Pagkooperar sa Atong Tagdumala sa Pagtuon sa Libro sa Kongregasyon
1 Ang Pagtuon sa Libro sa Kongregasyon nagadulag usa ka mahinungdanong bahin diha sa kaugmaran sa atong mga katakos ingong mga ministro. Ang mga grupo gituyong magpabiling gagmay aron pagdasig ug mainiton, samag pamilya nga palibot alang sa pagtuon sa Bibliya. Ang personal nga pagdasig ug pagtagad daling mabatonan pinaagi sa pagtuon sa libro nga kahikayan. Sa unsang paagi bug-os tang makakooperar sa tagdumala ug makabenepisyo gikan niining maayong tagana?
2 Masibotong Pakig-ambit sa Ministeryo sa Kanataran: Usa sa labing importanteng mga kaakohan sa tagdumala sa pagtuon sa libro mao ang pagbulig sa tanan diha sa grupo nga masibotong makig-ambit sa ministeryo. Niining bahina, ang librong Atong Ministeryo nagapahinumdom kanato diha sa panid 44 nga “ang pagkaregular, kasibot ug kadasig nga iyang igapakita sa pag-alagad sa kanataran mabanaag diha sa mga magmamantala.” Makasuportar ka ba nga makanunayon sa mga tigom sa dayon nang pagsangyaw? Ang pagbuhat mo sa ingon pagapabilhan gayod pag-ayo sa inyong tagdumala sa pagtuon sa libro ug sa ubang mga magmamantala.
3 Ang mga tigom sa dayon nang pagsangyaw gihikay sa kombeniyenteng mga dapit aron ang tanan makabaton ug masibotong pakig-ambit sa pagsangyawng buluhaton. Samtang nagahatag ug konsiderasyon sa lokal nga mga kahimtang, ang kada grupo buot gayod nga mosugod ug sayo sa pagsangyaw.
4 Buot mo bang matabangan sa pipila ka bahin sa ministeryo? Tingali ang inyong tagdumala sa pagtuon makahikay nga may mokuyog kanimo nga usa ka takos nga magmamantala. Sa kataposan sa bulan, paneguroang ikahulog dayon ang imong taho. Ang tagdumala sa pagtuon sa libro ug ang sekretaryo magpabili usab sa imong kooperasyon niining bahina.—Itanding Lucas 16:10.
5 Sa Dihang ang Magtatan-aw sa Pag-alagad Nagaduaw sa Grupo: Ang magtatan-aw sa pag-alagad kasagarang nagaduaw ug usa ka grupo sa pagtuon sa libro kada bulan. Hatagig suod nga pagtagad ang 15 minutos nga pakigpulong nga iyang ihatag sa kataposan sa pagtuon sa libro, kay kana magataganag tinong tambag sa grupo kon unsaon pagpauswag sa nagkalainlaing bahin sa buluhatong pagsangyaw. Ang magtatan-aw sa pag-alagad matinguhaon usab nga makig-uban kanilang sakop sa grupo sa maong pagtuon sa libro sa hinapos sa semana. Paneguroang makapahimulos niining espesyal nga tagana aron nga makabenepisyo ka sa iyang kasinatian ug katakos diha sa kanataran.
6 Ang atong personal nga panig-ingnan sa kooperasyon ug ang atong pagkaandam nga moabag sa mga menos ug kasinatian makatabang sa pagmugnag mainiton, mahigalaong atmospera diha sa Pagtuon sa Libro sa Kongregasyon samtang kita “nagabuhat kon unsay maayo ngadto sa tanan, apan ilabina ngadto kanilang may kalabotan kanato sa pagtuo.”—Gal. 6:10.