Ang mga Tigom sa Pagsangyaw Nagpalampos sa Katuyoan Niini
1. Unsay katuyoan sa mga tigom sa pagsangyaw?
1 Usa ka higayon, si Jesus nakigtigom uban sa 70 sa iyang mga tinun-an una pa sila nanangyaw. (Luc. 10:1-11) Iyang gidasig sila pinaagi sa pagpahinumdom nga wala sila mag-inusara ug nga sila giyahan sa “Agalon sa pagpangani,” si Jehova. Iyang gitudloan usab sila aron mahanas sa pagtuman sa buluhaton, ug giorganisar pinaagi sa pagpadala kanila nga “tinagurha.” Karon, ang atong mga tigom sa pagsangyaw parehas gihapon ug katuyoan—sa pagdasig, pagpahanas, ug pag-organisar kanato.
2. Unsa ka taas himoon ang tigom sa pagsangyaw?
2 Sa pagkakaron, ang tigom sa pagsangyaw maoy 10 ngadto sa 15 minutos, lakip ang pag-organisar sa mga grupo, pag-asayn ug teritoryo, ug pag-ampo. Kini bag-ohon na. Sugod sa Abril, ang tigom sa pagsangyaw himoon sulod lang sa singko ngadto sa siyete minutos. Apan kon himoon kini pagkahuman sa tigom sa kongregasyon, kinahanglang pamub-an kini, kay kadtong nanambong nakadungog nag panaghisgot sa Kasulatan. Kon dili taas ang tigom sa pagsangyaw, daghang oras ang magugol sa tanan diha sa pagsangyaw. Dugang pa, kon ang mga payunir o magmamantala nakasugod nag sangyaw una pa sa tigom sa pagsangyaw, dili taas nga oras ang mawala sa ilang buluhaton.
3. Unsaon pag-organisar ang tigom sa pagsangyaw aron kini makatabang sa mga manangyaw?
3 Ang tigom sa pagsangyaw kinahanglang organisahon kay dako kinig ikatabang sa manangyaw. Sa kadaghanang kongregasyon, ang mga tigom sa pagsangyaw sa grupo maayong bulagbulagon imbes usahon sa usa lang ka lugar. Kini makapasayon sa mga magmamantala sa pagbiyahe paingon sa tagboanan ug tingali sa teritoryo. Ang mga magmamantala maorganisar dayon, ug ang magtatan-aw sa grupo dili maglisod pagbantay sa iyang grupo. Mahimong konsiderahon sa lawas sa mga ansiyano ang mga kahimtang sa teritoryo ug susihon kon unsa ang labing maayo. Sa dili pa taposon ang tigom pinaagi sa mubong pag-ampo, ang tanan kinahanglang mahibalo kon asa mosangyaw ug kon kinsay ilang partner.
4. Nganong dili isipon ang tigom sa pagsangyaw ingong dili importante kay sa ubang tigom?
4 Dili Isipon nga Dili Importante kay sa Ubang Tigom sa Kongregasyon: Sanglit ang tigom sa pagsangyaw maoy para niadtong manangyaw, dili tibuok kongregasyon ang manambong niini. Apan, wala kini magpasabot nga dili kini importante sama sa ubang tigom sa kongregasyon. Sama sa tanan natong mga tigom, ang tigom sa pagsangyaw maoy tagana ni Jehova nga makapukaw kanato sa paghigugma ug sa maayong mga buhat. (Heb. 10:24, 25) Busa, ang tigdumala kinahanglang mangandam aron ang panaghisgot makapasidungog kang Jehova ug makabenepisyo kadtong manangyaw. Kon praktikal sa ilang kahimtang, ang manangyaw kinahanglang maningkamot sa pagtambong niini.
Ang mga tigom sa pagsangyaw dili angayng isipon nga dili importante kay sa ubang tigom sa kongregasyon
5. (a) Unsay papel sa magtatan-aw sa pag-alagad sa paghikay ug mga tigom sa pagsangyaw? (b) Unsaon pagdumala sa sister ang tigom sa pagsangyaw?
