Pagtanyag sa Maayong Balita—Sa Grupo nga Pagsangyaw
1 Ang pakigtigom sa uban sa pag-andam sa pag-alagad sa kanataran maoy praktikal ug makapalig-on. Ang maong tagana nagadasig sa atong mga igsoon sa pagbuhat nga abaga-sa-abaga sa pagpalanog sa maayong balita.
2 Ang ubang mga kongregasyon makaeskedyol man sa ilang pag-alagad sa kanataran human sa usa ka regular nga panagkatigom sa Kingdom Hall. Samtang ang gidaghanon sa nagapaluyo niining kahikayana daghan, ang mga konduktor sa pagtuon sa libro kinahanglan gihapon mohatag ug pagtagad sa mga magmamantala sa ilang grupo. Depende sa ilang mga kahimtang, ang ubang mga kongregasyon nagahimo sa ilang kataposan sa semanang panagkatigom sa pag-alagad sa kanataran sa matag Congregation Book Study. Adunay dayag nga mga bentaha niining kahikayana. Ginaila nga ang kahimtang nagkalainlain sa matag kongregasyon. Ang pag-ubanay sa pipila ka gagmayng grupo mahimong tukma sa panahon. Busa ang lawas sa mga ansiyano kinahanglan nga magatagad sa lokal nga mga kahimtang ug tinoon kon unsang kahikayana ang labing maayo.—Tan-awa ang Atong Ministeryo, panid 96-7.
SUPORTAHI ANG MGA TIGOM SA PAG-ALAGAD SA KANATARAN
3 Ang grupo nga pagsangyaw gikan sa mga pagtuon sa basahon nagatagana ug maayong higayon sa konduktor sa paghatag ug personal nga tabang. Ang bag-ong mga magmamantala ingon man kadtong may mga kasinatian na makabenepisyo pinaagi sa pagbuhat kauban sa mga ansiyano ug mga ministeryal nga alagad.
4 Ang tunga sa semanang mga tigom sa pag-alagad sa kanataran mahimong dumalahon sa Kingdom Hall o sa lainlaing mga dapit nga kombeniyente sa mga magmamantala. Ang gidaghanon niini magadepende sa lokal nga kahimtang ug usab niadtong magapanguna sa buluhaton.
5 Unsa ang mahimo sa mga konduktor sa pagtuon sa basahon o niadtong giasayn nga magaatiman sa grupo sa pagtino nga ang tanan makapahimulos ug maayo sa panahon nga gigahin para sa grupo nga pagsangyaw? Ang mga konduktor magahinumdom kanunay nga ang tigom sa pag-alagad sa kanataran kinahanglang dili mosobra sa 10 ngadto sa 15 minutos. (Tan-awa ang Atong Ministeryo, panid 77.) Dakong panahon ang madaginot kon ang teritoryo iasayn una pa mogula sa kanataran, niini malikayan ang dakong grupo nga magtigom sa kilid sa dalan ug dili organisado tan-awon. Ang pipila nakakaplag nga makatabang ang pag-asayn ug bahin sa teritoryo ngadto sa may katakos nga mga magmamantala sa usa ka yugto sa panahon. Mao nga, sa dihang nahikay na ang grupo, sila makalakaw dayon paingon sa teritoryo. Ang magtatan-aw sa pag-alagad kinahanglan nga alisto sa pagsulbad sa mga suliran sa pag-organisar sa mga grupo aron mas dakong panahon ang magamit sa kanataran.
6 Daghang karaan nang magmamantala ang mangayaong nagaasoy sa ilang mga kasinatian sa katuigan samtang nakig-uban sa pagbuhat sa buluhatong ginurupo. Ang maong mga kasinatian nagapalig-on sa pagkahiusa sa kongregasyon ug sa higot sa Kristiyanong gugma. Samtang may panahon nga may maayong katarongan ang pag-ubanay sa duha ka magmamantala, sa daghang mga teritoryo mas dako ang mahimo kon mag-inusara samtang ang uban diha lamang sa duol. Ang pagbuhat nga nag-inusara, diin itugot sa kahimtang, nagatugot kanato nga maabot ang ubay-ubayng mga tawo, ug usa kini ka maayong pagbansay sa umaabot nga panahon sa dihang ang dili ginalaoman nga pagdili ipakanaog batok sa atong buluhatong pagsangyaw. Maayong pagtimbang-timbang, ingon man tinguha sa paghimo ug dugang sa maarangan, ang magapalihok sa mga kahikayan nga atong himoon.
7 Si apostol Pablo midasig sa mga Kristiyano sa “pagkupot nga malig-on sa atong publikong pagpahayag sa atong paglaom.” Usab, ang iyang inspiradong mga pulong nagaingon kanato sa “pagtagad sa uban sa gugma ug maayong mga buhat, . . . magdinasigay sa usag usa.” (Heb. 10:23-25) Pinaagi sa pagsuportar sa kahikayan sa grupong pagsangyaw, hinaot nga madasig nato ang atong mga igsoon sa “gugma ug maayong mga buhat.” Samtang atong ginahimo kini, atong anihon ang dagayang mga ganti gikan kang Jehova.