Tabangi ang Uban sa Pagkat-on Maylabot sa Anak sa Diyos, si Jesu-Kristo
1 Niining panahona sa tuig daghang nag-angkong Kristohanon nagahunahuna ug labaw kang Jesus kay sa ubang mga panahon. Busa, kini maoy maayong panahon sa pagpaila sa librong Ang Labing Bantogang Tawo nga Nabuhi Sukad. Unsaon man nato pagtanyag niining libroha nga epektibo sa Enero?
2 Sulaying makadiretso dayon sa pinasukad-Bibliyang panaghisgot nga nagatumong sa pagtagad kang Jesus.
Human matimbaya ang tagbalay, ikaw makasulti ug susama niini:
▪ “Karong adlawa kami nagapangutana sa among mga silingan kon unsay ilang hunahuna sa dihang mabasa nila sa ilang Bibliya ang mahitungod sa pagkinabuhi sa walay kataposan. [Tugoting motubag.] Kini ilabinang makaiikag kay ang Bibliya nagahisgot niini sa mga 40 ka beses. Unsa man ang mahimong kahulogan nianang maong kinabuhi alang kanato? Matikdi kon unsa ang giingon sa Pinadayag 21:4. [Basaha.] Namatikdan ba nimo kon unsa ang gisaad? [Tugoting motubag.] Sa unsang paagi mabatonan nato ang kinabuhing walay kataposan?” Basaha ang Juan 17:3, ug ipatugbaw ang panginahanglan sa pagkuhag kahibalo sa Diyos ug sa iyang Anak, si Jesu-Kristo. Itanyag ang librong Labing Bantogang Tawo, nga nagagamit sa mga sub-ulohan diha sa pasiuna aron mapukaw ug dugang ang iyang interes.
3 Kon mobalibad ang tagbalay sa libro, itanyag ang kinabag-ohang mga gula sa Ang Bantayanang Torre ug Pagmata! o ang tract nga Kini Bang Kalibotana Molungtad? Dalhang pagtagad sa usa o duha ka tinong punto diha sa basahon nga gipresentar. Ipasalig nga mobalik sa kombeniyenteng panahon aron padayonon ang inyong panaghisgot.
4 Kon ang tagbalay, maorag puliki, hayan maalamon nga pamub-on ang presentasyon sa ibabaw. Ang mas bag-ong mga magmamantala mahimong makakaplag usab sa sunod nga presentasyon nga sayon nga gamiton.
Human ipaila ang atong kaugalingon, makaingon kita:
▪ “Karong adlawa kami nagasukna sa among mga silingan kon unsay ilang hunahuna sa dihang ilang mabasa sa ilang Bibliya ang mahitungod sa pagbaton ug walay kataposang kinabuhi. Pananglitan, sa Juan 17:3 si Jesus miingon: [Basaha.] Aron matabangan ang katawhan sa pagkat-on ug labaw pa bahin kang Jesu-Kristo ug kon unsa ang iyang gitudlo, kining libroha gipatik.” Buksi ang libro ngadto sa pipila ka maanindot nga ilustrasyon. Paklia ngadto sa pasiuna, ug basaha ang ikaduhang parapo ubos sa sub-ulohang “Mga Kaayohan sa Pagtuon Mahitungod Kaniya.” Kon interesado ang tagbalay, itanyag kaniya ang basahon.
5 Kon ikaw nagatanyag ug daandaang mga basahon ingon sa gipahimangno diha sa Mga Pahibalo alang sa pipila ka pinulongan, among isugyot nga gamiton nimo ang mga presentasyon ug mga kasulatan sa itaas, nga nagatumong sa tukmang mga ulohan sa libro nga imong gitanyag sa imong pinulongan. Bisan unsa mang basahon ang imong itanyag, kanunayng magmaalisto sa pagduso sa pagtuon sa Bibliya bisan sa unang duaw o sa imong pagbalikduaw.
6 Sa Enero, itumong natong tanan ang pagtagad diha sa Anak sa Diyos, si Jesu-Kristo, aron matabangan ang uban ngadto sa dalan sa kinabuhi.—Mat. 7:14.