Pahimusli Gayod ang mga Tigom sa Dayon Nang Pagsangyaw
1. Sa unsang paagi ang mga tigom sa dayon nang pagsangyaw makatabang kanato?
1 Ang matulon-anong mga tigom sa dayon nang pagsangyaw maghatag ug tinuod nga pagdasig ug praktikal nga instruksiyon sa dili pa kita mosangyaw. Kini makapaarang kanato sa pagsangyaw duyog sa ubang mga magmamantala aron kita mapalig-on ug mabansay. (Prov. 27:17; Eccl. 4:9, 10) Unsay atong mahimo aron makapahimulos gayod niining mga tigoma?
2. Unsa ang pipila ka butang nga mahimong hisgotan sa tagdumala?
2 Ang Tagdumala: Ang espesipikong impormasyon nga hisgotan niining mga tigoma wala larawa daan. Busa, kinahanglang mangandam ka pag-ayo kon ikaw ang magdumala. Ayaw paghunahuna nga hisgotan dayon ang inadlawng teksto, bisan tuod mahimo nimo kining ilakip sa panaghisgot kon kini direktang nalangkit sa ministeryo. Paghunahunag impormasyon nga magamit sa mga manangyaw nianang adlawa. Pananglitan, makahisgot o makapasundayag ka ug usa ka presentasyon. Lagmit gusto nimong repasohon ang usa ka punto gikan sa librong Nangatarongan, sa librong Tunghaan sa Ministeryo, o sa kinabag-ohang bahin sa Tigom sa Pag-alagad. Sa laing mga higayon, makahisgot ka kon unsaon pagdumala ang usa ka problema nga mahimong motungha diha inyong teritoryo, o makahisgot ka kon unsaon pag-ugmad ang interes ug pagsugod ug mga pagtuon sa Bibliya, ilabina kon daghang magmamantala ang maghimog mga balikduaw. Bisan kon unsa pay hisgotan, magmadasigon ug magmapositibo.
3. Unsa ka dugay himoon kining tigoma, ug unsay angayng mahisgotan sulod nianang panahona?
3 Sugdi ang tigom nga untop sa panahon, bisag nahibalo ka nga maulahi ang uban. Hunahunaa pag-ayo ang pag-organisar sa mga grupo, ug hatagig teritoryo kadtong nanginahanglan niana. Ang gidugayon sa tigom kinahanglang dili molapas sa 10 ngadto sa 15 minutos ug mas kubos pa kon kini magsunod sa usa ka tigom sa kongregasyon. Sa dili pa nimo taposon ang tigom, ang tanan kinahanglang mahibalo kon kinsay ilang kuyogan ug asa sila magsangyaw. Ang tigom kinahanglang taposon sa pag-ampo.
4. Unsay makatabang kanatong tanan aron makapahimulos gayod sa mga tigom sa dayon nang pagsangyaw?
4 Makatabang Kamo: Sama sa mga tigom sa kongregasyon, atong ikapakita ang pagtahod kang Jehova ug konsiderasyon sa uban pinaagi sa pag-abot nga untop sa panahon. Pakigbahin sa panaghisgot. Mahimong hangyoon nimo ang tagdumala nga ipauban ka sa usa ka igsoon, o makahimo ka daan ug kaugalingong mga kahikayan sa dili pa ang tigom. Kon gusto nimong mohimog kaugalingong mga kahikayan, paningkamoting “magpasangkad” pinaagi sa pag-uban sa lainlaing mga magmamantala, imbes makig-uban kanunay sa imong suod nga mga higala. (2 Cor. 6:11-13) Sa dihang matapos na ang tigom, ayawg usba ang kahikayan, ug lakaw dayon sa teritoryo.
5. Unsay katuyoan sa mga tigom sa dayon nang pagsangyaw?
5 Ang katuyoan sa mga tigom sa dayon nang pagsangyaw maoy susama sa mga tigom sa kongregasyon. Kini gihikay aron kita “magmahunahunaon sa usag usa aron sa pagdasig ngadto sa paghigugma ug sa maayong mga buhat.” (Heb. 10:24, 25) Kon maningkamot kita sa pagpahimulos gayod gikan niining mga tigoma, kita matabangan sa pagtuman sa atong ministeryo—nga usa gayod ka ‘maayong buhat’!