Pamilyahanong Kooperasyon Mopatunghag mga Kaayohan
1 Sa mga panahon sa Bibliya, ang amahan aduna ing unang kaakohan sa pagtino nga ang pamilya sa bug-os teokratiko. Mao man usab karon. (Jos. 24:15; Efe. 6:1-4) Ang pag-atiman sa tanang kalihokan sa banay maoy usa ka hagit. Sa unsang paagi malampos kana? Pinaagig kooperasyon ug kahikayan sa pamilya.—1 Cor. 14:40.
INGONG ULO, PANGUNA
2 Ang pagtuon sa pamilya kinahanglang himoon sa regular nga paagi ug ipahaom sa mga panginahanglan sa banay. Tinuod usab kini sa inadlawng teksto. Pagkamaayo gayong butang sa pagsugod sa adlaw uban sa panaghisgot sa Pulong sa Diyos! Ang pagpalandong niana sa maong adlaw moabag kanato sa ‘padayong pagtagad sa mga butang nga maputli, mahigugmaon, ug dalayegon.’ (Filip. 4:8) Mahimo ba nimo ang kauswagan niining bahina?
3 Dugang pa sa pagtuon sa pamilya, ang usa ka programa sa personal nga pagtuon hinungdanon. Ang mga pulong sa Josue 1:8 mapadapat man sa samang puwersa ngadto sa matag usa kanato: “Kining basahona sa kasugoan ayawg ibulag gikan sa imong baba, ug kinahanglang basahon mo kana sa hinayng tingog sa adlaw ug sa gabii, aron nga imong maatiman sa pagbuhat sa tanan nga nahisulat niana.”
4 Ang pagkauntop sa panahon alang sa mga tigom maoy usa ka hagit ug nagakinahanglan ug kooperasyon. Ang pagtultol gikan sa ulo sa pamilya magpatino nga ang tabang gitagana diin kana gikinahanglan. Kini magpaarang sa tanan sa pag-abot sa hustong panahon aron makaambit sa unang awit ug pag-ampo.
5 Hinungdanon nga ang ulo sa pamilya manguna sa pag-ampo. “Magmainantoson sa pag-ampo” mao ang tambag ni Pablo sa Roma 12:12. Ang paghimo niini sa paaging regular makabulig sa paghiusa sa banay. Kining pag-ampoa maoy dugang pa sa tinagsatagsa ka pag-ampo sa mga membro sa banay.
PANGANDAM
6 Ang mga praktis sesyon sa banay makabulig sa tanan nga maandam alang sa ministeryo. Ang mga pasiuna mahimong pilion gikan sa mga panid 9-15 sa basahong Nangatarongan aron ipahaom sa Ulohan nga Mahisgotan. Ang mga sugyot sa pagpauswag mahimo mang isulti sa ulo sa pamilya.
7 Posible ba nga ang usa o mas pang mga membro sa pamilya makasulod sa bug-os-panahong pag-alagad? (1 Cor. 16:9) Kini nagakinahanglan ug maayong kooperasyon sa bahin sa tanan diha sa banay. Pinaagig pagpayano sa ilang estilo-kinabuhi ug mapaagihon, daghang pamilya ang nakatagamtam niining kalipaya ug pribilehiyoa.
8 Samtang ang ulo sa pamilya ug tanang membro sa banay magtinabangay ug interesado sa kaayohan alang sa tanan, ang usa ka malipayon ug nahiusang pamilya makab-ot.