jehova sa tibuok kalibotan magsaulog sa Memoryal sa kamatayon ni Kristo. Sa bisan unsang time zone kita nagpuyo, ang paghandom sa halad ni Jesu-Kristo mao ang labing hinungdanong hitabo sa tuig. Ang petsa sa Memoryal gipakita diha sa gipaubang “Teokratikanhong Kalendaryo sa Abril 2000,” nga makaplagan sa panid 6 niini nga pasukip.
2 Ang tibuok bulan sa Abril maghatag kanatog talagsaong kahigayonan sa bug-os-kalag nga pagpasundayag sa atong pagpabili sa di-takos nga kalulot ni Jehova nga gipahayag pinaagi sa halad sa iyang Anak. Sa unsang paagi? Si apostol Pablo misulat: “Ang gugma nga iya sa Kristo nagatukmod kanamo, tungod kay mao kini ang among gikahukom, nga ang usa ka tawo namatay alang sa tanan; busa, namatay diay ang tanan; ug siya namatay alang sa tanan aron sila nga nagakinabuhi magkinabuhi dili na alang sa ilang kaugalingon, kundili alang kaniya kinsa namatay alang kanila ug gibangon.” (2 Cor. 5:14, 15) Oo, sulod sa Abril atong ikapasundayag nga kita nagkinabuhi, dili alang sa atong kaugalingon, kondili alang kaniya nga namatay alang kanato, nga naghimo niini nga atong labing maayong bulan sukad ingong mga ministro sa Gingharian!
3 Mopirma Aron Mag-oksilyare Payunir sa Abril: Ang apostol nga si Pablo nagpahilunag makapadasig nga panig-ingnan alang kanato sa dihang siya miingon: “Wala ko ipakamahal ang akong kalag kanako, basta lamang akong mahuman ang akong ginadagan ug ang ministeryo nga akong nadawat sa Ginoong Jesus, nga bug-os ipanaksi ang maayong balita bahin sa dili-takos nga kalulot sa Diyos.” (Buh. 20:24) Kita adunay samang pribilehiyo sa paghatag ug bug-os nga pagpamatuod bahin kang Jehova nga Diyos. Sa maong katuyoan, buot natong himoon ang Abril nga atong labing maayong bulan sukad diha sa oksilyare payunir nga kalihokan!
4 Kay may bug-os lima ka hinapos sa semana kini, ang Abril 2000 maoy ekselenteng bulan alang sa daghan nga magpayunir. Balik sa Abril 1997, sa dihang atong naabot ang atong tanang-panahong kinatas-ang ihap sa mga oksilyare payunir, ang 22,410 nga miambit naghawas sa 18 porsiyento sa total nga mga magmamantala. Duha-ug-tunga ka tuig sa ulahi, ang total nga gidaghanon sa mga magmamantala nga nagtaho sa Oktubre 1999 miuswag sa halos 6 porsiyento. Kini nagpasabot nga kita adunay tinuod nga kalagmitan nga malabwan ang atong kanhing kinatas-ang ihap sa mga oksilyare payunir. Dugang pa, ang kinahanglanong oras gikunhoran na, nga naghimo niini nga bahin sa pag-alagad nga maarangan ngadto sa mas daghan pa diha sa kongregasyon. Ang matag bawtismadong magmamantala angayng magtagad nga mainampoon kon siya ba makaoksilyare payunir niining Abril.
5 Ginamit ang “Teokratikanhong Kalendaryo sa Abril 2000” niini nga pasukip, planoha ang imong eskedyul karon alang sa sunod nga bulan. Magdesisyon kon unsang adlawa ikaw makapakig-ambit sa pag-alagad sa kanataran, ug sumaha ang tanang oras nga imong gibating ikaw makagugol sa kalihokan sa pagsangyaw sulod sa bulan. Ilakip ang panahon nga magugol nimo sa pagsangyaw sa uban sa pormal ug impormal nga paagi. Ang total hapit na ba sa kinahanglanong 50 ka oras alang sa mga oksilyare payunir? Kon kulang ka sa oras nga gikinahanglan, mahimo ba nimo ang bisan unsang laing mga kausaban sa imong eskedyul aron pahimuslan ang panahon sa pag-oksilyare payunir? Ikaw nagkinahanglang moaberids lamang ug usa ka oras ug 40 minutos matag adlaw aron makab-ot ang 50 oras alang sa bulan.
