Pagtanyag sa Maayong Balita—Pagsugod ug mga Pagtuon sa Laktod nga Paagi
1 Si Jesus misugo kanato sa “paghimog mga tinun-an.” (Mat. 28:19) Aron palamposon kini kasagarang nagakinahanglang sugdan ang mga pagtuon uban sa mga interesado. Ang paggamit sa diretsong paagi sa pagsugod ug mga pagtuon diha sa pamalaybalay nga ministeryo makabulig kanato sa pagpalampos niini nga madali.
2 Unsa may atong isulti sa dihang gamiton ang laktod nga paagi sa pagsugod ug mga pagtuon sa Bibliya? Ang yano kaayo nga paagi mao ang labing maayo. Kita makaingon: “Ako interesado sa pagtabang sa mga tawo sa pagsabot sa Bibliya ug malipay nga tun-an kini uban kanimo ug sa imong banay diha sa imong balay nga walay bayad o obligasyon. Magamit nato ang imong Bibliya. Kon ugaling wala kay Bibliya, ako makakuhag usa alang kanimo.”
3 Aniay laing paagi: “Ang tuyo ko sa pagduaw karon mao ang pagdasig ug pagtuon sa Bibliya sa balay, nga motabang kanimo sa pagsabot kon hain padulong kining kalibotana ug kon unsay giandam sa Diyos alang kanato. Malipay ko sa pagpakita kanimo kon sa unsang paagi mapahimuslan mo gayod ang imong Bibliya. Wala ka ing obligasyon o bayad sa imong bahin.” Kon ang tagbalay mouyon, mahimong gamiton mo ang ‘tract’ nga Kinabuhi sa Malinawong Bag-ong Kalibotan o ang “Tan-awa!” nga brosyur sugod sa panid 3, parapo 1. Ang unang mga panid niini nga brosyur nagapasiugda sa saad ni Jehova sa pagpasig-uli sa Paraiso.
4 Gamita ang ‘Bible Tracts’: Ang tracts nakaplagan sa daghan nga mapuslanon sa dihang gamiton ang laktod nga paagi. Sa moanha ang tagbalay sa ganghaan, hatagi siya sa ‘tract’ nga Kinabuhi sa Malinawong Bag-ong Kalibotan nga wala pil-a aron iyang makita ang kompletong ilustrasyon. Kupti ang laing ‘tract,’ ug basaha o isulti sa ubang mga pulong ang mga pangutana nga anaa sa unang duha ka parapo. Hisgoti ang mga tubag, ug basaha ang nagapaluyong usa o duha ka teksto. Dayon hikaya nga mobalik. Ipatin-aw sa mubo ang atong walay bayad nga programa sa pagtuon sa Bibliya sa balay, o sa yano hikayang mobalikduaw ug tagdon ang dugang punto diha sa tract.
5 Sa dihang hikayon ang pagbalik, maayong hisgotan ang punto nga gibati mong makapainteres sa tagbalay. Mahimo kining sa pangutana nga paagi. Kini magbilin sa tagbalay sa mapaabotong paglantaw sa imong sunod nga duaw sa dihang ang maong pangutana pagatubagon.
6 Busa pahimuslan ta ang matag higayon sa pagsugod ug mga pagtuon ug makig-ambit sa sugo sa “paghimog mga tinun-an.”—Mat. 24:14; 28:19, 20; Mar. 13:10.