Balika Aron Tabangan ang mga Tawo sa Pagkat-on sa Paagi nga Sila Mabuhing Walay Kataposan
1 Sukad sa pagluwat sa librong Live Forever, kapin sa 65 milyon ka kopya ang napagula diha sa 115 ka pinulongan. Daghan karon nga mga alagad na ni Jehova nakakat-on sa pasukaranang mga kamatuoran sa Bibliya pinaagi niining maong nindot nga instrumento. Niining bulana ug usab sa Nobyembre, kita may kahigayonan sa pagpahimutang niining maong tabang sa pagtuon sa Bibliya.
2 Pagbalikduaw Kanilang Nakabaton sa Libro: Ang pipila ka magmamantala adunay maayong mga resulta diha sa pagdala sa pagtagad ngadto sa listahan sa mga kaundan ug pagsukna sa interesadong tawo kon haing ulohana ang iyang nakaplagan nga may linain nga interes. Sa dihang ang tagbalay nakapili ug usa ka ulohan, isugyot nga iyang basahon ang maong kapitulo sa libro una pa sa sunod duaw.
3 Kutob sa maarangan, kinahanglang himoon nato ang tinong kasabotan sa pagbalikduaw. Una pa mobalik buot natong mangandam sa paghisgot sa pipila ka parapo sa kapitulo nga gipili sa tagbalay. Kon wala siyay gipili, atong masugdan ang paghisgot sa kapitulo 1. Human matagad ang pipila ka parapo, angay nga magpatungha ta ug usa ka pangutana nga makobrehan sa sunod nga pipila ka parapo. Kana magsilbing usa ka tikanganan ngadto sa laing balikduaw, sa dihang mapadayon nato ang pagtuon sa librong Mabuhing Walay Kataposan.
4 Hinuon, kon ang tagbalay may mga pangutana, labing maayong tagdon kini pag-una. Sagad nga ang iyang mga pangutana gitubag sa libro. Pinaagi sa atong pagkasinati sa mga kaundan sa libro, mahimo nato ang pagpakli sa tukmang mga parapo ug gamiton kanang materyala sa pagtubag sa mga pangutanang gipatungha.
5 Pagbalikduaw Niadtong Atong Nabinlan ug Tract: Tingali atong nabinlan ang tagbalay ug kopya sa Malinawong Bag-ong Kalibotan nga tract. Sa dihang mobalikduaw, mahisgotan nato ang nag-unang mga parapo sa tract.
Kon ang tagbalay nagapakitag tinuod nga interes, sa dihang moabot ta sa kataposan sa unang parapo sa panid 3, diin gikutlo ang Salmo 37:29, makaingon kita:
◼ “Kanang mga pulonga nagapatugbaw kon unsa ang gihisgotan niining basahona, Ikaw Mabuhing Walay Kataposan sa Paraiso sa Yuta. Matikdi ang panghunahuna dinhi sa parapo 3 sa kapitulo 1 ubos sa ulohang ‘Kon Nganong Makatuo Kita.’” Mabasa dayon nato ang parapo 3, mosukna sa pinatik nga pangutana diha niana, ug mopadayon sa mga parapo 4 ug 5 sa samang paagi. Unya makaingon kita: “Nganong ang mga kahimtang wala man gayod mahiuyon sa mga katuyoan sa Diyos karon? Ang sunod nga pipila ka parapo magasaysay niana, ug buot kong mobalik sa sunod semana niining sama nga panahon ug tubagon kanang pangutanaha alang kanimo.” Kon ang tagbalay nagpakitag tinuod nga interes, hayan buot natong itanyag ang libro niining puntoha. O makadesider ta nga buhaton kana sa kataposan sa atong sunod nga panaghisgot.
6 Sa pagtanyag sa librong “Mabuhing Walay Kataposan,” makaingon kita:
◼ “Naseguro kong malipay kang makabaton ug kaugalingong kopya niining basahona. Unya mahimong mabasa nimo nga abante pa ug sa ingon makakuhag dugang sa atong sunod nga panaghisgot.” Kon mouyon ang tagbalay nga kuhaon ang libro, nan itanyag nato kana sa naandang amot.
7 Si Jesus nagsugo sa iyang mga sumusunod sa pagtudlo sa uban kon unsa ang gikatudlo kanila. Kita mag-ampo kang Jehova sa pagpadalag dugang mga mamumuo. Busa, buhaton nato ang atong bahin sa pagpangita sa interesadong mga tawo ug magatudlo kanila nga mahimong mga isigkamamumuo diha sa alanihon.—Mat. 9:37; 28:19, 20.