6 Karon nga ang kinahanglanong oras gikunhoran na usab alang sa mga regular payunir, imo na bang gipamalandong ang pagsulod sa bug-os-panahong ministeryo? Nganong hulaton ang sunod Septiyembre aron magsugod? Ang Abril mao ang maayong bulan sa pagsugod! Kon nagduhaduha ka sa imong katakos sa pagkab-ot sa 70 ka oras nga kinahanglanon alang sa mga regular payunir, nganong dili mag-oksilyare payunir sa Abril ug magtakda ug 70 ka oras ingong imong tumong? Sa dihang imong makita nga ikaw makahimo niini, ikaw lagmit mas makiling sa pag-aplay aron moduyog sa mga ranggo sa mga regular payunir sa labing madaling panahong maarangan.—Tan-awa ang Atong Ministeryo, mga panid 113-14.
7 Pakig-ambit sa Bug-os Ingong Magmamantala sa Maayong Balita: Alang kanatong tanan, mga magmamantala man ug mga payunir, ang atong tiunay nga gugma sa Diyos ug sa silingan magpalihok kanato nga magmabug-os-kalag sa pagbuhat sa tanan natong maarangan sa pag-alagad kang Jehova sumala sa atong personal nga mga kahimtang. (Luc. 10:27) Busa atong ikapakita nga “kita nagahago ug nagapanlimbasog sa atong kaugalingon, tungod kay gipahimutang nato ang atong paglaom diha sa usa ka buhing Diyos, kinsa usa ka Manluluwas sa tanang matang sa mga tawo, ilabina sa mga matinuohon.” (1 Tim. 4:10) Maoy hinungdan nga kita angayng magdahom nga makita ang 100-porsiyento nga pagpakig-ambit sa Abril, nga ang tanan makig-ambit sa bug-os diha sa buluhaton sa Gingharian.
8 Dili nato kalimtan ang awhag ni Jesus: “Dako ang anihon, apan diyutay ang mga mamumuo. Busa, pangamuyo kamo sa Agalon sa pag-ani nga magpadalag mga mamumuo ngadto sa iyang pag-ani.” Dihadiha human sa pagsulti niana, gitawag ni Jesus ang iyang 12 ka apostol ug gipadala sila sa pagsangyaw. (Mat. 9:37, 38; 10:1, 5, 7) Mga usa ka tuig sa ulahi, human nga ang 12 nabansay na pag-ayo sa kalihokan sa pagsangyaw, si Jesus “nagtudlo sa kapitoan nga uban pa ug gipadala sila,” nga naghatag kanila ug samang mga instruksiyon: “Ang anihon, sa pagkatinuod, dako . . . Busa pangamuyo kamo sa Agalon sa pag-ani nga magpadalag mga mamumuo ngadto sa iyang pag-ani.” (Luc. 10:1, 2) Ang basahon sa Bibliya sa Buhat nagtaho kon sa unsang paagi gitubag ni Jehova kadtong mga pag-ampoa. Sa Pentekostes 33 K.P., ang gidaghanon sa mga tinun-an mitubo ngadto sa mga 120. Dayon, ang sunodsunod nga mga kinatas-an nga 3,000 ug 5,000 ka tinun-an nakab-ot. (Buh. 1:15; 2:41; 4:4) Human niana, “ang gidaghanon sa mga tinun-an padayong miuswag.” (Buh. 6:7) Sa susama, sa modernong panahon, kita kinahanglan padayong mangamuyo sa Agalon alang sa dugang pang mga magwawali sa Gingharian! Uyon sa atong mga pag-ampo, ang matag magmamantala sa kongregasyon angayng maghimog tinong mga kahikayan sa pagpakig-ambit sa ministeryo matag bulan.
