Pangutana

◼ Unsang impormasyon ang angayng ipresentar diha sa mga tigom sa dayon nang pagsangyaw?

Ang katuyoan sa tigom sa dayon nang pagsangyaw mao ang pagtabang kanato sa paghatag ug pagtagad sa kalihokan nga mosunod​—ang ministeryo. Busa, ang tagdumala angayng mangandam pag-ayo aron makapaambit ug butang nga makapadasig, espesipiko, ug praktikal. Kon ang teksto sa adlaw deretsong naghisgot bahin sa kalihokang pagsangyaw, mahimo kanang basahon ug hisgotan sa mubo. Apan, sa panguna ang maong tigom angayng magsentro sa pagtagad sa pagtabang sa tanan nga moduyog sa buluhatong pagsangyaw sa pagkaandam pa gayod aron tumanon ang ministeryo nianang adlawa.​—2 Tim. 4:5.

Ang magamit nga mga puntos gikan sa Atong Ministeryo sa Gingharian mahimong hisgotan aron ang tanan masinati sa kinabag-ohang tanyag ug kon unsaon sa pagpresentar niana. Sa Adlaw sa Magasin ang presentasyon gikan sa “Kon Unsay Isulti Labot sa mga Magasin” ikapasundayag. Alang sa ubang mga kampanya, usa o duha ka introduksiyon diha sa librong Nangatarongan nga haom sa lokal nga teritoryo mahimong ipasiugda. Ang usa ka bahin sa ministeryo mahimong hisgotan o ipasundayag, sama sa kon unsaon sa paggamit ang Bibliya diha sa pultahan, kon unsaon sa pagdumala ang lagmit tigsumpo sa panaghisgot, kon unsaon sa pagtanyag ug pagtuon sa Bibliya, o kon unsaon sa pagpaloap sa interes.

Ang mga tigom sa dayon nang pagsangyaw dili gayod molapas sa 10 hangtod sa 15 minutos, nga maglakip sa pag-organisar sa mga grupo, pag-asayn ug teritoryo, ug pag-ampo. Sa dihang manglakaw na, ang tanan nga mitambong angayng nasayod na kon kinsa ang makauban ug asa nga dapit ang ilang kobrehan, ug angayng mobiya dayon sila paingon sa teritoryo. Tungod sa kamubo sa panahon sa maong tigom, hinungdanon nga ang tanan moabot nga untop sa panahon. Kon ang tigom sa dayon nang pagsangyaw himoon human sa usa ka tigom sa kongregasyon, sama sa Pagtuon sa Bantayanang Torre, kini kinahanglang mas mubo. Dili na kinahanglang hisgotan ang teksto sa adlaw, sanglit nakapahimulos na man sa maayong Kasulatanhong panaghisgot.

Ang takos bawtismadong mga igsoong lalaki kinahanglang itudlo nga abante sa pagdumala sa matag tigom sa dayon nang pagsangyaw. Kon walay magamit sa pagpanguna sa usa ka partikular nga adlaw, ang mga ansiyano kinahanglang magtudlo kon kinsang bawtismadong mga babaye ang makahimo niana sa dihang ang panginahanglan motungha. Samtang nagpabiling naglingkod, mahimong sugdan sa igsoong babaye ang panaghisgot sa grupo bahin sa teksto sa adlaw o ubang mga puntos maylabot sa pag-alagad sa kanataran, nga mubo kanunay ang iyang mga komento. Siya kinahanglang magpandong.

Ang mga tigom sa dayon nang pagsangyaw maoy maayo kaayong mga kahigayonan alang kanato nga madasig ug masangkapan sa pagpakig-ambit diha sa ministeryo. Kon nakaandam pag-ayo ang tagdumala, mas makabenepisyo ang tanan.