5 Pagpangandam sa Tigdumala: Aron maandam pag-ayo sa igsoon ang iyang asaynment sa tigom, kinahanglang abante kining ihatag kaniya. Ingon usab niini kon bahin sa tigom sa pagsangyaw. Kon ang mga grupo bulag nga magtigom, ang tigdumala sa grupo o ilang asistant maoy magdumala sa tigom sa ilang grupo. Apan kon usahon sa kongregasyon ang tigom sa pagsangyaw, ang magtatan-aw sa pag-alagad magtudlo kon kinsay modumala. Ang ubang magtatan-aw sa pag-alagad mohatag daan ug eskedyul sa tanang tigdumala ug magpaskil ug kopya niini sa information board. Hunahunaon pag-ayo sa magtatan-aw sa pag-alagad kon kinsay iyang iasayn nga tigdumala, nga hinumdoman nga ang kalidad niini nga mga tigom nagdepende usab sa kahanas sa pagpanudlo ug pag-organisar niadtong modumala. Kon sa ubang adlaw walay ansiyano, ministeryal nga alagad, o ubang kuwalipikado nga bawtismadong brader, ang magtatan-aw sa pag-alagad mag-asayn ug hanas nga bawtismadong sister nga maoy modumala.—Tan-awa ang artikulong “Kon Sister ang Magdumala.”
6. Nganong importante nga ang giasayn nga tigdumala mangandam ug maayo?
6 Kon makadawat kitag asaynment sa Teokratikanhong Tunghaan sa Ministeryo o sa Tigom sa Pag-alagad, ato dayon kining tagdon ug pangandaman pag-ayo. Tingali walay usa kanato nga diha na lang mangandam kon unsay isulti sa magpaingon na sa tigom. Ang asaynment sa pagdumala sa tigom sa pagsangyaw angayng isipon usab nga importante. Karon nga gipamubo na ang tigom sa pagsangyaw, ang maayong preparasyon importante kaayo aron ang tigom mapuslanon ug matapos sa untop nga oras. Ang maayong preparasyon usab naglakip sa pagkuha daan ug teritoryo.
7. Unsay mahimong hisgotan sa tigdumala?
7 Kon Unsay Hisgotan: Sanglit lainlain man ang mga kahimtang sa mga teritoryo, ang matinumanong ulipon wala mag-andam ug laraw sa matag tigom sa pagsangyaw. Ang kahon nga “Panahon sa Tigom sa Pagsangyaw, Mahimo Nimong Hisgotan Kini” naghatag ug mga sugyot. Sagad, ang tigom himoon ingong panaghisgot. Sa ubang panahon, mahimong maglakip kinig maayong pagkaandam nga pasundayag o usa ka haom nga video gikan sa jw.org. Dihang mangandam sa tigom sa pagsangyaw, palandongon sa tigdumala kon unsay makapadasig ug makatabang sa manangyaw nianang adlawa.
Sa mangandam sa tigom sa pagsangyaw, palandongon sa tigdumala kon unsay makapadasig ug makatabang sa manangyaw nianang adlawa
8. Unsay maayong hisgotan panahon sa tigom sa pagsangyaw sa Sabado ug Dominggo?
8 Pananglitan, sa matag Sabado, sagad itanyag sa mga igsoon ang Bantayanang Torre ug Pagmata! Daghan sa manangyaw sa Sabado dili makasangyaw sa ordinaryong mga adlaw, busa malimot na sila sa presentasyon nga ilang gibansaybansay panahon sa ilang Pamilyahanong Pagsimba. Busa, maayong repasohon sa tigdumala ang usa sa sampol nga mga presentasyon sa Atong Ministeryo sa Gingharian. O kaha hisgotan kon unsaon paglakip sa lokal nga mga balita, okasyon, o pista opisyal diha sa pagtanyag ug magasin o kon unsaon pagbilin ug topiko nga hisgotan sa sunod duaw kon ang magasin dawaton. Kon may nakapanagtag nag magasin nga tanyag nianang bulana, mahimong pahatagon sila sa tigdumala ug mubong sugyot o paasoyon ug makapadasig nga eksperyensiya. Matag Dominggo, himoon usab kini sa tigdumala maylabot sa tanyag nianang bulana. Ang pang-Bible study nga mga publikasyon, sama sa brosyur nga Maayong Balita, Pamati sa Diyos, ug librong Gitudlo sa Bibliya mahimong itanyag sa bisan unsang adlaw, busa puwedeng hisgotan sa makadiyot sa tigdumala kon unsaon pagtanyag ang usa niini nga mga publikasyon.
