Tabang sa Hustong Panahon
1 Tungod sa iyang kabalaka alang sa kongregasyon, si Jesus kanunayng motaganag “tabang sa hustong panahon.” (Heb. 4:16) Ang dako niining tabanga ginatagana pinaagig “gasa diha sa mga lalaki,” ingon sa gisaad sa Efeso 4:8, 11, 12. Ang usa sa maong gasa mao ang magtatan-aw sa pag-alagad diha sa matag kongregasyon.
2 Diha sa unsang mga paagi nga ang magtatan-aw sa pag-alagad makabulig kanato? Adunay pipila: (1) Siya nagapanlimbasog nga kitang tanan padayong magmahunahunaon sa importansiya sa pagsangyaw ug paghimog tinun-ang buluhaton. (2) Iyang paneguroon nga gitagana pinaagig mga Pagtuon sa Basahon sa Kongregasyon ang maayong organisasyon ug pagpanguna. (3) Magahikay siya ug personal nga tabang aron pauswagon ang atong pagkaepektibo ingong mga ministro.
MAGTATAN-AW SA PAG-ALAGAD MAGADUAW
3 Ang magtatan-aw sa pag-alagad sagad gitudlo sa pagdumalag usa ka Pagtuon sa Basahon sa Kongregasyon apan makausa sa matag bulan siya mobiya sa iyang kaugalingong grupo aron mosangyaw uban sa usa sa laing mga pagtuon sa libro alang sa usa ka semana. Ang iyang ‘assistant’ mao ang mobanos samtang siya wala dinha. Iyang pahibaloon ang mga konduktor sa pagtuon nga abante pa bahin sa iyang duaw aron sila makaplano sa bug-os nga pagbenepisyo gikan sa mga kalihokan sa semana.
4 Sa panahon niining espesyal nga semana, ang pagtuon sa libro dumalahon sa 45 minutos. Kini magpatugot ug 15 minutos para sa magtatan-aw sa pag-alagad sa paghimog makapalig-ong pakigpulong nga gituyo sa pag-abag kanato nga mouswag sa atong buluhatong pagwali.
5 Ang tanang magmamantala sa grupo kinahanglang magbaton ug bug-os nga pakig-ambit sa pag-alagad sulod niining espesyal nga duaw. Diin tukma, ang pagsangyaw sa gabii mahimong organisahon sa maong semana. Ang usa sa mga tumong sa magtatan-aw sa pag-alagad mao ang pagduyog diha sa pagsangyaw nga kauban sa daghang magmamantala kutob sa mahimo. Hayan siya makauban sa pipila sa mga balikduaw ug mga pagtuon sa Bibliya. Ang bisan kinsa nga nagakinahanglag pagbulig o pagpalig-on sa ministeryo makaduol man kaniya sa paghangyog tabang.
6 Ang magtatan-aw sa pag-alagad mohisgot sa kalihokan sa grupo uban sa konduktor sa pagtuon. Ang mga kahikayan sa pagsangyaw ginasubli aron sa pagpaneguro nga kini mapuslanon ug kombeniyente alang sa tanan. Iyang mahikay sa pagduaw sa mga diregular nga magmamantala uban sa konduktor sa pagtuon. Usab, iyang marepaso ang payl sa ‘Bible study reports’ uban sa konduktor sa pagtuon. Tingali sila makauban sa pipila ka magmamantala sa ilang mga pagtuon sa Bibliya sa balay ug mohatag espirituwal nga pagpalig-on.
7 Sa mga kongregasyon nga adunay daghang mga pagtuon sa libro, ang mga duaw sa magtatan-aw sa pag-alagad mahimong dili kanunay. Busa ang tanan manlimbasog gayod nga bug-os nga makabenepisyo sa dihang siya moduaw. Sa mga kongregasyon nga diyutay ra ang mga Pagtuon sa Basahon, ang magtatan-aw sa pag-alagad maninguha nga makaduaw sa matag grupo sa labing menos sa kada unom ka bulan.
8 Pinaagig paghimog tibuok-kasingkasing nga suportar ngadto sa magtatan-aw sa pag-alagad sa dihang siya moduaw sa atong grupo sa pagtuon sa libro, atong mapauswag ang atong pagkaepektibo ug makatagamtam ug mas dakong kalipay diha sa ministeryo.