Pagsugod ug mga Pagtuon sa Bibliya sa Enero
1 Si Jesus nagsugo sa iyang mga tinun-an nga mahimong mga magtutudlo sa maayong balita. (Mat. 28:19, 20) Ang maong pagpanudlo sa panguna ginahimo pinaagig pagdumalag mga pagtuon sa Bibliya. Nagapakig-ambit ka ba niining buluhatona? Kon wala, sa unsang paagi ikaw makasugod ug pagtuon aron imong mapahimuslan ang mas dakong pagpakig-ambit sa pagtudlo sa uban?
2 Tingali atong nahatagan ang tagbalay ug kopya sa tract nga Kini Bang Kalibotana Molungtad? ug misaad nga mobalik aron paghisgot sa kaundan niini.
Sa dihang nagabalikduaw sa usa ka tagbalay nga atong nabinlan ug tract, kita makaingon:
▪ “Niadtong dinhi ko sa miaging pipila ka adlaw, atong nahisgotan kon giunsa ni Jesus pagtagna ang mga kahimtang nga nagalungtad sa atong adlaw. Buot nakong tagdon sa mubo ang pipila ka impormasyon diha sa tract nga akong gikabilin kanimo. Matikdi kon unsay giingon ubos sa sub-ulohang ‘Ang Ilhanan.’” Paklia ngadto sa panid 3 sa tract, ug hisgoti ang unang duha o tulo ka parapo ubos sa maong sub-ulohan, nga nagabasa sa gisitar nga mga kasulatan. Hikaya nga makabalik ug mahisgotan ang sunod pipila ka parapo. Dasiga ang tagbalay sa pagbasa niini una pa ikaw mobalik.
3 O makaingon ka sa susama niini:
▪ “Sa miaging higayon nga nagkahisgot ta, akong gibilin nimo ang tract nga Kini Bang Kalibotana Molungtad? Nianang higayona atong gibasa ang mga pulong ni Jesus sa Juan 17:3. [Basaha.] Sanglit hinungdanon man nga makakat-on bahin sa Diyos ug kang Jesus kon kita buot ug kinabuhing walay kataposan, maoy bililhon nga makabaton nianang kahibaloa. Sa dihang si Jesus dinhi sa yuta, iyang gipabanaag ang daghang kahibulongang hiyas sa Diyos. Busa sa dugang pa nga kita makakat-on bahin kang Jesus ug sa iyang ministeryo, sa dugang pa nga kita makaila bahin sa iyang Amahan. Matikdi kon unsay giingon niining libroha, Ang Labing Bantogang Tawo nga Nabuhi Sukad.” Basaha ang una ug ikaduhang parapo sa ikanapulong panid sa kapitulo 116. Ipunting ang mga ulohan sa kapitulo, mga ilustrasyon, ug ang mapa diha sa sinugdan sa libro. Dayon itanyag ang libro o, kon ang tagbalay mikuha na sa libro, hikaya nga makabalik aron padayonon ang inyong panaghisgot.
4 Human matimbaya ang tagbalay nga midawat sa librong “Ang Labing Bantogang Tawo,” kita makaingon:
▪ “Ingon sa akong nahisgotan sa miagi nakong duaw, ang librong Labing Bantogang Tawo gidesinyo alang sa pagtuon sa Bibliya. Buot nakong ipasundayag sa mubo kon unsaon kini labing epektibong magamit.” Paklia ang libro ngadto sa kapitulo 1, “Mga Mensahe Gikan sa Langit.” Basaha ang unang pangutana, unya tagda ang unang mga parapo. Ipunting ngadto sa ilustrasyon sa ikaduhang panid. Hisgoti ang nahibiling mga pangutana, ug ipatugbaw ang mga tubag segon sa itugot sa panahon. Una pa taposon ang duaw, hikaya nga makabalik ug padayonon ang panaghisgot.
5 Pinaagig pagmentinar ug usa ka positibong tinamdan, pagpangandam pag-ayo, ug pagpahimulos sa matag kahigayonan, kita masangkapan sa pagsugod ug usa pagtuon sa Bibliya sa Enero.