Kahikayan sa Pagtuon sa Libro sa Kongregasyon
Bahin 3—Usa ka Sentro sa Ministeryo sa Kanataran
1 Dugang pa sa pagtaganag lugar alang sa pagtuon sa grupo, ang dapit sa Pagtuon sa Libro sa Kongregasyon mahimong magsilbeng tagboanan alang sa pag-alagad sa kanataran. Ang mga panahon sa maong mga tigom kinahanglang kombeniyente alang sa kadaghanan sa mga magmamantala, ug ang mga tigom kinahanglang makahatag ug mapuslanong tabang sa pag-organisar sa mga magmamantala alang sa pag-alagad sa kanataran.
2 Ang mga grupo nga hustong pagkaorganisar alang sa pagtuon ug pagsangyaw makapatunhay sa espirituwalidad. Kinsa may wala makabenepisyo sa pagpalig-on o mga sugyot kon unsaon sa pagbuntog sa mga pagsupak, ang paagi sa pagsugod ug panaghisgot, kon unsaon sa pagtanyag sa usa ka pagtuon sa Bibliya, o kon unsay isulti sa usa ka balikduaw? Ang isigkamagmamantala o mga payunir nga nagakatigom sa lugar sa pagtuon sa libro nagatagana gayod sa maong pagbulig.—Gal. 6:9, 10.
3 Ang Gidulang Papel sa Konduktor: Ang konduktor sa Pagtuon sa Libro sa Kongregasyon maoy nagapanguna ug maoy responsable sa pag-organisar sa kalihokan sa maong grupo. Siya regular nga nagasangyaw uban sa mga magmamantala diha sa kanataran. (1 Ped. 5:2, 3) Maoy sa kasagaran nga gipalabi alang sa matag grupo sa pagtuon sa libro nga adunay kaugalingong tigom sa dayon na ang pagsangyaw inay kay magtagbo sa usa ka dapit ang tanang mga grupo. Hinuon, ang duha ka gagmayng grupo mahimo mang langkobon kon gikinahanglan. Kon ang pagsangyaw sa kanataran himoon human sa pagtuon sa Bantayanang Torre, ang tigom sa dayon na nga pagsangyaw kinahanglang mub-on ra.
4 Kon ang mga tigom sa dayon na nga pagsangyaw himoon sa panahon ug lugar nga naeskedyol, ang mga magmamantala makaplano uyon niana, kay nahibalo man sila nga adunay mabatonan nga teritoryo ug adunay mga ikauban sa pagsangyaw. (Itandi ang Lucas 10:1.) Bisan pa kon ang konduktor sa pagtuon dili makaanha, siya magtaganag teritoryo ug maghimog mga kahikayan alang sa grupo. (om pp. 44-5) Kon walay takos nga igsoong lalaki nga manguna sa pagdumala sa tigom sa pagsangyaw, mahimong itudlo sa konduktor ang usa ka sister sa paghimo niini. (om pp. 77-8) Ang kalibog malikayan kon ang grupo sa regular nga paagi magtagbo sa naandang panahon ug lugar alang sa pagsangyaw. Ang bisan unsang temporaryong mga kausaban niini kinahanglang ipahibalo nga usa ka semana nga abante kutob sa mahimo.
5 Kooperasyon Gikinahanglan: Ang tanan gikinahanglang manlimbasog nga adunay pakig-ambit sa lainlaing bahin sa ministeryo sa kanataran. Ang mga magmamantala duyog man nga makaandam pinaagig mga praktis sesyon, paggamit sa mga pagsupak nga lagmit motungha diha sa lokal nga teritoryo.—Prov. 27:17.
6 Gusto ba nimong may batid nga magmamantala nga motabang kanimong mas mahanas diha sa buluhatong paghimog tinun-an? Kon mao, sultihi ang imong konduktor sa Pagtuon sa Libro sa Kongregasyon. Basin siya makahikay ug takos nga magmamantala sa pagbulig kanimo. Aron makabenepisyo, sa kakugi ipadapat ang mga sugyot nga nadawat ug tumana ang gihimong mga kasabotan.
7 Kadtong gitudlo sa kondutor sa pagtuon sa libro aron motabang kinahanglang makataronganon sa ilang mga pagdahom. Ang kasinatian nagbutyag nga kadtong adunay positibo ug timbang nga panglantaw sa pag-alagad sa kanataran mao ang makaarang kaayo sa pagbansay sa uban. Ang pagdayeg himoon kanunay samtang may nahimong pag-uswag. Dayon ang ubang mga tumong ikapahimutang.—Itanding Lucas 19:17-19.
8 Buot tang magtinabangay sa usag usa sa pagkahimong epektibo diha sa pagsangyaw sa maayong balita ug sa paghimog mga tinun-an. Ang nagakagrabe nga mga kahimtang sa kalibotan nagapamatuod sa pagkadinalian niining buluhatona. Nalambigit ang mga kinabuhi, ug si Jehova nagapadali sa pagpanigom. (Isa. 60:22) Samtang atong hinumdoman ang ministeryo nga gihatag kanato, kita suod nga mobuhat uban sa atong grupo sa Pagtuon sa Libro sa Kongregasyon aron sa bug-os palamposon ang atong asaynment samtang nagatinambagay ug nagadinasigay sa usag usa.—Roma 12:6-8; 2 Tim. 4:1, 2, 5.