Pagtanyag sa Maayong Balita—Ingong Usa ka Pamilya
1 Ang dedikadong pamilya nga bug-os nagabuhat sa sagradong buluhaton maoy usa ka kadayegan sa ngalan ni Jehova. Malipayon kita nga daghan sa maong mga banay makaplagan taliwala sa mga Saksi ni Jehova sa tibuok yuta.
2 Siyempre, ang amahan aduna ing unang kaakohan sa pag-atiman sa espirituwal nga mga panginahanglan sa iyang pamilya. (1 Cor. 11:3) Uban sa kooperasyon sa iyang asawa ug mga anak, ang iyang pamilya makahimog kusganong impluwensiya sa uban. (Mat. 5:16) Unsa man ang pipila sa mga luna nga kining maong kooperasyon mapadayag?
MANGUNA ANG MGA GINIKANAN
3 Sa daghang hitabo, ang amahan basin ansiyano o ministeryal nga alagad. Kini nagakahulogan nga ang pipila sa iyang panahon ug pagtagad mahatag gayod ngadto sa mga butang sa kongregasyon. Ang amahan kinahanglang magbahinbahin sa iyang panahon aron ang iyang banay dili mapasagdan. Tungod kay ang iyang pamilya mao man ang iyang unang responsabilidad, iya gayong regular nga ieskedyol ang panahon nga mahiuban sa iyang pamilya diha sa pagtuon, sa pag-alagad sa kanataran, sa mga tigom, ug sa angay nga lulinghayaw.
4 Hinungdanon ang kooperasyon gikan sa asawa. Siya makapaluyo sa iyang bana pinaagig pagtabang sa pagbansay sa mga anak diha sa ministeryo. Ang iyang kasibot ug debosyon dakog mahimo sa pag-impluwensiya sa mga anak aron molambo ang apresasyon alang sa ministeryo.—2 Tim. 3:14, 15.
5 Adunay daghang panig-ingnan diin ang usa ka ginikanan miabaga sa espirituwal nga palas-anon ug malamposong nakabansay sa mga anak sa ministeryo. Tungod sa ekselenteng ehemplo sa ilang inahan o amahan, daghang batan-on nakabarog nga malig-on dapig sa kamatuoran.
RESPONSABILIDAD SA MGA ANAK
6 Bisan ang hingpit nga Anak sa Diyos, si Jesus, samtang bata pa, nagpasakop sa pagtultol ug instruksiyon sa iyang mga ginikanan. (Luc. 2:51) Busa, sa dihang hikayon sa amahan ug inahan ang duyog nga paggugol ug panahon diha sa ministeryo, maoy obligasyon sa mga anak sa pagpakitag diyosnong debosyon sa pagkooperar sa ilang mga ginikanan.—Efe. 6:1-3.
7 Ang pagsimba nga maduyogon ingong pamilya magapalig-on sa gugma ug panaghiusa sa maong banay. Ang mga ginikanan ug mga anak aduna ing responsabilidad niining bahina.