Pagmahal Pag-ayo sa mga Pribilehiyo sa Sagradong Pag-alagad
ANG mga asaynment sa sagradong pag-alagad angayng dili pakamenoson. Sa dihang ang mga saserdote sa karaang Juda nagpakitag dili-matinagdanong tinamdan bahin sa ilang mga pribilehiyo maylabot sa templo ni Jehova, sa masakit gibadlong niya sila. (Malaquias 1:6-14) Ug sa dihang ang pipila sa Israel nag-awhag sa mga Nazareo nga dili magmaugdang kon bahin sa mga responsabilidad nga ilang nadawat maylabot sa ilang sagradong pag-alagad, gibadlong ni Jehova kadtong makasasalang mga Israelinhon. (Amos 2:11-16) Ang matuod nga mga Kristohanon nagbuhat usab ug sagradong pag-alagad, ug ilang giisip kining ugdang. (Roma 12:1) Kining sagradong pag-alagad adunay daghang bahin, nga ang tanan kanila hinungdanon.
Samtang dinhi pa si Jesus sa yuta uban sa iyang mga sumusunod, iyang gibansay sila aron mahimong mga magmamantala sa Gingharian sa Diyos. Sa nahaigong panahon, ang ilang mensahe makaabot sa kinatumyan sa yuta. (Mateo 28:19, 20; Buhat 1:8) Ang maong pagsangyaw nahimong mas dinalian sa kataposang mga adlaw sa presenteng sistema sa mga butang.
Ginabuhat kining buluhatona sa tanang Saksi ni Jehova. Ginatos ka libo nagmalipayon nga nakaarang paghimo niini isip mga payunir. Aron itagana ang hinungdanong mga kinahanglanon sa tibuok-kalibotang buluhaton, libolibo ang nagtanyag sa ilang kaugalingon alang sa espesyal bug-os-panahong pag-alagad sa Bethel, sa nagapanawng buluhaton isip mga magtatan-aw sa sirkito ug distrito, o sa misyonaryong pag-alagad. Unsa kahay nalangkit niini sa bahin niadtong buot magpadayon sa maong espesyal nga pag-alagad?
Kon Adunay Hinungdanong mga Panginahanglan sa Pamilya
Sa dili pa mosulod sa espesyal bug-os-panahong pag-alagad, ang usa ka tawo kasagarang mohimog pipila ka pagpasibo sa iyang kahimtang. Dili ang tanan makahimo niini. Tungod sa Kasulatanhong mga obligasyong nabatonan na sa usa ka tawo kana tingali imposible. Hinuon, unsay mahitabo sa dihang ang hinungdanong mga panginahanglan sa pamilya, tingali naglangkit sa tigulang nga mga ginikanan, maatubang niadtong anaa na sa espesyal nga pag-alagad? Ang mga prinsipyo ug tambag sa Bibliya sama sa mosunod mohatag sa gikinahanglang direksiyon.
Ang atong tibuok kinabuhi angayng isentro sa atong relasyon kang Jehova. (Ecclesiastes 12:13; Marcos 12:28-30) Ang sagradong mga butang nga gisalig kanato aron atimanon kinahanglang mahalon pag-ayo. (Lucas 1:74, 75; Hebreohanon 12:16) Sa usa ka higayon, ang usa ka tawo nga kinahanglang mag-usob sa mga prioridad giingnan ni Jesus nga siya kinahanglang bug-os nga mapuliki sa pagmantala sa Gingharian sa Diyos. Dayag, ang tawo naghunahuna sa paglangan nianang buluhatona hangtod sa pagkamatay sa iyang amahan. (Lucas 9:59, 60) Sa laing bahin, giyagyag ni Jesus ang sayop nga panghunahuna ni bisan kinsang nangangkon nga ang tanang butang gipahinungod ngadto sa Diyos ug unya walay ‘gibuhat nga usa ka butang alang sa iyang amahan o sa iyang inahan.’ (Marcos 7:9-13) Gipakita usab ni apostol Pablo ang seryosong responsabilidad sa pagtagana alang “kanila nga iyang kaugalingon,” lakip ang mga ginikanan ug mga apohan.—1 Timoteo 5:3-8.