9 Palihog susiha pag-usab ang gipaubang “Teokratikanhong Kalendaryo sa Abril 2000.” Sanglit ang unang duha ka adlaw sa bulan maoy Sabado ug Dominggo, maplano ba nimo nga moambit sa pag-alagad nianang hinapos sa semana, nga makasugod ug sayo sa bulan? Makapaluyo ka ba sa matag “Adlaw sa Magasin” sulod sa bulan uban sa imong grupo sa Pagtuon sa Libro sa Kongregasyon? Komosta ang bahin sa paggugol ug usa ka oras o kapin pa sa matag Dominggo diha sa ministeryo? Makahikay ka ba sa pagpakig-ambit sa pipila ka pagsangyaw sa gabii? Ug ayaw kalimti sa pagpahimulos sa tanan nimong kahigayonan sa pagsangyaw sa impormal nga paagi diha sa trabaho, sa tunghaan, o samtang nagabuhat sa ubang adlaw-adlawng mga kalihokan. Markahi kon unsang mga adlawa nga ikaw makagugol ug pipila ka panahon sa ministeryo, ug gamita ang kalendaryo sa pagrekord sa imong oras sa pag-alagad sa maong bulan.
10 Ang Abril maoy nahiangayng panahon alang sa tanan nga takos ug giaprobahan na sa mga ansiyano aron magsugod sa pag-alagad ingong di-bawtismadong mga magmamantala. Kon ikaw may gitun-an sa Bibliya, ang mao bang tawo may igong pag-uswag aron moduol sa nagadumalang magtatan-aw sa paghangyo nga konsiderahon ingong usa ka magmamantala sa maayong balita? Kon ikaw adunay di-bawtismadong mga anak, imo bang gipakighisgot ang ilang espirituwal nga pag-uswag sa mga ansiyano? Dili ba kini ang maayong panahon alang kanila nga mosugod sa pagmantala?—Tan-awa ang Atong Ministeryo, mga panid 97-100.
11 Sa atong panlimbasog sa paghimo sa Abril 2000 nga atong labing maayong bulan sukad, gikinahanglan natong tanan nga makig-ambit sa ministeryo ug dayon itunol ang atong taho sa pag-alagad sa kanataran sa kataposan sa bulan. (Itandi ang Marcos 6:30.) Ang bag-ong di-bawtismadong mga magmamantala nga nakig-ambit sa pag-alagad sa kanataran sa unang higayon angayng dasigon kon unsaon pagtaho sa ilang binuhatan nga walay langan. Pinaagi sa pagbuhat sa atong bahin, kita makaamot ug maayo ngadto sa taho sa Abril ug sa dakong singgit sa pagdayeg nga ginatanyag kang Jehova pinaagi sa atong mga paningkamot sa pagsangyaw.
12 Ikuyog ang Uban Ngadto sa Memoryal: Dili ba makapalipay kanato nga makita ang bag-ong kinatas-ang ihap nga manambong sa 2000 nga Memoryal sa kamatayon ni Kristo? Oo! Kana magpasabot nga ang labing daghang katawhan sukad manambong sa pagpasundayag sa ilang pagpabili sa kinadak-ang kapahayagan sa gugma nga gihimo ni Jehova nga Diyos ug ni Jesu-Kristo alang kanato! (Juan 3:16; 15:13) Himoa ang bisan unsang gikinahanglang mga kahikayan aron walay mopugong kanimo ug sa imong pamilya sa pagtambong sa Memoryal.
13 Karon na ang panahon usab sa pagsugod nga dapiton ang uban ngadto sa Memoryal. Ilista ang tanan nga buot nimong makitang motambong. Ilakip ang si bisan kinsang mituon sa Bibliya sa nangagi, kadtong nagatuon karon, ug ang tanan nimong mga balikduaw. Idugang sa listahan ang imong mga kaila sa trabaho, sa tunghaan, ug sa kasilinganan, maingon man ang si bisan kinsa nga imong gikanegosyo. Ayawg kalimti nga ilakip ang ubang mga kaila ug imong mga paryente. Human mahikay ang listahan, sugdi ang pagpaabot ug mainiton, personal nga pagdapit sa matag usa. Ipatin-aw kon kanus-a ug asa himoa ang Memoryal. Sa dihang hapit na ang Abril 19, pahinumdomi kadtong anaa sa imong listahan, sa personal o pinaagig telepono. Tanyagi nga iuban nimo sila ngadto sa Memoryal nianang gabhiona.
