Suportahi ang Tungasemanang mga Kahikayan sa Pag-alagad
1 Si Jesus miingon: “Sa tanang kanasoran ang maayong balita kinahanglang isangyaw una.” (Mar. 13:10) Sa pagtuman niining sugoa, ang katawhan ni Jehova aktibo sa ministeryo, dili lang sa mga hinapos ang semana, kondili sa mga adlaw sa semana usab. Ikaw ba makaarang sa pag-ambit sa tungasemanang pag-alagad sa kanataran kauban sa uban sa inyong kongregasyon?
ORGANISADONG MGA KAHIKAYAN GIKINAHANGLAN
2 Ang magtatan-aw sa pag-alagad kinahanglang manguna sa paghimog tinong mga kahikayan sa tungasemanang pagsangyaw. Ang mga dapit ug mga panahon kinahanglang kombeniyente sa kadaghanan sa mga magmamantala. Ang mga tigom sa dayon na nga pagsangyaw sagad ginadumala sa mga ansiyano, ministeryal nga mga alagad, o ubang takos bawtismadong mga igsoong lalaki. Kon sila dili mabatonan, ang takos bawtismadong mga igsoong babaye ikatudlo man. (Matikdi ang Organisado sa Pagtuman sa Atong Ministeryo, panid 77, parapo 3.) Ang usa ka sister nga matudlo kinahanglang magpandong sa ulo ug sagad maglingkod ra sa dihang magadumala sa tigom sa dayon na nga pagsangyaw.
3 Kining mga tigoma sa dayon na nga pagsangyaw kinahanglang andam kaayo. Ang teksto sa adlaw mahimo mang mahisgotan, ilabina kon kana tukma alang sa pag-alagad sa kanataran. Ang mga puntos gikan sa Mga Tigom sa Dayon na nga Pagsangyaw kinahanglang gamiton. Ang mga asaynment sa teritoryo kinahanglang himoon alang sa mga grupo.
SUPORTAHI ANG LOKAL NGA MGA KAHIKAYAN
4 Kadtong mosuportar sa tungasemanang mga kahikayan adunay kahigayonang makahibalag sa mga tagbalay nga dili masakpan sa mga hinapos ang semana. Makaarang ka sa pagsangyaw uban sa mga sister nga adunay mga anak nga nagaeskuwela o kansang mga bana wala sa kamatuoran. Ang mga batan-ong nagabakasyon sa eskuwela makasuportar man sa tungasemanang mga kahikayan sa pagsangyaw. Sagad ang mga payunir anaa sa pagkuyog sa bag-ohan ug sa mga dili bansay diha sa lainlaing bahin sa ministeryo sulod sa maong semana.
5 Ang tanan gidasig sa pag-abot sa hustong panahon alang sa tigom sa dayon na ang pagsangyaw ug moambit sa mga panaghisgot ug sa pag-ampo. Ang imong pagbuhat niana makaabag kanimo sa masibotong pagpakig-ambit sa ministeryo sa kanataran ug sa pagpangita sa takos nga mga tawo diha sa inyong teritoryo.—Mat. 10:11.