Pangutana

● Sa dili pa uyonan alang sa bawtismo, ngadto sa unsang gidak-on nga kinahanglang ang di-bawtismadong magmamantala magpakig-ambit sa ministeryo sa kanataran?

Ang usa nga mahimong takos ingong di-bawtismadong magmamantala nakapasundayag na sa iyang kusganong tinguha sa pagkahimong usa sa mga Saksi ni Jehova. (Sal. 110:3) Iya nang nabag-o ang iyang panghunahuna, tinamdan ug paagi sa kinabuhi. Siya kanunay nga nagapakig-uban sa katawhan ni Jehova diha sa mga tigom sa kongregasyon ug sa mga asembliya. (Heb. 10:24, 25) Siya gayod usab napalihok na gikan sa kasingkasing sa pagkomento diha sa mga miting, ug lagmit nakapalista na sa Teokratikanhong Ministeryong Tunghaan.​—Sal. 40:9, 10; om p. 73.

Sa dihang ang usa ka estudyante sa Bibliya magpakita nga siya sa tinuoray nagaapresyar sa pagkabililhon sa mensahe sa Gingharian, siya mahimong may pribelihiyo sa pakig-ambit sa pamalaybalay nga ministeryo. (Mat. 24:14; 28:19, 20; om p. 111) Niining bahina, ang magmamantala nga nagadumala sa pagtuon ug ang mga ansiyano kinahanglang motino nga ang bug-os nga kinabuhi sa maong estudyante nahiuyon na sa Kristohanong mga prinsipyo. Kinahanglan siyang aduna ing tinuod nga tinguha sa pagpakig-ambit sa pagsangyaw ug sa paghimog tinun-an.​—Gal. 6:6; w88 11/15 p. 17; om pp. 98-9, 174.

Dili kinahanglang dugay kaayong panahon sukad ang estudyante sa Bibliya mahimong takos ingong magmamantala nga siya makapresentar sa iyang kaugalingon alang sa bawtismo sa tubig. Tungod kay siya kulang ug kasinatian diha sa publikong ministeryo, siya kinahanglang hatagan ug igong panahon sa pagpakita nga siya determinado sa pagbaton ug regular ug masibotong pakig-ambit sa ministeryo sa kanataran.​—Sal. 40:8; Roma 10:9, 10, 14, 15.

Sa panahon nga andam na ang maong tawo alang sa bawtismo, lagmit gayod nga siya regular na nga nagapaambit sa maayong balita sa uban, nga nagagugol ug dugang panahon kay sa usa ka oras lang o duha diha sa kanataran sa matag bulan. (w84 6/1 p. 8 par. 2) Siyempre, ang personal nga mga kahimtang sa kada usa nga nagahangyog bawtismo kinahanglang pagarepasohon. Ang mga ansiyano pagagiyahan pinaagig pagtultol nga gibutyag diha sa panid 175 sa librong Atong Ministeryo: “Pinaagig inyong mahigugmaong tabang, silang pagabawtismohan mapalig-on ug maabagan sa pagsulod sa Kristohanong ministeryo, nga igoigong andam na sa pagtuman nianang importanteng asaynment.”​—Mat. 16:24; Juan 4:34; 1 Ped. 2:21.