Tabangi ang mga Bag-ohan sa Pag-uswag
1 Sa Abril 17, 1992, duolan sa 11.5 milyon ka tawo ang nagtigom sa tibuok kalibotan aron pagsaulog sa Memoryal sa kamatayon ni Kristo. Pagkamakapatagbaw ang paglantaw nianang mga panon sa katawhan nga nagahugop “ngadto sa bukid ni Jehova”! (Miq. 4:2) Sa pagkakaron adunay mga 7 ka milyon ka tawo kinsa nagapakitag igong interes sa matuod nga pagsimba ug kinsa dili pa publikong mga magdadayeg ni Jehova. Sa pagkatinuod ang mga pulong ni Jesus nga “ang alanihon dako” wala pa gayod maingon niini ka makahuloganon kaayo!—Mat. 9:37, 38.
2 Sa bulan sa Mayo, himoon ta ang espesyal nga panikaysikay sa pagbulig niadtong tanang nakatambong sa Memoryal sa pagpadayon sa pag-uswag. Ang tagdumala sa Pagtuon sa Libro sa Kongregasyon maoy manguna niini. Ang atong tulo ka pilo nga tumong mao ang (1) paghikay sa usa ka pagtuon sa Bibliya sa balay uban sa mga bag-ohan nga nakatambong sa Memoryal niining tuiga; (2) pagdasig niadtong nagtuon na nga mahimong takos nga di-bawtismadong mga magmamantala; ug (3) pagpauswag sa atong personal nga pakig-ambit diha ministeryo sa kanataran.
3 Sa abereds, 91,155 ka pagtuon sa Bibliya ang ginadumala dinhi sa Pilipinas kada bulan sa 1992 tuig sa pag-alagad. Ang mga magmamantala makadapit sa ilang tagdumala sa pagtuon sa libro sa pagkuyog kanila diha sa mga pagtuon sa Bibliya aron masinati uban sa mga estudyante. (km 5/81 p. 4) Ang pipila niining maong mga estudyante sa Bibliya tingali nagatambongan na karon sa mga tigom ug kuwalipikado nga makigbahin sa balaybalay nga buluhaton. Sila ba nagasangyaw nga impormal? Ila bang nakab-ot ang mga kuwalipikasyon alang sa mahimong di-bawtismadong mga magmamantala ingon sa gilaraw sa Atong Ministeryo, mga panid 97-9? Kon mao, isaysay kanila kon sa unsang paagi sila makasugod sa balaybalay nga buluhaton human nga mahimong di-bawtismadong mga magmamantala.
4 Dili nato angayng sayloan ang pagdasig sa usag usa diha sa atong Kristohanong panag-ubanay. (Heb. 10:24, 25) Kon ang bisan kinsa naghinayhinay sa ilang ministeryo, ang mga tagdumala sa pagtuon sa libro kinahanglang maghimog tinong mga kahikayan sa pagtaganag tabang ug pagdasig. Usahay ang usa ka mainitong pagdapit sa pagpakuyog kanato sa pagsangyaw mao ra ang gikinahanglan.
5 Aron paghimo sa Mayo nga talagsaong bulan sa pagsangyaw nga kalihokan gikinahanglan ang kooperasyon sa tanan. Ang mainitong pagpanguna sa tagdumala sa pagtuon sa libro maoy mahinungdanon samtang siya nagabulig sa tanang membro sa iyang grupo sa pagbaton ug bug-os nga pakig-ambit sa ministeryo. Daghan ang makig-ambit sa oksilyare payunir nga buluhaton. Ang dugang mga tigom sa pagsangyaw mahimong hikayon. Ang mga tigulang mahatagag espesyal nga pagtagad, ug ang kabatan-onan mabuligan diha sa praktikal nga mga paagi. Kinahanglang tinoon sa mga ginikanan nga ang interong pamilya makigbahin diha sa ministeryo sulod sa Mayo. Kon kitang tanan maghatag sa atong labing maayo kang Jehova niining panahon sa ting-ani, ang iyang dagayang panalangin maatoa.