Gamitang Librong Mabuhing Walay Kataposan sa mga Balikduaw
1 Si apostol Pablo mipakasama niadtong nagapakitag interes sa kamatuoran ngadto sa linghod nga mga tanom, nga nagakinahanglag makanunayong pagbisibis ug pag-ugmad. (1 Cor. 3:6-9) Maingon man karong adlawa, ang mga interesado nagakinahanglan sa malulotong pag-amoma nga atong ihatag sa dihang nagabalikduaw ta aron pag-ugmad sa ilang espirituwal nga pagtubo.
2 Ang mga indibiduwal nga sagad atong ginaduaw nanginahanglag mga pahinumdom sa pagbulig nilang makahinumdom sa mga puntos nga atong gihisgotan sa miaging duaw. Busa sa kada balikduaw maoy maayo nga marepaso sa mubo kon unsay inyong nahisgotan sa miaging panahon.
3 Sa paghimog balikduaw, bisan kon napahimutang ang librong “Mabuhing Walay Kataposan” o wala, basin buot mong gamiton kining diretsong paagi sa pagsugod ug usa ka pagtuon:
◼ “Daghang tawo nga among nakaestorya nakakaplag ug mga tubag sa ilang mga pangutana sa Bibliya pinaagig paggamit niining libroha.” Unya sa pagpakli ngadto sa mga kaundan, makasukna ka: “Haing ulohana dinhi ang nakapainteres gayod kanimo?” Paklia ngadto sa kapitulo diin siya interesado ug ipakita sa tagbalay kon sa unsang paagi ang kada parapo ginumerohan ug adunay katugbang nga pangutana sa ubos sa panid. Kobrehi ang pipila lamang ka punto ug himoang tinong mga kahikayan sa pagduaw pag-usab.
4 Ang lain pang paagi mahimong:
◼ “Nalipay gayod ako sa atong panaghisgot sa miaging semana. Daghang tawo ang mipahayag ug kabalaka kon nganong kanunay kaming nagaduaw sa ilang mga balay. Akong gihunahunang makapainteres kanimo ang komento nga gihimo sa panid 29 niining libroha. [Basahang parapo 11 sa librong Mabuhing Walay Kataposan.] Pinasukad sa kon unsay giingon niini dinhi, unsay gikinahanglan aron nga ang atong pagsimba mahimong dalawaton sa Diyos? [Tugoting motubag.] Balik sa mga adlaw ni Jesus, adunay naghunahunang ang ilang relihiyon maoy dalawaton sa Diyos. Matikdi kon unsay giingon bahin kanila sa parapo 2 niining kapituloha.”
5 Sa pagpaloap sa napahimutang nga librong “Mabuhing Walay Kataposan,” makaingon ka:
◼ “Sa miaging higayon nga ako miduaw, atong nahisgotan ang mga kahimtang sa kalibotan nga nagakinahanglag kausaban. Nahibulong ka ba kon nganong gitugotan sa Diyos ang pagkadaotan?” Tugoting motubag ug pakliang panid 99, parapo 2, nga nagamatikod sa tun-anang mga pangutana. Basaha ug hisgoti ang parapo, nga nagatan-aw sa mga kasulatan. Makadugang ka niini pinaagig pagpakli ngadto sa mga ilustrasyon diha sa libro, pananglitan, sa mga panid 78, 84-5, 119, 147, 149-53, ug 156-8.
6 Diin ang Usa ka Tract Gikabilin: Usahay ang usa ka tract gikabilin sa unang duaw. Sa dihang ikaw mobalik, mahisgotan mo ang usa o duha ka parapo gikan sa tract uban sa mga kasulatang gisitar. Dayon ipakita kon sa unsang paagi ang usa sa mga kasulatan gihisgotan sa mas detalyado diha sa librong Mabuhing Walay Kataposan.
7 Samtang matinumanon tang nagaatiman sa pagbisibis sa linghod nga mga tanom sa Kristohanong pagtuo nga gipaamoma kanato, ang Diyos magapatubo niana ngadto sa iyang kaugalingong kadayegan ug himaya.—1 Cor. 3:7.