Pangutana

● Sa unsang paagi gayod dumalahon ang mga tigom sa dayon na nga pagsangyaw?

Ang tigom sa dayon na nga pagsangyaw maoy naandan nang kahikayan sa kongregasyon. Kinahanglan kining mahapsay ug ginadumala uban ang dignidad. Ang tinamdan ug pamostura niadtong motambong kinahanglang sama nianang panahon nga nagatambong sa mga miting sa kongregasyon. Ang usa nga natudlo sa pagdumala kinahanglang andam sa pagpresentar nianang mapuslanon nga mahimong magamit nianang adlawa diha sa pagsangyaw. Ang Atong Ministeryo sa Gingharian nagataganag mapuslanong mga sugyot alang niining tigoma.

Dili kinahanglang hisgotan ang inadlaw nga teksto sa matag tigom. Kon ang teksto nianang adlawa nagataganag pagpalig-on sa pag-alagad sa kanataran, kana mahimo mang tagdon sa mubo. Ang tigom kinahanglang himoon nga may igong pagkasayo aron gugolon ang bug-os naeskedyol nga panahon diha sa kanataran. Kini gayod maoy 10 ngadto sa 15 minutos ra ang gidugayon. Apan, mahimong mas mubo pa kon himoon kini human sa usa ka miting sa kongregasyon. Ang eskedyol sa mga payunir kinahanglang pagatagdon, sanglit kay ang dugay o ulahing mga tigom sa dayon na nga pagsangyaw mahimong moapektar niadtong adunay suod nga eskedyol nga ginasunod.

Ang mga kahikayan pagahimoon alang sa tanang presente nga adunay tinudlong lugar nga sangyawan. Siyempre, ang pipila basin adunay personal nga mga kahikayan sa paghimog mga balikduaw o pagdumalag mga pagtuon ug dili na kinahanglang hatagan ug asaynment sa teritoryo nga pagasangyawan.

Ang tanang presente kinahanglang maminaw hangtod nahimo na ang mga grupo sa pagsangyaw ug nahuman na ang pag-ampo. Ang mga asaynment sa mga grupo ug mga teritoryo kinahanglang himoon sa dili pa taposon ang tigom sa dayon na nga pagsangyaw uban ang pag-ampo, dili kay didto na sa teritoryo.