Nagpasabot ba kini nga inigtungha sa hinungdanong mga panginahanglan, kadtong anaa sa espesyal nga pag-alagad angayng mobiya sa ilang mga asaynment aron mahimong mga tig-atiman? Daghang butang ang nalangkit sa tubag. Ang desisyon maoy personal. (Galacia 6:5) Daghan ang mibati nga, bisan pag gimahal nila pag-ayo ang ilang asaynment, maalamon nga ikauban ang ilang mga ginikanan aron hatagan sila sa gikinahanglang tabang. Ngano? Ang panginahanglan basin hinungdanon kaayo, tingali walay laing sakop sa pamilya nga makatabang, o ang lokal nga kongregasyon tingali dili makahimo kon unsay gikinahanglan. Ang pipila nakaarang pagpayunir samtang nagtabang kanila. Ang uban nakabalik sa espesyal bug-os-panahong pag-alagad human maatiman ang kahimtang sa pamilya. Ugaling, sa daghang kaso, nahimo ang pag-atubang sa kahimtang sa laing mga paagi.
Pagpas-an sa Ilang Responsabilidad
Sa dihang mitungha ang hinungdanong mga panginahanglan, ang pipila diha sa espesyal bug-os-panahong pag-alagad nakaarang pagtagad sa maong mga panginahanglan bisan pag wala mobiya sa ilang mga asaynment. Tagda ang pipila lang sa daghang pananglitan.
Usa ka magtiayon nga nag-alagad sa tibuok-kalibotang hedkuwarter sa mga Saksi ni Jehova misulod sa Bethel nga pag-alagad niadtong 1978, human makahimo sa pag-alagad sa sirkito ug distrito. Ang asaynment sa igsoong lalaki naglangkit sa bug-at nga responsabilidad sa teokratikanhong organisasyon. Apan ang iyang mga ginikanan nagkinahanglan usab ug tabang. Kining magtiayon sa Bethel naghimog tulo o upat ka pagduaw matag tuig—mga 3,500 kilometros idabuwelta—aron pag-atiman sa mga ginikanan. Ilang gitukod mismo ang usa ka balay aron matagan-an ang mga panginahanglan sa mga ginikanan. Dihay mga biyahe aron pag-atiman sa medikal nga mga emerhensiya. Ilang nagamit ang halos tanang panahon sa ilang bakasyon sulod sa mga 20 ka tuig aron pag-atiman sa maong responsabilidad. Gihigugma ug gitahod nila ang mga ginikanan, apan gimahal usab nila ang ilang mga pribilehiyo sa sagradong pag-alagad.
Ang laing igsoong lalaki nakaalagad na isip nagapanawng magtatan-aw sulod sa 36 ka tuig sa dihang miatubang sa iyang gibatbat nga usa sa labing lisod nga mga kahimtang sa iyang kinabuhi. Ang iyang 85-anyos nga ugangang-babaye, nga usa ka matinumanong alagad ni Jehova, nagkinahanglag kauban sa balay nga makatabang niya. Niadtong panahona, kadaghanan sa iyang mga anak mibating dili kombenyente nga moipon siya kanila. Usa sa mga paryente misulti sa nagapanawng magtatan-aw nga siya ug ang iyang asawa angayng mobiya sa maong pag-alagad ug, para sa pamilya, maoy mag-atiman sa inahan. Apan ang magtiayon wala mobiya sa ilang bililhong buluhaton, ni sila wala magtagad sa mga panginahanglan sa inahan. Sulod sa sunod siyam ka tuig, kauban nila siya sa kadaghanang panahon. Sa sinugdan nagpuyo sila sa usa ka mobile home, dayon sa lainlaing mga apartment nga gitagana sa mga sirkito. Sulod sa tagdugayng mga yugto, ang igsoong lalaki, kinsa niadto magtatan-aw sa distrito, nagpadayon sa pagbiyahe aron pag-atiman sa iyang mga asaynment samtang ang iyang asawa nagpabilin kauban sa iyang inahan aron itagana ang mahigugmaong bug-os-panahong pag-atiman. Matag semana human sa mga tigom sa ma-Dominggo, ang bana mohimog tagdugayng mga biyahe pauli aron motabang kanila. Daghan nga nasayod sa kahimtang nagpahayag ug lalom nga apresasyon sa gibuhat niining magtiayona. Sa nahaigong panahon, ang ubang mga sakop sa pamilya natandog usab sa pagtaganag diyutayng tabang. Libolibo sa katawhan ni Jehova nagpadayon sa pagpahimulos sa pag-alagad nianang nagsakripisyo-sa-kaugalingong magtiayon tungod kay sila nagpadayon pagkupot sa ilang pribilehiyo sa espesyal bug-os-panahong pag-alagad.
