Kon sa Unsang Paagi Makabenepisyo Ka sa Inyong Grupo sa Pagsangyaw
1. Unsang mga benepisyo sa kahikayan sa Pagtuon sa Libro sa Kongregasyon ang mabatonan gihapon pinaagi sa atong grupo sa pagsangyaw?
1 May pipila ba ka bahin sa Pagtuon sa Libro sa Kongregasyon nga imong gikamingawan? Ang mga grupo gagmay ug mas relaks ang kahimtang. Tungod niadto, sayon ang pagpakighigala nga nakatabang kanato nga mahuptang lig-on ang pagtuo. (Prov. 18:24) Ang magtatan-aw sa pagtuon sa libro nahibalo sa atong linaing mga sirkumstansiya ug naghatag ug personal nga pagdasig. (Prov. 27:23; 1 Ped. 5:2, 3) Kini nga mga benepisyo mabatonan gihapon pinaagi sa atong grupo sa pagsangyaw.
2. Sa unsang paagi makapakita kitag inisyatibo aron maugmad ang panaghigalaay diha sa atong grupo sa pagsangyaw nga makatabang kanato sa espirituwal?
2 Magpakitag Inisyatibo: Ang mga grupo sa pagsangyaw sagad sama rag gidak-on sa mga grupo sa pagtuon sa libro kaniadto. Pinaagi sa pagsangyaw “kiliran sa kiliran” uban sa mga igsoon, ang suod nga panaghigalaay mahimong moresulta. (Filip. 1:27) Pila sa inyong grupo ang napartner na nimo sa pagsangyaw? Mahimo bang “magpasangkad” ka niining bahina? (2 Cor. 6:13) Usahay makadapit usab kitag kauban sa atong grupo nga moapil sa atong Pamilyahanong Pagsimba o sa pagpangaon. Sa pipila ka kongregasyon, ang mga grupo sa pagsangyaw magturnohay sa pagpakaon sa nagaduawng mamumulong. Sa naasayn nilang semana, ang grupo magtapok alang sa pagpangaon ug magdinasigay sa usag usa bisag ang mamumulong dili na makapabilin alang niini.
3. Unsay mga kahigayonan nga ang mga magmamantala sa usa ka grupo sa pagsangyaw mahatagag pagtagad ug maatiman?
3 Bisag ang kongregasyon kaduha na lang magtigom sa usa ka semana, kini wala magpasabot nga ang mga magmamantala dili na kaayo mahatagag pagtagad ug maatiman. Adunay gitudlong magtatan-aw sa matag grupo aron mohatag ug personal nga pagdasig ug pagbansay sa mga magmamantala alang sa ministeryo. Kon ang inyong magtatan-aw sa grupo wala pa makigsabot kanimo nga ubanan ka niya sa ministeryo, hangyoa siya nga ubanan ka niya. Dugang pa, kada bulan ang magtatan-aw sa pag-alagad mouban sa usa ka grupo diha sa ministeryo sa usa ka hinapos sa semana. Sa gagmayng kongregasyon diin pipila ra ang grupo, mahimong duawon niya ang kada grupo kaduha sa usa ka tuig. Gihikay ba nimo ang imong eskedyul aron makigbahin ka sa ministeryo dihang moduaw siya sa inyong grupo?
4. (a) Unsaon pag-organisar ang mga tigom sa pagsangyaw? (b) Nganong angay natong pamalandongon ang pagtanyag sa atong balay alang sa mga tigom sa pagsangyaw?
4 Sagad maayo nga ang matag grupo may kaugalingong tigom alang sa pagsangyaw sa mga hinapos sa semana. Kon dunay ubay-ubayng tagboanan para sa tigom alang sa pagsangyaw sa susamang oras, mas sayon ang pagbiyahe sa mga magmamantala ngadto sa maong tigom ug tingali ngadto sa teritoryo. Ang mga magmamantala daling maorganisar ug makaadto dayon sa teritoryo. Mas sayon usab alang sa magtatan-aw sa grupo ang pag-atiman sa mga sakop sa iyang grupo. Hinuon, may mga kahimtang nga basin maayo nga mag-usa ang duha ka grupo o kapin pa. Kon ang tibuok kongregasyon mag-usa sa pagtigom alang sa pagsangyaw sa unang Sabado sa bulan o human sa Pagtuon sa Bantayanang Torre, maayo nga ang matag grupo mag-uban sa paglingkod ug tagaag pipila ka minutos ang magtatan-aw sa grupo aron organisahon ang iyang grupo una tiklopan ug pag-ampo ang tigom alang sa pagsangyaw.—Tan-awa ang kahong “Makatanyag Ka ba sa Imong Balay?”
5. Bisag nahunong na ang kahikayan sa Pagtuon sa Libro sa Kongregasyon, sa unsa man kita makasalig?
5 Bisag nahunong na ang kahikayan sa Pagtuon sa Libro sa Kongregasyon, si Jehova padayong nagtagana sa tanan natong gikinahanglan aron buhaton ang iyang kabubut-on. (Heb. 13:20, 21) Ubos sa pag-atiman ni Jehova, walay nakulang kanato. (Sal. 23:1) Daghang panalangin ang mabatonan pinaagi sa atong grupo sa pagsangyaw. Kon kita magpakitag inisyatibo ug ‘magapugas nga madagayaon,’ kita ‘magaani nga madagayaon.’—2 Cor. 9:6.
[Kahon sa panid 6]
Makatanyag Ka ba sa Imong Balay?
Sa pipila ka kongregasyon, usahon ang mga grupo sa pagsangyaw sa hinapos sa semana kay kulang ang balay nga matigoman. Ang mga tigom alang sa pagsangyaw maoy ekstensiyon sa kahikayan sa kongregasyon, busa dakong pribilehiyo nga ang atong balay himoong tigomanan. Makatanyag ka ba sa imong balay? Ayawg panuko tungod kay ordinaryo lang ang imong balay. Ang nahimutangan sa imong balay ug uban pang butang tulotimbangon sa mga ansiyano sama sa dihang nagpili silag mga dapit alang sa pagtuon sa libro. Kon buot nimong itanyag ang imong balay, pahibaloa ang inyong magtatan-aw sa grupo.