Gamita ang Librong Nangatarongan sa mga Balikduaw
1 “Ako ang nagtanom, si Apolos ang nagbisibis.” Matod pa gayod ni apostol Pablo. (1 Cor. 3:6) Ang balikduaw nga buluhaton kasagarang gipaila ingon nga “pagbisibis” nga buluhaton. Kini makapaarang kanato sa ‘pagsabwag sa kahibalo’ aron maamoma ang interes nga gipakita hangtod nga makagamot kini ug ang usa ka pagtuon sa Bibliya masugdan.—Prov. 15:7.
2 Ang pipila mahimong nagapanuko sa pagbalikduaw tungod sa pagkawaytino kon unsay isulti. Ang librong Nangatarongan nagtaganag mga laraw sa Kasulatanhong mga tema nga mahisgotan sa tagbalay. Pangandam ug maayo alang sa balikduaw, tingali nagagamit sa usa o labaw pa sa mosunod nga mga sugyot.
3 Kon napahimutang mo ang usa ka kopya sa Abril 15, 1992, nga “Bantayanang Torre” diha sa ulohan sa pag-ampo, sa imong pagbalik makapangutana ka:
◼ “Unsa ang makapahimo sa mga pag-ampo sa usa ka tawo nga dili madawat sa Diyos?” Human ang tagbalay matugotan sa panahon nga makatubag, kuhaa ang imong librong Nangatarongan ug paklia sa panid 280 (panid 293 sa Ingles). Hisgoti uban niya ang mga kasulatan ubos sa tema, nga nagadasig niya sa pagbasang diretso sa libro. Kon nasabtan mong may sinserong interes, mahimong palabihon mong itanyag ang suskrisyon.
4 Sa laing balikduaw, human masuknang tagbalay kon unsay iyang pagsabot sa Gingharian sa Diyos, ingon sa gipaila sa Pag-ampo sa Ginoo, paklia ang mga panid 180-87 (pp. 226-32 sa Ingles). Segon sa itugot sa panahon, tagika ang mga kasulatan ubos sa “Ang Gingharian sa Diyos Tinuod ba nga Kagamhanan?” ug “Unsa man ang Malampos sa Gingharian sa Diyos?”
5 Sa laing higayon, ang tagbalay malagmit mokuha sa usa ka kopya sa Abril 22, 1992, nga Pagmata! sa “Kinabuhi—Unsa ang Katuyoan Niini?”
Makasukna ka:
◼ “Aduna bay bisan unsang ebidensiya nga ang tawhanong lawas gidesinyo aron mabuhi sa walay kataposan sa yuta?” O, “Gihunahuna ba nimong ang patay nahibalo kon unsay gibuhat sa mga buhi?” Himoang kahikayan nga mobalik uban sa mga tubag, ingon sa makaplagan sa librong Nangatarongan sa mga panid 134 ug 104 (247 ug 100 sa Ingles).
6 Kon ang unang panaghisgot maoy bahin sa kaugmaon sa yuta, ikaw makasukna:
◼ “Tugotan ba sa Diyos ang mga tawo sa pagdaot sa yuta sa pipila ka paagi?” Unya pakliang mga panid 51-2 (pp. 44-5 sa Ingles) sa librong Nangatarongan ug hisgoti ang Kasulatanhong tubag. O hayan mangutana ang tagbalay: “Kon mga binilyon ang pagabanhawon gikan sa mga patay, hain man sila magapuyo?” Ang tubag makaplagan sa librong Nangatarongan, panid 300 (340 sa Ingles).
7 Ayawg sulayi nga pabahaan ang tagbalay sa tanang kamatuoran sa usa ka panahon. Ibilin ang pipila ka pangutana aron tubagon sa umaabot nga mga duaw. Ingon nga mga isigkamamumuo sa Diyos, buot tang mahanasong motuman sa pagtanom ug pagbisibis pinaagig epektibong paggamit sa librong Nangatarongan. Kita makaseguro nga ang Diyos magapatubo niana.