Pagsugod ug mga Pagtuon sa Bibliya sa Librong Labing Bantogang Tawo
1 Walay ikatandi sa kalipay sa pagpaambit sa kahibalo ngadto sa uban pinaagig usa ka pagtuon sa Bibliya sa balay.—Prov. 11:25.
2 Ilhanan sa Kataposang mga Adlaw: Kon gamiton mo ang sugyot diha sa artikulo sa itaas uban sa tract nga Kini Bang Kalibotana Molungtad?, sa unsang paagi masugdan mo karon ang pagtuon sa librong Labing Bantogang Tawo? Buksi ang libro sa kapitulo 111, ug basahang unang tulo ka parapo. Mabasa mo dayon ang unang pangutana sa kataposan nianang kapituloha: “Unsay nakapukaw sa pangutana sa mga apostol, apan unsay anaa sa ilang mga hunahuna?” Tabangi ang tagbalay sa pagpangatarongan diha sa tubag, ug gamitang ilustrasyon sa pagtudlo. Human sa pagbasa sa mga parapo kuwatro ngadto sa sayes, isukna ang sunod nga pangutana: “Unsang bahina sa tagna ni Jesus ang natuman sa 70 K.P., apan unsay wala mahitabo niadto?” Kon mopatim-aw nga interesado ang tagbalay ug may ikagahin nga panahon, padayona ang inyong panaghisgot.
3 Kon ang tagbalay puliki nianang panahona, makasukna ka: “Buot ba nimong masayod ug dugang bahin sa kon kanus-a ang kataposan sa sistema sa mga butang?” Mahimong hikayon dayon nimo nga makabalik aron pagtubag sa pangutana.
4 Posible ba ang usa ka Malinawong Kalibotan? Kon gigamit mo ang tract nga Kinabuhi sa Malinawong Bag-ong Kalibotan sa pagtultol ngadto sa librong Labing Bantogang Tawo, sa unsang paagi ang kapitulo 133 makatabang sa pagsugod ug pagtuon sa Bibliya?
Human sa pagbasa sa 2 Pedro 3:13, mahimong basahon mo o lakbitan ang ikaduhang parapo sa panid 3 sa tract ug unya moingon:
◼ “Si Jesu-Kristo ang mahimong Hari sa Gingharian ni Jehova. Matikdi kon giunsa sa librong Ang Labing Bantogang Tawo nga Nabuhi Sukad paghubit si Jesus ug pagtug-an kanato kon unsa ang iyang mapalampos sa umaabot.” Unya basaha ang interong kapitulo. Suknaang tagbalay sa unang pangutana sa kataposan sa kapitulo: “‘Unsa unya ang makalipay nga pribilehiyo sa mga maluwas sa Armageddon ug ilang mga anak?’ [Tugoting motubag.] Buot ba nimong mahimong bahin sa bag-ong yuta nga mandoan ni Jesus ingon nga Hari? Buot kong batonan ang kahigayonan kada semana sa pagbulig kanimo sa pagtan-aw gikan sa Bibliya kon sa unsang paagi kini mahimong posible.”
5 Ang pipila ka tawo mahimong mainteres usab sa dugang panaghisgot bahin kang Jesu-Kristo niining duawa.
Makaingon ka:
◼ “Kining libroha nagapresentar sa yutan-ong kinabuhi ni Jesus ingon sa pagkahan-ay diha sa upat ka Ebanghelyo. Buot ba nimong makakat-on ug dugang bahin niini?” Kon uyon ang tagbalay, mahisgotan mo ang una sa mga milagro ni Jesus, sa kapitulo 15.
6 Sa pagkamatuod, ang pagtanyag sa pagpaambit sa mga pagtulon-an ni Jesu-Kristo pinaagig usa ka pagtuon sa Bibliya maoy labing magantihong panlimbasog.