Uban ang Kooperasyon sa Pamilya
Sa dihang ang lainlaing mga sakop sa pamilya magpabili sa espesyal bug-os-panahong pag-alagad, sila mahimong mokooperar mao nga labing menos pipila kanila ang makaambit niini.
Ang ingong espiritu sa pamilyahanong kooperasyon nakatabang sa usa ka Canadianhong magtiayon nga nag-alagad nga mga misyonaryo sa Kasadpang Aprika. Wala sila mohulat hangtod motungha ang usa ka emerhensiya, nga maglaom lamang nga wala untay mahitabo. Una pa sila motungha sa Watchtower Bible School of Gilead, agig pagpangandam alang sa pag-alagad sa langyawng nasod, ang bana nakigsulti sa iyang manghod nga lalaki bahin sa pag-atiman sa ilang inahan engkasog siya masakit o mabaldado. Sa pagpakitag gugma alang sa ilang inahan ingon man pagmahal sa misyonaryong pag-alagad, ang manghod miingon: “Ako sa pagkakaron adunay pamilya ug mga anak. Dili ako makalakaw ug layo kaayo ug himoon ang mga butang nga imong mahimo. Busa kon adunay mahitabo kang Mama, ako ang mag-atiman kaniya.”
Usa ka magtiayong nag-alagad nga mga misyonaryo sa Amerika del Sur nakadawat ug dakong kooperasyon gikan sa pamilya sa asawa aron pag-atiman sa tigulang nga inahan sa asawa. Usa sa iyang mga magulang babaye ug ang iyang bana nag-atiman sa inahan hangtod nga ang iyang magulang babaye gitakboyan ug sakit nga makamatay. Unya unsa na man? Aron mahupay ang kabalaka, ang bayaw-nga-lalaki misulat: “Samtang buhi pa ako ug ang mga bata, dili kinahanglang mobiya kamo sa inyong misyonaryong pag-alagad.” Ang dugang tabang sa pamilya miabot sa dihang ang laing igsoong babaye ug iyang bana mibiya sa ilang balay ug mibalhin ngadto sa gipuy-an sa inahan aron pag-atiman kaniya, ug ilang gibuhat kana hangtod nga siya namatay. Pagkanindot nga espiritu sa kooperasyon! Silang tanan nagtabang sa pagpaluyo sa misyonaryong pag-alagad.
Mga Ginikanan nga Naghatag nga Madagayaon Kang Jehova
Ang talagsaong pagpabili sa sagradong pag-alagad kasagarang gipakita sa mga ginikanan. Lakip sa ilang labing bililhong mga kabtangan nga magamit sa pagpasidungog nila kang Jehova mao ang ilang mga anak mismo. (Proverbio 3:9) Daghang Kristohanong ginikanan nagdasig sa ilang mga anak nga mosulod sa bug-os-panahong pag-alagad. Ug ang pipila kanila mibati nga sama kang Ana, kinsa mihatag sa iyang anak lalaki nga si Samuel ngadto kang Jehova alang sa iyang buluhaton “hangtod sa panahong walay tino,” nga mao, sulod sa “tanang adlaw nga siya buhi.”—1 Samuel 1:22, 28.
Usa sa ingon nga ginikanan misulat ngadto sa iyang anak babaye sa Aprika: “Nagpasalamat kami kang Jehova tungod sa kahibulongang pribilehiyo nga imong nabatonan. Kami dili makalaom ug labaw nga butang.” Ug sa laing higayon siya miingon: “Tinuod nga kinahanglang magsakripisyo kami tungod kay nabulag sa usag usa, apan dako nga kalipay ang pagtan-aw nga si Jehova nag-atiman kaninyo!”
