Buligi ang Karnerohong mga Tawo sa Pagtukod ug Malig-ong Sukaranan
1 Ang pagtukod ug balay nagakinahanglan ug maampingong pagplano ug natingob nga paningkamot. Human nga madesinyo ang balay, ang dapit nga balayan kinahanglang andamon ug ang usa ka malig-ong sukaranan ipahimutang. Ang proyekto mauswagong nagakahulma hangtod nga sa kataposan makompleto. Sa susama, kinahanglang abagan nato ang karnerohong mga tawo sa pagkat-on sa kamatuoran nga mauswagon. Kita maningkamot sa pagpukaw sa interes diha sa unang duaw. Human niana, himoon nato ang mga balikduaw, magapahimutang ug pundasyon pinaagig pagtudlo sa pasukaranang mga kamatuoran bahin sa Diyos ug sa iyang katuyoan sa katawhan.—Luc. 6:48.
2 Sa bulan sa Nobyembre magatanyag kita sa librong Mabuhing Walay Kataposan sa mga interesado. Ang atong tumong angay nga dili lamang ang pagpahilunag basahon apan sa dihang makabilin kita ug usa diha sa tawo, kon kini usa ka tract o laing basahon interesado kita nga mobalik aron pagtukod diha sa napahimutang nga pundasyon. Sa dihang kita mobalik buot natong adunay espisipikong mga puntos sa hunahuna, ug mauswagong magtukod sa pundasyon. Sa matag duaw ang kahibalo sa tagbalay magatubo ug ang iyang pagtuo sa Diyos magauswag.
3 Kon makapahiluna ka ug librong “Mabuhing Walay Kataposan” sa imong pagbalik makaingon ka:
◼ “Gikalipay kaayo nako nga naabtan ka sa balay. Mahinumdoman nimo nga sa atong kataposang panaghisgot, atong gitagad ang nagakakunhod nga interes sa Diyos sa atong dapit. Ang Bibliya tin-awng nagalaraw nga ang Diyos interesado sa katawhan ug ang mga matarong mapanalanginan pinaagi sa iyang Gingharian. [Basahang Mateo 6:9, 10.] Pinaagi niining Ginghariana, ang pagkamatarong ug hustisya magapabilin.” Basahang Isaias 11:3-5, ug unya dalha ang pagtagad sa tagbalay sa unang duha ka parapo sa kapitulo 1 sa librong Mabuhing Walay Kataposan. Ipasundayag kon unsaon pagtuon ang materyal.
4 Kon ang tract nga Malinawong Bag-ong Kalibotan ang napahiluna sa unang duaw, ang pangunang mga puntos nga gitagad sa miagi, marepaso. Ipasiugda nga aron mabuhi sa bag-ong kalibotan, kinahanglang batonan nato ang tukmang kahibalo. Basahang Juan 17:3. Isaysay nga human sa pagbaton nianang kahibaloa, kinahanglan natong buhaton ang kabubut-on sa Diyos. Basahang 1 Juan 2:17. Dalha ang pagtagad sa tagbalay ngadto sa espisipikong mga puntos gikan sa panid 5 sa tract.
5 Kon ang ulohan sa kinabuhing pamilyahanon maoy gipatugbaw sa dihang nagapahilunag librong “Mabuhing Walay Kataposan,” sa imong pagbalik, makaingon ka:
◼ “Sa miaging higayon nga ako miduaw, atong nahisgotan ang ulohan sa kinabuhing pamilyahanon. Kita nagkauyon nga aron mabatonan ang malipayong kinabuhing pamilyahanon, ang mga giya nga makaplagan diha sa Bibliya kinahanglang sundon. Unsa may imong gihunahuna nga gikinahanglan aron magmalamposon ang kaminyoon?” Tugoting motubag. Ipatugbaw ang espisipikong mga puntos gikan sa impormasyon nga gilaraw sa mga panid 243-6 sa librong Mabuhing Walay Kataposan. Hangyoa ang mga komento sa tagbalay diha sa mga ilustrasyon ug tagda ang piniling mga puntos kon nahiangay.
6 Kon imong ibilin ang tract nga Magkalipay sa Kinabuhing Pamilyahanon, sa dihang mobalik ka repasoha ang yawing mga prinsipyo sa Bibliya nga gilaraw sa mga panid 4 ug 5. Kon ang interes gipakita, itanyag ang librong Mabuhing Walay Kataposan. Ipunting ang kapitulo 29, “Pagpalampos sa Kinabuhi sa Pamilya,” ug ipakita kon sa unsang paagi kini matagad uban sa tagbalay ug sa iyang pamilya.
7 Kitang tanan kinahanglang may makanunayong pakigbahin sa paghimog mga balikduaw. Sundala ang tanang interes nga gipakita pinaagig paghimog epektibong mga balikduaw sa Nobyembre.