Ipahimutang ang Pasukaranan sa Imong Unang Duaw
1 Ang paghimog epektibong mga balikduaw mahimong mas sayon sa dihang ipahimutang ta ang pasukaranan sa unang duaw. Ang librong Nangatarongan makatabang nato sa pagbuhat niana.
2 Ang mosunod nga presentasyon gipasukad sa ikaduhang pasiuna diha sa panid 10 sa librong Nangatarongan, ubos sa ulohang “Bibliya/Diyos.”
Human sa usa ka mahigalaong pagtimbaya, moingon:
◼ “Nakaplagan namong nagakadaghan ang mga tawo karong adlawa ang mibating wala makatino kon asa sila makakaplag og mapuslanong mga tubag sa nagadugang nga matag adlaw nga mga suliran. Nakaplagan ba nimo kanang tinuod? [Tugoting motubag.] Maoy naandan na nga ang mga tawo molantaw sa Bibliya alang sa tabang. Unsay imong pagbati bahin sa Bibliya?” Kon ang tagbalay mopahayag og pagduhaduha mahitungod sa pagkatinuod niini, kuhaang tract nga Kon Nganong Ikaw Makasalig sa Bibliya ug basaha ang ikaduha ug ikatulong mga parapo sa panid 2. Kon ang tagbalay mouyon nga ang Bibliya maoy Pulong sa Diyos, tan-awa ug basaha ang gisitar nga mga kasulatan sa ikaduhang parapo sa panid 2 sa tract, ug hisgoti kini sa mubo uban kaniya.
3 Kon adunay daghan sa imong teritoryo nga mipahayag og pagkadimatinuohon, sulayi paggamit ang ikalimang pasiuna sa panid 10 sa librong Nangatarongan.
Makaingon ka:
◼ “Tungod sa tanang panagbingkil sa kalibotan karong adlawa, daghang tawo ang nalisdan sa pagtuo sa Diyos. Unsay imong pagbati niini? [Tugoting motubag.] Matikdi kon unsay giingon niining maong tract mahitungod sa mga tawo, siyensiya, ug sa Bibliya.” Dayon sugdi ang pagbasa sa ikalimang parapo sa panid 3 sa tract nga Kon Nganong Ikaw Makasalig sa Bibliya.
4 Ipatunghang mga Pangutana Gikan sa ‘Tract’ Aron Pagtukod sa Imong Sunod nga Duaw: Planoha ang imong unang duaw nga maoy sinugdanan lamang sa usa ka serye sa mga duaw. Ayawg himoang detalyado kaayo, bisan pa niana ipakita sa tagbalay nga tiunay kang interesado kaniya. Human sa pagbasa sa duha o tulo ka parapo gikan sa tract, ipatunghang usa ka pangutana nga mahisgotan sa umaabot nga duaw.
5 Pananglitan, ikadiretso mo ang pagtagad sa ikatulong parapo sa panid 4 ug mosukna: “Nagahunahuna ka bang ang Bibliya nagataganag igong ebidensiya aron masaligan ang giingon niini mahitungod sa umaabot?” Kini magapahilunag pasukaranan alang sa balikduaw, sa dihang mahimong matagad mo ang mga kapitulo 9 ug 10 diha sa Ang Bibliya—Pulong sa Diyos o sa Tawo?
6 Kon ang tagbalay tiunay interesado gayod hayan iyang kuhaon ang librong Pulong sa Diyos ug ang New World Translation sa maong unang duaw. Kon mao, nan madala mo ang pagtagad ngadto sa mga puntos sa Kapitulo 10 sa libro ug mopatunghag mga pangutana nga pagatubagon sa imong sunod nga duaw. Kon lantawon ta ang kada tagbalay ingong purohan nga tinun-an, maningkamot gayod ta sa paggamit sa atong paniklop nga mga pulong sa pagpahimutag pasukaranan alang sa usa ka balikduaw.