Human sa pagsubli sa lainlaing mga kahimtang nga mitungha sa pagtagana sa gikinahanglang pag-atiman sa iyang tigulang nga mga ginikanan, usa ka misyonaryo sa Ecuador misulat: “Sa akong hunahuna ang kinadak-ang tabang nga mahimong madawat sa akong asawa ug kanako mao ang mga pag-ampo sa akong amahan. Human sa iyang kamatayon, giingnan kami sa akong inahan: ‘Ang adlaw dili moagi nga dili mag-ampo ang inyong amahan kang Jehova nga tugotan kamong duha sa pagpabilin sa inyong asaynment.’”
Usa ka tigulang nga magtiayon sa California, T.B.A., nalipay nga usa sa ilang mga anak lalaki anaa sa bug-os-panahong pag-alagad. Ang maong anak lalaki ug iyang asawa didto sa Espanya sa dihang namatay ang inahan. Gibati sa ubang mga sakop sa pamilya nga kinahanglang himoon ang mga kahikayan sa pag-atiman sa amahan. Tungod kay puliki sila sa sekular nga trabaho ug pagpadako sa ilang mga anak, gibati nila nga dili sila makapas-an sa maong responsabilidad. Sa kapulihay, ilang giawhag nga kusganon ang magtiayong anaa sa espesyal bug-os-panahong pag-alagad sa pagpauli ug pag-atiman sa amahan. Ugaling, ang amahan, bisan pag 79 anyos na, maayo gihapon ug panglawas, ug siya usab may tin-awng espirituwal nga panan-aw. Panahon sa usa ka pamilyahanong tigom, human makapahayag sa ilang kaugalingon ang lainlaing mga sakop, ang amahan mitindog ug malig-ong mipahayag: “Buot kong mobalik sila sa Espanya ug magpadayon sa pag-alagad.” Gibuhat nila kana, apan gitabangan usab nila siya sa dayag nga mga paagi. Ang ilang presenteng asaynment maoy diha sa sirkitong buluhaton sa Espanya. Sukad niadtong tigom sa pamilya, ang ubang sakop sa pamilya nagpakitag pagpabili sa ginahimo sa magtiayon diha sa pag-alagad sa langyawng nasod. Human sa ubay-ubayng katuigan, usa sa laing mga anak lalaki ang nagpaipon sa amahan sa iyang balay aron atimanon siya hangtod nga siya namatay.
Sa Pennsylvania, T.B.A., usa ka dinihogang igsoong lalaki nga nakapayunir sa mga 40 anyos maoy kapig 90 anyos sa edad sa dihang grabeng nasakit ang iyang asawa ug namatay. Siya may usa ka anak lalaki ug tulo ka anak babaye, gawas pa sa daghang anak sa espirituwal nga diwa. Usa sa iyang mga anak babaye diha sa bug-os-panahong pag-alagad sulod sa kapig 40 anyos, kay nakaalagad kauban sa iyang bana isip misyonaryo, sa nagapanawng buluhaton, ug sa Bethel. Siya mitabang sa paghimog mga kahikayan aron ikahatag ang angayng pag-atiman sa iyang amahan. Ang lokal nga mga igsoon mitabang usab sa pagdala kaniya ngadto sa mga tigom sa Kingdom Hall. Sa ulahi, sa pagkamatay sa iyang bana, gisukna sa anak babaye ang iyang amahan kon buot ba niyang mogawas siya sa Bethel aron atimanon siya. Gimahal pag-ayo sa iyang amahan ang sagradong mga butang, ug iyang gibati nga ang iyang mga panginahanglan maatiman sa ubang mga paagi. Busa mitubag siya: “Kana mao unya ang labing daotang butang nga imong mabuhat, ug labi pang daotan kon motugot ako nga buhaton nimo kana.”
Mapaluyohong mga Kongregasyon
Ang pila ka kongregasyon matinabangon kaayo sa pag-atiman sa nagkatigulang nga mga ginikanan niadtong anaa sa espesyal bug-os-panahong pag-alagad. Gipabilhan ilabina nila kadtong nagdeboto ug daghang tuig sa maong buluhaton. Bisan pag dili sila makapagawas kanila gikan sa ilang Kasulatanhong mga responsabilidad, kining mga kongregasyona dakog mahimo aron igong mapagaan ang lulan nga tingalig ang mga anak dili kinahanglang mobiya sa ilang espesyal nga mga asaynment.
