Yano ug Epektibong mga Balikduaw
1 Ikaw ba sa regular nagahimog mga balikduaw, o nakaplagan mo bang kana malisod tungod kay wala mahibalo kon unsay isulti? Tulo ka butang ang makabulig kanimo nga magmalamposon: (1) maayong pagpangandam; (2) katakos sa paghisgot ug usa o duha ka punto diha sa pipila ka yanong mga ulohan sa Bibliya; ug (3) pagkahinangop nga maminaw sa panghunahuna sa tagbalay.
2 Sa pagpangandam sa paghimog balikduaw, tagda kon unsa ang ulohan nga labing maayong hisgotan uban sa tagbalay. Nagpatungha ka bag usa ka pangutana sa kataposan sa imong miaging duaw, o nagpakita bag interes ang tagbalay sa usa ka tino nga ulohan? Repasoha ang mga nota, ug gamitang librong Nangatarongan sa pagpangita sa impormasyon nga imong gikinahangalan sa paghimog epektibong balikduaw. Sa dihang moduaw ka, timbayaha ang tagbalay pinaagig ngalan.
3 Kon napahimutang mo ang Ang Bantayanang Torre ug Pagmata! sa tagbalay, ang imong balikduaw ikapasukad sa usa o duha ka yanong puntos nga imong napili gikan sa magasin. Kon napahimutang mo ang usa ka tract sa unang duaw, makomentohan mo ang tract mismo o mohisgot sa usa ka tukmang punto diha sa magasin o brosyur.
4 Kon napahimutang mo ang “Kinabuhi sa Malinawong Bag-ong Kalibotan,” sa yano moingon:
◼ “Sa ulahing higayon nga miduaw ko, nahisgotan nato ang bahin sa saad sa Diyos sa usa ka malinawong bag-ong kalibotan. Ingon sa atong nahisgotan, ang mas maayong mga kahimtang moabot pinaagig Gingharian sa Diyos. Unsay imong gihunahunang gikinahanglan alang kanato aron mahimong bahin nianang malinawong bag-ong kalibotan?” Tugoting tagbalay nga mokomento, unya hisgoting mga puntos sa Salmo 37:9, 11, 29.
5 Kon napahimutang mo ang “Unsay Paglaom Alang sa Namatay nga mga Minahal?,” kining mubong mga komento makapasugod ug panaghisgot:
◼ “Human sa atong ulahing panaghisgot, gikabilin nako nimo ang tract nga nag-ulohag Unsay Paglaom Alang sa Namatay nga mga Minahal? Ang ikatulong parapo nagapatunghag pipila ka makaiikag nga mga pangutana: ‘Nganong ang mga tawo mamatay? Hain ang mga patay? Ug sa unsang paagi atong matino nga sila mabuhi pag-usab? Ang sunod nga sub-ulohan, nag-ulohag ‘Kamatayon, ug Kon Unsay Mahitabo Dihang Kita Mamatay,’ nagtubag sa matag pangutana. Matikdi kon unsay giingon niini diha sa ikaupat nga parapo.” Basahang parapo, lakip ang duha ka kasulatan, ug suknaang tagbalay sa iyang panghunahuna.
6 Sa panahon sa panaghisgot, ang tagbalay mahimong magapahayag ug ubay-ubayng mga panghunahuna nga dili tukma. Dili kinahanglang makiglalis sa tanang butang nga iyang gisulti. Hinuon, magpabilin diha sa ulohan nga gihisgotan. Ang bisan unsang di-kasulatanhong mga ideya nga mahimong anaa kaniya matul-id sa umaabot nga mga balikduaw.
7 Planoha gayod nga mapalo-ap ang bisan unsang interes pinaagig paghimog yano ug epektibong mga balikduaw sa Mayo.