Mga Tigom sa Dayon Nang Pagsangyaw
1. Nganong gusto natong madumala sa organisadong paagi ang buluhatong pagsangyaw?
1 Si Jesus naghatag ug panig-ingnan sa pagdumala sa buluhatong pagsangyaw sa Gingharian sa organisado ug episyenteng paagi. Karon usab, kadtong may kaakohan niining tibuok-kalibotang pagsangyaw sa Gingharian nagtinguha gayod nga madumala kining buluhatona sa samang paagi. Aron mahimo kini, ang mga kongregasyon sa tibuok kalibotan nagpahigayon ug mga tigom sa dayon nang pagsangyaw sa pag-organisar sa mga grupo sa mga magsasangyaw sa Gingharian.—Mat. 24:45-47; 25:21; Luc. 10:1-7.
2. Unsay angayng himoon diha sa mga tigom sa dayon nang pagsangyaw?
2 Usa ka Maayong Kahikayan: Ang mga tigom sa dayon nang pagsangyaw gidisenyo aron sa paghatag ug pagdasig, praktikal nga instruksiyon, ug giya alang niadtong manangyaw. Mahimong hisgotan sa mubo ang inadlawng teksto kon kini tatawng mapadapat sa ministeryo. Usahay, ang mga pahinumdom gikan sa Atong Ministeryo sa Gingharian, sa librong Nangatarongan, o tingali sa librong Tunghaan sa Ministeryo mahimong hisgotan aron maandam ang tanan nga mosangyaw nianang adlawa. Mahimong ipasundayag usab sa mubo ang mga tanyag nga literatura nianang bulana. Sa dili pa taposon pinaagig pag-ampo, ang tanan angayng mahibalo na kon kinsay ilang partner sa pagsangyaw ug kon asa ang teritoryo. Pagkahuman sa tigom nga dili molapas ug 15 minutos, ang tanan angayng manlakaw dayon paingon sa teritoryo.
3. Kinsa ang responsable sa pag-organisar sa mga tigom sa dayon nang pagsangyaw?
3 Unsaon Pag-organisar? Ang magtatan-aw sa pag-alagad ang may kaakohan sa pag-organisar sa mga tigom sa dayon nang pagsangyaw. Responsabilidad sa mga magtatan-aw sa grupo, o sa ilang mga katabang nga pangunahan ang ilang mga grupo sa pagsangyaw sa mga hinapos sa semana. Ang ubang magtatan-aw o ministeryal nga mga alagad tingali makahimo sa pag-uban sa mga grupo sa pagsangyaw sa tungatunga sa semana. Makigkooperar gayod sa magtatan-aw sa pag-alagad ang mga magtatan-aw sa grupo aron adunay igong teritoryo nga makobrehan ang ilang grupo sa mga hinapos sa semana. Ang magtatan-aw sa pag-alagad maghimog mga kahikayan bahin sa mga igsoon nga maoy manguna sa mga grupo sa pagsangyaw sa tungatunga sa semana.
4-6. (a) Unsay katuyoan sa mga tigom sa dayon nang pagsangyaw maylabot sa teritoryo sa kongregasyon? (b) Unsay mahimong tagdon aron matino ang panginahanglan alang sa mga tigom sa dayon nang pagsangyaw?
4 Asa ug Kanus-a Angayng Himoon Kini nga mga Tigom? Imbes magtigom ang tibuok kongregasyon sa usa lang ka dapit, labing maayo nga ang maong mga tigom pagahimoon sa kombenyenteng mga dapit, kasagaran sa pribadong mga balay, diha sa teritoryo aron makobrehan ang teritoryo sa kongregasyon sa epektibong paagi. Magamit usab ang mga Kingdom Hall alang niini nga katuyoan. Daghang kongregasyon ang naggamit sa Kingdom Hall alang sa tigom sa dayon nang pagsangyaw human sa pakigpulong publiko ug Pagtuon sa Bantayanang Torre sa Dominggo. Angayng paningkamotan nga dili mogugol ug taas nga panahon sa pagbiyahe paingon sa teritoryo. Busa, ang mga kahikayan mahimong repasohon sa popanahon aron maseguro nga ang mga tagboanan sa pagsangyaw haom gihapon nga lokasyon aron makobrehan sa bug-os ang teritoryo.
5 Kon unsa ang labing haom nga oras alang sa pagpahigayon sa maong mga tigom ug kon unsa ka subsob kini himoon sulod sa usa ka semana magdepende sa kahimtang ug gidak-on sa teritoryo. Ang mosunod nga mga pangutana magsilbing giya aron matino kon asa o kanus-a angayng ipahigayon ang tigom sa dayon nang pagsangyaw.
6 Unsa nga teritoryo ang nanginahanglag dugang pagtagad? Unsa ang labing haom nga oras sa pagpamalaybalay? Angay bang mag-eskedyul ug pagsangyaw sa balay ug balay o kaha sa pagbalikduaw sa gabii? Ang tanang kahikayan sa pagsangyaw angayng ipaskil sa information board sa kongregasyon. Buot sa tanang magmamantala sa Gingharian nga makobrehan gayod ang ilang teritoryo sa sukod nga kita usab, sama kang apostol Pablo, makaingon: “Ako wala nay teritoryo nga wala matandog.”—Roma 15:23.