Usa ka magtiayong taga-Alemanya didto na sa ilang asaynment sa laing nasod sulod sa mga 17 ka tuig, nga kinadak-an sa maong panahon diha sa nagapanawng buluhaton, sa dihang ang mga panginahanglan sa tigulang nga inahan sa igsoong lalaki misamot. Matag tuig ilang gigamit ang ilang bakasyon aron pagtabang kaniya. Ang Saksing mga silingan mihatag usab ug mahigugmaong tabang. Unya sa dihang ang magtiayong anaa sa bug-os-panahong pag-alagad nakauban sa iyang inahan panahon sa usa ka kritikal nga yugto, nakigkita kanila ang mga ansiyano sa lokal nga kongregasyon. Sila nasayod kon unsay regular nga gibuhat sa magtiayon alang sa inahan. Sila nag-apresyar usab sa espesyal nga pag-alagad nga gihimo sa magtiayon. Busa ang mga ansiyano mihan-ay ug usa ka plano sa pag-atiman sa inahan ug unya miingon: “Kamo dili makaatiman kaniya nga labaw kay sa inyong ginabuhat; tabangan mo namo aron makapabilin kamo sa inyong asaynment sa Espanya.” Sulod sa miaging pito ka tuig, ang maong mga ansiyano nagpadayon paghimo niana.
Sa susama, usa ka igsoong lalaki nga nag-alagad sa Senegal sukad 1967 nakadawat ug dakong mahigugmaong pagpaluyo gikan sa kongregasyon diin nagpuyo ang iyang amahan. Sa dihang mitungha ang usa ka krisis, ang bana, uban sa kinabubut-ong kooperasyon sa iyang mahigugmaong asawa, mibiyaheng nag-inusara ngadto sa Tinipong Bansa aron tabangan ang iyang mga ginikanan. Gikinahanglang magpabilin siyag ubay-ubayng mga bulan. Lisod ang kahimtang, apan sa dihang nahimo niya kon unsay iyang maarangan, ang kongregasyon misalga ug mitabang aron makapadayon siya sa iyang misyonaryong pag-alagad. Latas sa mga 18 ka tuig, ang kongregasyon mihatag ug mahigugmaong tabang sa di-maihap nga mga paagi, sa primero alang sa amahan (bisan pag dili na siya makaila sa daghan kanila) ug unya alang sa inahan. Nalibre ba ang anak sa responsabilidad tungod niana? Wala; siya sigeg biyahe gikan sa Senegal ug gigamit ang iyang bakasyon sa pagtagana sa tanang tabang nga iyang mahimo. Apan daghan nianang kongregasyona nalipay sa pagkasayod nga may bahin sila aron magpabilin ang kugihang magtiayon sa espesyal bug-os-panahong pag-alagad sa Senegal.
Si Jesus miingon nga kadtong nagbiya sa tanan tungod sa maayong balita makabaton ug mga igsoong lalaki, mga igsoong babaye, mga inahan, ug mga anak sa usa ka gatos ka pilo. (Marcos 10:29, 30) Kana matuod gayod taliwala sa mga alagad ni Jehova. Usa ka magtiayon nga karon nag-alagad sa Benin, Kasadpang Aprika, nakasinati niini sa linaing paagi sa dihang duha ka Saksi sa kongregasyon sa ilang mga ginikanan nagsulti kanila nga dili mabalaka sa mga ginikanan. Midugang sila: “Ang inyong mga ginikanan maoy among mga ginikanan usab.”
Oo, adunay daghang paagi nga makapakita kita nga gimahal nato pag-ayo ang mga pribilehiyo sa sagradong pag-alagad. Aduna bay mga paagi nga tingali mahimo nimo kini sa mas bug-os pa?
[Mga hulagway sa panid 26]
Sila nagtanyag sa ilang kaugalingon alang sa espesyal bug-os-panahong pag-alagad