14 Uyon sa nangaging pagtultol gikan sa Sosyedad, ang lawas sa mga ansiyano magahimog linaing paningkamot sa pagdasig sa tanang di-aktibong mga magmamantala sa teritoryo sa pagtambong sa Memoryal. (Mat. 18:12-14) Ang mga ansiyano buot mosubli sa sulat sa Sosyedad sa Pebrero 2, 1999. Ilista sa sekretaryo sa kongregasyon ang tanang di-aktibong mga magmamantala, ug ang magtatan-aw sa pag-alagad moasayn sa mga ansiyano sa pagduaw kanila ug pagdapit kanila ngadto sa Memoryal. Hayan tungod kay makadawat ug makapalig-ong duaw isip magbalantay sa labing madaling maarangan, kining di-aktibong mga igsoon matabangan nga maaktibo pag-usab diha sa ministeryo sa kanataran, bisan sulod sa Abril. Makapadasig alang kanila nga madapit sa pagpakig-ambit uban sa may-kasinatiang magmamantala diha sa pag-alagad sa kanataran.
15 Idasig ang Maayong Pagpaluyo sa Abril! Nagkinahanglan kini ug maayong koordinasyon sa bahin sa tanang ansiyano, ministeryal nga mga alagad, ug mga ulo sa pamilya aron sa paghimo sa Abril 2000 nga atong labing maayong bulan sukad. Ang mga ansiyano magmakugihon sa maayong pag-organisar sa tanang butang ug sa pagpanguna. (Heb. 13:7) Ang praktikal nga mga kahikayan kinahanglang himoon alang sa mga tigom sa dayon nang pagsangyaw sa mga adlaw sa semana ug sa mga hinapos-sa-semana. Ang dugang mga tigom sa dayon nang pagsangyaw mahimong hikayon para sa hapon-hapon na ug kilumkilom nga kalihokan. Ang kompletong eskedyul sa tanang giplano alang sa Abril angayng ipaskin diha sa information board. Kinahanglang adunay itudlo sa pagdumala sa matag naeskedyul nga tigom sa dayon nang pagsangyaw. Ang igong teritoryo angayng itagana sa pag-atiman sa mga panginahanglan sa matag grupo.
16 Sulod sa Abril ang mga magasing Bantayanang Torre ug Pagmata! igatanyag. Sa paninguhang makasugod ug mga pagtuon sa Bibliya sa balay, ang Gikinahanglan nga brosyur angayng itanyag sa tanang magpakitag interes. Busa, ang igong mga suplay sa mga magasin ug mga brosyur kinahanglang itagana.
17 Sa kataposan sa bulan, ang tanang tagdumala sa pagtuon sa libro ug ilang mga luyoluyo buot nga modasig sa matag usa sa ilang grupo sa pagtunol sa taho sa pag-alagad dihadiha pagkatapos sa bulan. Tingali mahimong ikatunol gani kini sa Dominggo, Abril 30. Dayon, sa dihang itala sa sekretaryo ang mga taho, kon iyang makita nga ang ubang mga magmamantala wala pa magreport, sa maluloton iyang pahinumdoman sila sa pagbuhat niana sa dili pa ang Mayo 6, sa dihang kinahanglan niyang ipadala ang taho sa kongregasyon ngadto sa Sosyedad. Mahimo niyang hangyoon ang mga tagdumala sa pagtuon sa libro nga tabangan siya sa pagkontak sa indibiduwal nga mga magmamantala.
18 Ang panahon sa Memoryal mao ang labing hinungdanong yugto sa tuig alang sa katawhan sa Diyos. Angay nga kana puliki kaayo nga panahon alang kanatong tanan diha sa pag-alagad kang Jehova. Mahitabo kana kon ang tanan makig-ambit sa bug-os nga maarangan ingong magmamantala sa maayong balita, kon kadtong makapirma sa pag-oksilyare payunir mohimo sa ingon, ug kon kita makugihon nga ikuyog ang uban ngadto sa Memoryal sa kamatayon ni Kristo. Makugihong moampo kita alang sa dagayang panalangin ni Jehova samtang manlimbasog kita sa paghimo sa Abril 2000 nga atong labing maayong bulan sukad, ang tanan alang sa kadayegan ug himaya sa Diyos!—Heb. 13:15.
[Kahon sa panid 3]
Mga Oksilyare Payunir
Atong Tanang-Panahong Kinatas-ang Ihap: 22,410
(Abril 1997)
[Kahon sa panid 4]
Total nga mga Magmamantala
Atong Tanang-Panahong Kinatas-ang Ihap: 133, 297
(Nobyembre 1999)
[Kahon sa panid 5]
Mitambong sa Memoryal
Atong Tanang-Panahong Kinatas-ang Ihap: 407,094
(1999)