9. Unsay mahimong hisgotan sa Sabado ug Dominggo dihang makigbahin sa espesyal nga kampanya?
9 Kon ang kongregasyon nakigbahin sa espesyal nga kampanya sa Sabado ug Dominggo, mahimong hisgotan sa tigdumala kon unsaon pagtanyag sa bag-ong mga magasin nga lakipan ug imbitasyon o tract, o hisgotan kon unsay himoon dihang magpakitag interes ang tagbalay. Mahimo sab nga magpaasoy ug mga eksperyensiya nga nagpasiugda sa kahinungdanon niini nga mga kampanya.
10, 11. Nganong ang pagpangandam sa mga magmamantala importante sa kalamposan sa tigom sa pagsangyaw?
10 Pagpangandam sa mga Magmamantala: Ang mga magmamantala may mahimo usab sa pagpalampos sa tigom sa pagsangyaw. Pinaagi sa pagpangandam daan, tingali panahon sa ilang pamilyahanong pagsimba, sila dunay ikatampo sa ubang magmamantala. Aron makapreparar ug maayo, pagkuhag mga magasin ug literatura una pa moabot sa tigom sa pagsangyaw aron ang tanan dili malangan sa pagpaingon sa teritoryo.
11 Hinungdanon usab nga moabot kita sa tigom sa pagsangyaw sa dili pa kini magsugod. Siyempre, maningkamot kita nga moabot usab ug sayo sa tanang tigom sa kongregasyon. Apan kon kita maulahi, kita makabalda sa tigom sa pagsangyaw. Ngano? Ang brader nga manguna daghag konsiderahon sa dili pa organisahon ang grupo. Kon diyutay ra ang mangabot, tingali iyang pasangyawon sila sa teritoryo nga wala mahuman pagkobre. Kon ang uban sa manangyaw nanglakaw lang paingon sa tagboanan ug unya layo ang teritoryo, iyang ipartner sila niadtong dunay sakyanan. Kon ang teritoryo peligroso, magtudlo siyag mga brader sa pagsangyaw uban sa grupo sa mga sister aron sila mabantayan. Ang mga tigulang o may kakulian sa lawas mahimong iasayn sa dalan nga patag o sa mga balay nga dili habog ug hagdanan. Ang mga bag-ohan mahimong ipartner sa eksperyensiyadong mga magmamantala. Apan kon ulahing mangabot ang mga igsoon, ang naorganisar nga kahikayan usbon na usab aron sila maatiman. Tingali maulahi usahay kita tungod sa makataronganong rason. Apan kon pirme na lang kitang maulahi, maayong pangutan-on ang atong kaugalingon kon tungod ba kay wala kitay apresasyon sa mga tigom sa pagsangyaw o wala kita makapangandam daan.
12. Kon mamili ka daan ug partner, unsay angay nimong pamalandongon?
12 Ang mga magmamantala nga magtigom sa pagsangyaw mahimong makigsabot daan kon kinsay ilang partner una pa sa tigom, o maghulat kon kinsay ipartner kanila. Kon mamili ka daan ug partner, mahimo bang “magpasangkad” ka pinaagi sa pagpakigpartner sa lainlaing igsoon imbes pirme na lang sa imong suod nga mga higala? (2 Cor. 6:11-13) Mahimo bang makigpartner ka usab sa bag-ohang igsoon aron mouswag ang iyang katakos sa pagpanudlo? (1 Cor. 10:24; 1 Tim. 4:13, 15) Pamati pag-ayo sa mga instruksiyon nga ihatag, ilabina kon asa kamo magsugod pagsangyaw. Pagkahuman sa tigom, ayawg usba ang mga kahikayan ug lakaw dayon sa teritoryo.
13. Kon ang tanan mahunahunaon ug mobuhat sa ilang bahin, sa unsang paagi ang mga tigom sa pagsangyaw makabenepisyo kanato?
13 Human makasangyaw, ang 70 nga giorganisar ni Jesus sa pagsangyaw namauli nga malipayon. (Luc. 10:17) Ang pagdumala ni Jesus sa tigom una pa sila manangyaw nakatabang gayod kanila. Karon, ang mga tigom sa pagsangyaw dunay samang benepisyo. Kon ang tanang manangyaw mahunahunaon ug mobuhat sa ilang bahin, ang mga tigom sa pagsangyaw makapadasig, makapahanas ug kini maghimo kanatong organisado sa pagtuman sa sugo kanato sa “pagpamatuod ngadto sa tanang kanasoran.”—Mat. 24:14.