7. Unsay kaakohan sa usa nga modumala sa grupo sa pagsangyaw?
7 Pagdumala sa mga Tigom sa Dayon Nang Pagsangyaw: Pinaagi sa pagpangandam pag-ayo, ikapakita sa usa nga giasayn sa pagdumala sa maong tigom nga iya gayong gitahod ang maong teokratikanhong kahikayan. Kini angayng sugdan nga untop sa oras ug angayng matulon-anon ug mubo, mga 10 hangtod 15 minutos. Ang magdumala angayng mahibalo daan sa teritoryo nga pagakobrehan sa dili pa magsugod ang tigom. Sanglit dili na angayng hulaton pa ang mga igsoon nga naulahi sa tigom sa dayon nang pagsangyaw, makatabang ang pagbilin ug mensahe kon asa ang teritoryo. Angayng manglakaw dayon ang tanan paingon sa teritoryo human sa tigom. Ang maayong pagkaorganisar ug matulon-anong tigom sa dayon nang pagsangyaw magtagana gayod sa gikinahanglang instruksiyon alang sa tanang presente sa pagtuman sa ilang ministeryo nianang adlawa.—Prov. 11:14.
8. Sa unsang mga paagi kadtong motambong sa mga tigom sa dayon nang pagsangyaw makigkooperar sa nagapanguna?
8 Pagtambong sa mga Tigom sa Dayon Nang Pagsangyaw: Gikinahanglan gayod ang kooperasyon. (Heb. 13:17) Kon posible, tabangan sa nagdumala sa grupo ang mga igsoon nga nanginahanglag kauban. Maayo nga presente ang eksperyensiyado nga mga magmamantala aron matabangan ang mga bag-ohan ug kulag kasinatian nga mga magmamantala. Mapuslanon gayod kon kita andam makig-uban sa lainlaing mga igsoon. (Prov. 27:17; Roma 15:1, 2) Ang tanan angay gayong maningkamot nga moabot ug sayo. Ang atong pagtahod niining teokratikanhong kahikayan ug konsiderasyon sa atong mga igsoon motukmod kanato sa paghimo sa gikinahanglang mga kausaban.—2 Cor. 6:3, 4; Filip. 2:4.
9. Sa unsang mga paagi ang mga payunir makasuportar niini nga kahikayan?
9 Pagsuportar sa mga Payunir: Ang pagsuportar sa mga payunir sa mga tigom sa dayon nang pagsangyaw mapuslanon ug makapadasig gayod sa tanan. Tinuod, ang mga payunir adunay daghang kaakohan. Gawas pa sa pagdumalag mga pagtuon sa Bibliya ug pagbalikduaw, lakip sa ilang inadlaw nga eskedyul ang pagtuman sa ilang mga responsabilidad sa pamilya ug ang sekular nga trabaho. Busa, dili angayng bation sa mga payunir nga sila obligado sa pagtambong sa tanang tigom sa dayon nang pagsangyaw nga giorganisar sa kongregasyon, ilabina kon kana ginahimo kada adlaw. Hinunoa, basin makahimo ang mga payunir sa pagsuportar bisan sa pipila lang ka tigom sa dayon nang pagsangyaw sa matag semana. Ang mga tigom sa dayon nang pagsangyaw makatabang sa pagbansay sa mga membro sa kongregasyon, ug ang espirituwalidad ug kasinatian sa mga payunir dako gayod ug ikatabang sa uban. Sila nakabatog kasinatian diha sa ministeryo tungod sa ilang makanunayong pagsangyaw. Mahimo nila kining ipaambit sa mga igsoon. Ang ilang kasibot diha sa ministeryo ug sa mga tigom sa dayon nang pagsangyaw angayng sundogon sa uban. Gipabilhan gayod ang ilang pagsuportar niining maong mga tigom.
10. Nganong angay nga ang tanang magmamantala sa Gingharian kinasingkasing nga magpaluyo niining kahikayana?
10 Sama sa gihimo ni Jesus ug sa iyang mga tinun-an, ang dakong bahin sa atong buluhatong pagsangyaw sa Gingharian napalampos pinaagi sa pagpamalaybalay. Ang katuyoan sa mga tigom sa dayon nang pagsangyaw mao ang pagdinasigay sa usag usa ug ang pagkahimong epektibo sa pagsangyaw. Ang maong teokratikanhong mga kahikayan angayng paluyohan sa tanang mga magmamantala kutob sa ilang maarangan. (Buh. 5:42; 20:20) Hinaot nga kitang tanan kinasingkasing nga magpaluyo niining kahikayana. Sa pagbuhat niana, kita makaseguro sa dagayang panalangin ni Jehova ug makapalipay sa kasingkasing sa atong Lider, si Jesu-Kristo, samtang kita nagasangyaw sa maayong balita sa Gingharian sa Diyos.—Mat. 25:34-40; 28:19, 20.